Ambrose於七月考嘅普通話試，竟然除了得到卓越級別之外，更係全港考生頭十名之內，爹爹媽咪深感意外。之前考試機構通知會有頒獎禮後，突然又無哂消息，致電再查詢時又話唔會搞任何野亦都唔會出written通知，之前打黎係俾家長＂得個知＂字喎！
同普通話老師商量完，佢都叫媽咪再問多一次，但爹爹去攞證書時已再三問過，都係叫爹爹打去考試機構再問，所以，當晚媽咪寄了封電郵去考試機構再三確認。但，發出電郵後，一直都沒收到任何回覆作確認及跟進，事件因此不了了之。
直至上星期某日，爹爹突然又收到考試機構職員來電，又話會搞個好小型嘅頒獎禮，當然，爹爹欣然答應了！日期為九月十八日下午，由於係平日，媽咪要請半天假！奇怪地，雖然已經定了頒獎典禮，但媽咪發出的電郵，一直都沒有得到任何回覆！Anyway，既然已有所安排，媽咪亦沒有深究！
今日爹爹帶Ambrose出銅鑼灣會合媽咪，响Sogo門口一落車，Ambrose就流鼻血了，急call左媽咪過去幫手。好彩Ambrose今日著左件深藍色tee，睇到佢成個心口都係血，係件衫夠深色唔覺眼咋！Ambrose流鼻血問題其實都令媽咪有少少擔心，好似自從年頭開始，流左兩次勁嘅之後，每隔個幾兩個月都會流一次咁！唔知係咪佢整穿左鼻膜，佢又成日鼻敏感捽鼻，入面都未好哂又再捽到再流過呢？！
早左少少到會場，已經見到另外兩個小朋友出現！Ambrose有個同學仔都有份攞獎，估唔到呢兩個人仔，黎自新界同一間不知名嘅幼稚園，竟然咁啱攞到呢個獎，如果出埋學校名，可能間幼稚園因此而揚名都未定，哈哈！仲要＂橋＂到呢兩個人仔嘅普通話老師，都係同一人，媽咪真係有d擔心，呢個老師因此而加價呢！
同學仔都未到，機構職員就話開始頒獎了，果然係小小頒獎禮，哈哈！媽咪正感奇怪，成績於頭十名嘅小朋友才獲此獎，但現場只有三個小朋友到左，咁就開始？進入室內場地時，媽咪見工作人員放左好多證書在檯上，另外，仲有一份得獎名單。只見原來名單上，k1組只有六、七個小朋友名，Ambrose同同學仔，已佔其中兩個！即係話，頭十名，其實無十名咁多！
頒獎禮完左之後，職員再個別與得獎家庭做了個簡單訪問，就此結束了這個頒獎禮！雖然頒獎禮規模真的很小，但Ambrose能夠站在小台上攞獎，看得出佢好開心，收到證書一刻，佢仲好開心咁話，可以約普通話老師出街了（因Ambrose好鍾意普通話老師，老師答應佢，如佢每攞一張證書就可約佢一次出街）！
沒有留言:
張貼留言