Ambrose嘅英文學習進度好慢，媽咪真係唔知點教佢，亦都唔知邊度嘅英文班好，可以俾佢試吓！最大問題係，佢都已經K2喇，黎緊嘅暑假已經開始要見小學，真係無咩時間再試！
媽咪留意到區內一間中心有英詩朗誦班上，見Ambrose普通話方面都試過考試比賽，英文就毫無進展，以前曾經target過五歲就考Cambridge，但見Ambrose進度，除非佢突然有一日突飛猛進，唔係都應該應付不了呢個試。所以，媽咪就諗，read and write唔得，至少oral and listening都要加強訓練一番以應付之後小學面試吧！俾Ambrose睇過咩係英詩朗誦，佢話ok，所以決定俾佢上吓！而另外，間中心亦有做promotion，外藉老師單對單教授，鐘數越多就越平，媽咪真係唔知邊間中心上至夾到Ambrose，見呢度單對單如多鐘數一次過買的話價錢尚可接受到，內容亦可根據媽咪要求制定，媽咪覺得可能可以好似普通話咁，針對性上堂，對Ambrose黎講會好d！於是，為左慳時間出去上堂，媽咪安排了英詩朗誦同埋單對單直落咁上，一共兩小時！
一直以來，Ambrose上興趣班都無咩大問題，只係轉跳舞學校時曾扭計唔肯入過一陣子，媽咪歸咎於當時Ambrose太細，只係三歲，就要佢由上開嘅一間跳舞學校轉過另一間，所以一時未習慣。自此之後，上興趣班就甚少遇到問題，爹爹媽咪一直都為Ambrose呢方面嘅乖巧而欣慰不已。是以，當媽咪安排新嘅英文班俾Ambrose時，亦沒有太多顧慮。
點知，Ambrose學英文之路真係一波幾折！
第一堂，由爹爹帶Ambrose上英詩加單對單。放學後，外籍老師話，Ambrose上單對單時好似好眼瞓咁，同埋响入面喊左兩次。爹爹媽咪當晚傾談過，唔知係咪因為剛開學無耐，之前夜瞓開，而家開番學，上完學校課堂後，下午仍然會攰，加上下午雖然瞓左晏覺，可能一次過連上兩小時，實在需要集中精神，所以Ambrose較平時攰d！又，亦可能始終係新老師，上咁耐堂，仲要其中一個鐘係單對單咁上，有d驚都唔出奇！
第二堂，爹爹媽咪一齊湊Ambrose返學，幾日前爹爹媽咪已經不斷預告佢知會再上英文堂，佢已經話佢有少少驚，又話人地黑忟忟，又話咁耐都唔落堂，爹爹媽咪知道後已經感覺到事態不妙，但都盡力安撫佢。臨上堂前仲氹Ambrose上完堂買盒Lego俾佢獎勵佢，點知去到中心門口，佢就已經喊哂！幾經辛苦氹左佢入去課室，爹爹媽咪因為想向老師交代一聲，所以跟住入去，至發現原來英詩班計埋Ambrose只得兩個人，而個課室係迫到基本上關左門坐低左都唔使落地咁濟！媽咪當下已經覺得，怪唔知得Ambrose唔太鍾意呢度啦，除左驚同時間耐，個環境真係好難俾一個只係剛四歲嘅小朋友捱兩個鐘坐响度架喎！
由於唔放心，爹爹同reception姨姨講Ambrose情緒唔太好，上一堂上堂時同今堂入門口時有喊，reception姨姨就話可能上堂兩個小朋友上完英詩，兩個一齊出左黎放學，但Ambrose要再上單對單，所以出左去又要再入番課室上堂，由兩個人變成一個人上，唔知係咪咁佢以為自己被罰留堂。唉！媽咪聽到，當然覺得咁樣又係另一導火線令佢喊啦！因為學校交通安全隊佢都有同樣問題，學校環境咁熟，留校食飯加上交安都有問題，更何況呢度咁陌生，仲要以為放得學又被帶返去獨自面對個黑忟忟嘅外藉老師？！呢次事件對Ambrose黎講真係一大陰影呀！
呢堂媽咪無咩點走開過，得到reception姨姨通融，俾爹爹媽咪耐唔時去＂莊＂Ambrose，見Ambrose上堂都ok，無喊，仲有幾次佢轉頭同我地笑，媽咪都放心左好多！見佢放學時個樣係幾開心嘅，爹爹媽咪以為，再過幾堂習慣左就無事！
低處真係未見低！第三堂之前，又係早幾日預告定俾Ambrose知，Ambrose又係一貫咁話其實佢都係有d d驚，又係一貫咁安撫佢，又係以為只要過多幾堂就會順利。今堂係爹爹自己一個人帶，媽咪响公司，見到差唔多夠鐘上堂時已經好緊張，諗緊唔知Ambrose順利入去上堂未？爹爹一直都無來電，媽咪一直都忐忑著。原定上堂時間過左十五分鐘左右，爹爹終於打來，氣急敗壞咁話Ambrose死都唔肯入去上堂，仲响門口歇斯底里地喊，佢已經無計可施，問媽咪意見點做？媽咪唯有話打返去請假，容後再處理！
等到爹爹心情平伏一點嘅時候，佢就同媽咪講番當時情況，話佢氹又氹過，鬧又鬧過，都搞唔掂Ambrose，Ambrose又狂喊，又死命攬住爹爹唔肯入去，爹爹就係咁fing開Ambrose，周圍嘅人都望實佢地，爹爹真係唔知可以點做，又嬲又怒又無奈。媽咪聽到後，雖然覺得爹爹有些地方過火了，但設身處地，可能換成媽咪去，可能更加火。
心痛，原本以為對Ambrose好嘅事，結果竟然對佢造成左傷害；心痛，要這對咁親密嘅父子承受不必要嘅壓力及產生天翻地覆的磨擦。
爹爹話，當佢响中心門外同Ambrose糾纏之時，Ambrose歇斯底里地喊同埋用佢最大能力向爹爹辯駁唔想上堂，佢嘅表達能力係非常之流暢而有理。最震撼嘅一句說話，令爹爹媽咪感觸良多，就係：「我都係第一次唔肯返學啫，我真係好驚，唔想入去呀，我以前都未試過唔肯啦！」呢句說話，深深刺痛媽咪的心！是的，一直以來，Ambrose嘅興趣班都係媽咪安排的。正正因為Ambrose唔抗拒，媽咪就一直利用佢嘅嘅合作與乖巧，一而再，再而三咁為佢安排不同嘅興趣班，佢從來都無投訴無扭計！其實媽咪心底裡，有時都隱隱覺得，唔投訴唔反抗，未必代表佢一定鍾意，只是佢一日唔表達不滿，媽咪一日都當佢無問題。正正因為Ambrose從來都唔扭計，媽咪對於佢嘅受壓能力期望亦越來越高，總係認為佢平時都可以做到無問題，應該每次都唔會有問題。今次事件，Ambrose話佢都只係第一次係咁，佢真係好有道理，佢真係第一次表現到佢歇斯底里嘅驚恐，好唔想入去！其實佢完全無錯架！只不過係爹爹媽咪接受唔到，平時都係咁嘅事情，變得理所當然！Ambrose無錯，錯在媽咪真係唔應該一下子要佢直上兩個鐘，應該先試上一個鐘，然後到佢ok先至再試加單對單！
以Ambrose嘅個性，爹爹媽咪知道佢會默默承受，硬住頭皮俾佢再試幾堂，最終佢係會習慣的。但咁樣係咪就對佢好？咁樣係咪真係有效咁學習到？又非必然！唔想Ambrose再受驚，媽咪即日決定唔會再俾佢上埋餘下兩堂！
沒有留言:
張貼留言