對於Ambrose被選入交通安全隊，爹爹媽咪本以為係一件開心事，因為見交安要步操，覺得Ambrose鍾意操兵，加上有制服著，佢一定認為好有型，所以佢一定鍾意。其實報交安前爹爹媽咪係無問過Ambrose，因為真係覺得好啱佢，同埋一直以黎，除左學小提琴係Ambrose自己提出之外，其他嘅興趣班都係爹爹媽咪安排俾佢，一直以來都相安無事！
點知，唔明點解，諗住一個唔會出事嘅興趣班竟然可以出事！
上完第一堂交安之後，一直唔覺Ambrose有咩異樣。然後，過左好幾日後，Ambrose有一晚臨瞓前，同媽咪講：「其實返交安，要留响學校食飯，我有少少驚。」於是，媽咪安撫左佢一輪，話無野好驚，學校日日都返去，又返左咁耐，唔需要驚；再加上，係因為老師覺得佢叻，先至俾佢入交安，唔係人人都有得玩，所以係要叻嘅小朋友至可以留低玩。見佢又無再講d咩，件事又不了了之。
交安嘅第二堂，撞啱Ambrose病左，無返，所以就更加無為意！
直至到今日第三堂，由於尋日去完廸士尼放電，早上起身仍然好攰，爹爹都要叫幾次Ambrose至起到身，心情當然係麻麻地啦！之後，當爹爹同Ambrose講今日交安要留在學校晏d放學，爹爹話Ambrose竟然面容扭曲，喊哂咁話唔想留校，唔想返交安，唔想响學校食飯。因為要趕校車嘅關係，爹爹半氹半就咁話會同媽咪講，就咁送左Ambrose上校車。
及後爹爹係有打俾媽咪商量，但媽咪覺得Ambrose好可能只係扭眼瞓，所以就諗住既然都返左學校，當然係上埋至放學啦！爹爹唔係幾放心，於是打左電話返學校搵老師講一講Ambrose情況。
到爹爹接放學，老師同爹爹講，Ambrose一直食飯都無咩問題，係差唔多食完時開始自己飲泣，唔知點解。雖然Ambrose係咁喊，老師話佢一路都有上堂，仲一路喊一路學動作。聽到都心痛！爹爹其實已經好想即時退隊，但同老師同媽咪再三商量之後，都係決定多睇幾堂至決定。
夜晚，媽咪問Ambrose今日交安學左d咩，佢又好興奮咁教媽咪行禮。問佢返交安好唔好玩，佢又話好玩，但再問佢好玩點解都會喊嘅，佢話係因為學校d飯好難食。但明明老師話佢食左三碗飯！同埋，响媽咪未問佢學左d咩之前，其實已經問佢响學校食咩飯，佢答食菠蘿蕃茄肉肉飯，仲話好好味，叫嫲嫲再煮俾佢食！
好明顯，並唔係學校飯難食，呢個係佢嘅藉口！媽咪諗，唔知係咪佢無得搭校車回家，又要留在學校咁耐，佢仲未習慣？！同埋，自從上左K2之後，幾乎隔日就聽到d同學仔媽咪講起邊個邊個俾人罸企，仲有講過罰留堂無得返屋企。Ambrose一向都唔係斯文乖巧嘅男仔，好容易郁手郁腳，俾老師罰過都唔奇。更有一次媽咪放假親自去學校接佢等佢開心吓，點知老師同佢講today no school bus之後佢即喊！唔知係咪因為成日有人被罰，又有講過話罰留堂，可能佢以為無得搭校車就等於罰留堂，而交安就正正係無得搭校車之餘仲要留校食飯晏d放，所以佢超驚？！
唉！平時返興趣班都無大問題嘅Ambrose，今次咁大反應，唔知佢究竟係唔習慣定唔鍾意呢？希望佢只係未習慣，需要d時間去刻服呢次嘅改變啦
沒有留言:
張貼留言