8月12日，爹爹突然收到GAPSK職員來電通知，Ambrose於今期考試中取得優秀獎。爹爹只係負責報名考試，其實佢對考試內容唔係太清楚，只知道最高分應該係「卓越」，下一級佢只係記得係「優Ｘ」，當爹爹聽到職員話Ambrose取得「優秀」，而並非「卓越」，佢好疑惑點解機構會搵人專程打電話通知，又唔係好成績，又並未到發放成績嘅日子！當爹爹再同職員溝通時，
原來，職員話Ambrose呢個試已經取得「卓越」，而佢亦係呢期考試中，成績係全港應考學童嘅前十名，所以Ambrose另外獲得了「優秀獎」！爹爹搞清楚後都不敢相信，仲反覆問係咪真係Ambrose？哈哈！職員話稍後應該會有個頒獎禮，所以打黎話聲我地知先，詳情要稍後再通知，而頒獎應該唔會係獎盃，應該係證書喎！
收到呢個通知，爹爹急不及待通知媽咪，大家都好開心，歡天喜地咁同Ambrose講呢件事，當然，少不免要讚賞Ambrose一番啦！
等呀等，等呀等，到差不多可以取成績前都仲未再收到GAPSK通知頒獎詳情係點，爹爹再打過去了解一下，但竟然得到回覆，話佢地唔會搞頒獎禮喎！爹爹再問職員，咁唔頒獎會唔會出番信、電郵或證書之類嘅文件俾我地，職員答唔會喎！爹爹於是問個職員，咁之前打黎特登通知呢件事，又話會頒獎，而家唔頒獎亦唔會正式出black and white通知，就好似咩事都無發生過咁，咁點解之前要打黎講呢件事呢？個職員竟然話「俾你地得個知字」！呢個答案，真係令人好失望，咩叫得個知字呢？當初又係佢地煞有介事咁打黎講一餐，又話會再通知，而家咩都無，亦都無職員打電話黎交代、跟進，仲要話只係「得個知字」！媽咪真係諗唔明，咁大一間考試機構，點解做野咁兒戲，咁無交帶呢？等爹爹媽咪响Ambrose面前係咁講之後會有個頒獎禮，等佢不知幾開心咁，而家咩都無，真係唔知點同佢講好？！
9月2 日，呢日係第一日可取證書，原本爹爹返夜，應該無人得閒出去攞證書，既已知成績，媽咪都唔心急要出去攞。但有同學仔早上出左去取證書時話見到小朋友取100分，媽咪滿肚疑惑，點解會見到分數？媽咪問過同學仔有無收過GAPSK職員來電（因取得滿分），回覆係無喎！真係奇怪！媽咪亦有同老師商量過，老師希望媽咪再問問職員，希望能有written通知書交到俾佢就最好！咁啱爹爹早左起身，所以最終都有出去取證書。
爹爹話取證書係睇唔到分數嘅，簽收位只有一格俾家長睇到，而爹爹亦問過職員係咪有分數可以睇到，職員話係唔會有分數睇到架喎，而證書上亦只會印有級別。另外，爹爹去取證書時，亦有聽到另一位家長查詢獲獎安排，職員稱果度只係派發證書，「優秀獎」安排則要致電考試機構至知喎！即係話，原來並唔係只有我地收到呢個電話通知，並唔係爹爹嘅幻覺啦！而且，職員亦都正面回應係真有「優秀獎」一事，所以媽咪真係諗唔明，既然真有獎項名稱，就算唔搞頒獎禮，點解都唔可以出張證書，又或者一封信，甚至乎係簡單一封電郵，去記錄番呢件事，俾大家可以留個紀念呢？而且出封信又會令機構多左幾多cost呢？更何況，都只係十個得獎者啫！
Anyway，收到證書，Ambrose的而且確取得「卓越」，除了開心，亦覺得今次咁趕去應考，得到呢個成績，Ambrose真係好好彩！
沒有留言:
張貼留言