K2學校生日會 (4y)

之前Ambrose的學校生日會，除左蛋糕之外，都無同佢預備其他野！第一年N班一開學就搞生日會，媽咪都無咩經驗，完全唔知發生咩事；第二年就有為Ambrose準備蛋糕！

今年係第三年，之前其他同學仔嘅生日會，真係收過唔少小禮物，所以今次到Ambrose，媽咪決定為佢準備d小禮物俾佢派，開心吓！

之前四歲生日會時，爹爹已經買左禮物袋，但唔啱用。今次學校生日會，就啱用喇！响反斗城見到有Lego名字牌，一pack有四個，細細地唔算好大，媽咪諗起之前Ambrose上興趣班時成日同其他人掉亂左袋，所以即時覺得呢個Lego名字牌好有用，掛响個袋度一定認到自己個袋啦！雖然唔知點解只有friends系列，但見顏色都有啱男仔同女仔，所以最後決定買Lego名字牌作為小禮物，夠哂實用！

再响超市買左兩、三款零食放埋入禮物袋度，perfect！

 

今晚就叫左Ambrose幫手入禮物袋，教左佢一袋入面應有d咩野之後，佢都有幫手係咁入，不過可能個袋口仲有個zip lock，佢好難至封到口，所以搞搞吓就變成媽咪入，佢負責去執每包嘅指定禮物同埋貼番自己個名字貼上禮物袋度！睇得出，Ambrose真係好開心！

到最後入好哂三十袋之後，Ambrose仲幫手將三十袋禮物入落個大袋度！原來入起哂一袋都幾重吓，好彩佢都係搭校巴，都係落車行去學校果程倫盡少少啫！