1) 高德根（下午班申請表）＞＞下午班offer＞＞無留位
2) 九龍塘啟思（上午班考慮下午班）＞＞下午班offer＞＞無留位
3) 保良局易桂芳（上午班考慮下午班）＞＞下午班offer＞＞留位
4) 保良局田家炳（上午班）＞＞上午班offer＞＞留位
5) 青山聖彼德堂（上午班）＞＞上午班offer＞＞留位
6) 青山聖彼德堂兆麟苑（上午班）＞＞抽唔中又無申請waiting
7) 梁李秀娛（下午班申請表）＞＞下午班offer＞＞無留位
8) 根德園（上午班考慮下午班）＞＞waiting
9) 雅麗斯（上午班）＞＞唔肯要下午班唔waiting＞＞rejected
10) 培正（上午班）＞＞未面試
原來不知不覺報左咁多間幼稚園，唔列出黎都唔知，其實重有好幾間報左無去，同埋諗過要報而最終無報，只係呢十間去左面試，睇落都好誇張！不過收到上午班嘅其實都只得兩間，重要係唔同時間知道結果，好彩都係報左咁多間，唔係可能一個offer都無都似！
呢間面試 時 老師話預三至四星期就有通知，媽咪上過網睇forum，有上年媽咪報料話月尾會有信，所以一直都不以為意，諗住月尾至月頭先有信！點知星期六爹爹下午响信箱見到封信，攞上樓俾媽咪，兩個人都想親自拆封信，大家都超緊張！緊張到媽咪完全無為意封信其實好薄，其實都應該知道無行，但真係太緊張，手都震埋咁拆信，睇左頭一行話因為今年好多人報，已經知道唔收Ambrose，好失望！呢間面試前其實我地都無咩信心，因為知道要唱歌，以Ambrose性格一定唔會，但佢又竟然做到，可能因為咁，爹爹媽咪覺得面試表現真係唔錯，機會又高番d，就係咁，由無咩expectation到有所期待，到收信話唔收，真係幾大打擊！
不過雖然唔收，Ambrose都入到waiting list，都叫好過收reject letter嘅！再上forum八吓，開頭諗住可能全部人唔收都係去waiting，點知原來有人真係收reject letter，咁入左waiting list都叫不幸之中嘅大幸，即係都重有機會嘅！報得根德園嘅家長相信同時都報左好多名校架喇，好似KM，SC重有果d龍校，果d學校都未放榜，相信好多人都會留左根德園再等埋其他學校放榜至決定要邊間，咁可能樂觀d諗，過左交留位費deadline同埋出年五六月真係要交學費嘅時候，就會有位漏番出黎，waiting都重有希望！
暫時所報嘅幼稚園都差唔多見哂，只欠 十二月三日 嘅培正，幼稚園面試將正式告一段落，終於可以抖抖喇！
平時搭村巴返工，我都慣性一係坐窗口位，一係就坐三人座果邊嘅中間位。有人話中間位咁迫，唔鍾意坐，但我又唔係咁諗，坐走廊位係鬆d，不過d人一路上車一路撞住你入，真係麻麻地囉，重要開車後會比較“浪”，瞓著左又容易d“西”出去，我一上車就瞓，所以唔會坐走廊位！可能我細粒啦，就算坐中間位都唔算好迫！
不過有d人真係好乞人憎囉，明明自己坐住三人位嘅走廊位，到我行埋去叫佢唔該借借想話坐入去中間位度，佢果時先至一個唔該自己坐埋去中間位度，俾個暖座你坐，有無諗過人地感受架？？？如果一早要坐中間位，做咩唔一早坐入去先喎，係要等人地要坐先至自己坐入去，分明就係睇左係咩人坐落黎，先至決家自己坐邊個位啦，呢d人真係好自私囉！正一衰人！通常我first priority都係搵左兩個女人坐嘅三人位先架麻，見有就一定行左埋去先，你一個唔該坐左我個中間位要我坐走廊位，咁一早知道嘅話我唔行埋去啦，行返轉頭又無左d中間位坐喇，真係好想鬧佢囉！俾著自己早上車都唔會坐住走廊位等人黎先坐中間位啦，唔明呢d衰人咩心態！而家又唔係乞你個位，我都有俾錢架！！！
同呢間幼稚園都無咩緣份，之前完全無諗過要報，係學校同學報，朋友又報，所以又走去報吓咁！去到open day交form又要排隊又要等，煩到死，但既然去左，都有排隊交嘅！點知俾個時間我係下午三點半，晏覺時間加上爹爹要返工，得媽咪自己湊Ambrose去，又已經有唔同學校offera，已經好煩有offer交唔交留位，交吓交吓又幾間咁多，真係大破財，所以就更加唔想去！
面試日Ambrose都係好晏先起身過去見，平時有問必答嘅佢 都唔答 老師問題，已經知道唔多得架喇！果日去旅行時，學校打黎又問媽咪上午學位好full，下午考唔考慮，梗係唔考慮啦，媽咪簡直係九秒九答個老師唔考慮，大家再無野問對方，好快收左線！係之後先至諗起，究竟唔要下午係咪都有得waiting上午定係唔要下午即係turn down左佢地連上午都無得waiting呢？後尾問番d朋友仔先知原來佢地都有收call，有即時問有無得wait！媽咪無問呀，算罷啦，有就有，無咪無囉，都唔諗住去呢間架喇，點都無所謂啦！
早兩日收到信，揭盅喇，原來唔要下午又無問有無得wait上午，係無得wait上午囉，應該係reject letter喇！哈哈！呢間應該係Ambrose報k1以黎第一間收reject letter喇！都唔知邊個reject邊個！一早面試時未問Ambrose野已經知道無哂上午班架啦，個老師好似魂遊咁，等埋Ambrose唔答老師問題，同埋老師勁游說媽咪要下午班就更加confirmed啦！媽咪直覺真係幾靈架！
不過其實呢間學校校舍媽咪都覺得唔錯架，可惜感覺係二線左少少，估唔到呢間咁多人報喎！唔收都好嘅，費時又煩留定唔留位好！但佢有度唔好囉，朋友仔報全日班，見完哂，出offer前打電話俾朋友話學校出年唔開全日班，問佢地考唔考慮下午喎，都唔知有無攪錯囉，無全日班應該要報名時同人講囉，有d家長根本一定要全日班先攪得掂架麻，無全日班可能人地都唔報名啦！收左人報名費，浪費哂人地嘅時間走去面試，都唔知有無人會撞期而要取捨去邊間見好架麻，面試完哂先話俾人知唔開全日班，好唔caring囉！有d懷疑係咪一早知又唔出聲，等多d人報佢又有得收報名費之餘再同佢間學校做吓勢！雖然唔係好關媽咪事，不過一聽到就嬲啦！咁都得！！！同九龍塘啟思出offer時先話俾人知佢地今年無學卷，真係無分別呀！
開學之前已經覺得Ambrose無咩重過，開左學三個月，學校keep住度高磅重，原來Ambrose只有高左無重過，唔怪得知佢著開加大碼嘅褲仔有時會因為尿濕左又或者poo左重重地而墮左落去，攪到有時會露股隙，又或者會嘈住話poo poo跌出黎，哈哈！啱啱月頭Ambrose腸胃炎，短短幾日唔食野唔飲野只係瞓覺，病完之後好似再瘦左咁，連佢平時著開嘅牛仔褲有時都見佢要抽褲，亦都試過鬆到跌左落黎，要同佢再adjust過入面嘅象筋！而家都唔知究竟好唔好同佢轉返細 一碼 嘅褲仔好？！好彩Ambrose不嬲都有d肉地，高左瘦左都唔係太瘦，如果唔係真係心痛死！
呢次病左竟然有意外收獲，就係戒左夜奶喇！早响一歲鬆d已經想Ambrose戒夜奶架喇，健康院話好d麻，加上Ambrose唔願刷牙，臨瞓重要飲枝奶即刻瞓，真係唔多好。奈何Ambrose唔見枝奶唔識去瞓覺，加上嫲嫲成日話bb仔係要嘆枝奶瞓先至夠飽，無得飲好慘，攪到遲遲都戒唔到夜奶！今次腸胃炎，係Ambrose自己無胃口咩都唔食，醫生又話唔好飲奶，好難消化，所以順理成章唔開奶，哈哈！難得Ambrose又唔嘈麻！無飲奶幾日，到Ambrose好番之後終於識得問我地攞奶飲，媽咪死都唔俾，氹佢唱歌仔分散注意力唔好再扭奶，半推半就咁啦，同埋要响床碌個幾鐘至瞓得著咁！頭兩晚見Ambrose扭得勁狂要飲奶奶又咁耐先瞓得著，媽咪都有心軟過架，諗住佢瘦左咁多，俾佢飲奶瞓都好丫，追番d磅數，不過難得有個咁嘅機會戒奶，錯過左又唔知等到幾時先戒到，最後好彩媽咪堅持，過左幾晚之後，Ambrose無再問攞奶奶瞓覺喇！Yeah～～～
不過佢重未戒到食奶咀瞓覺囉，唔知點同佢搣甩個奶咀好呢？！
呢排Ambrose唔知做咩，忽然愛上左排隊隊。先係成日要求大人同佢一齊真人排隊（唔知排咩架），早排病到死死吓瞓左幾日，突然有一日媽咪瞓醒出房就見到Ambrose將以前貼响玩具盒做decoration嘅動物貼子搣哂出黎，再貼落地上面排隊！搣到佢隻手指側邊都起左個水泡，唉！不過佢又真係好有心機排嘅，所有貼子都貼到是是正正，無倒轉架喎！之後佢重攞埋車仔呀、動物呀同埋lego人仔排隊，所有野都會係同一方向，無話亂架喎！呢晚佢重攞埋入圖形果d形狀粒黎排埋一份添呀，服左佢呀！排左嘅隊又唔俾人郁，唔俾人收拾，攪到本來屋企個廳好鬆動，就係因為佢係咁排隊而淪陷左！開飯要開檯要就住佢d隊黎開，推椅子同high chair就變成抖起哂先埋到位！有好有唔好啦，平時Ambrose係都要人陪佢坐陪佢玩，但排隊隊又可以自己慢慢砌慢慢排唔使理佢，對專注力同手眼協調都係好好嘅訓練，尤其是排lego人，佢真係要好小心先排到唔跌，跌一個人仔可能會好似骨牌咁跌好幾個，要重新黎過！
學校旅行之前已經收到信Ambrose收左青聖嘅上午班，比起之前保田收左上午班，今次青聖有上午班offer就比較開心，可能始終上年想入呢間嘅N班，最終都wait唔到有位，而家終於收左，算係完左個心願啦！不過隨住Ambrose番新一代咁適應同開心，又學到野，反而呢一刻有青聖嘅offer又未至於好雀躍，同埋未係覺得好吸引要轉校咁！收到青聖offer時，兆聖未有結果，好彩青聖交留位費期限係11月24日至11月30日，兆聖今日可以上網睇結果，所以都重可以睇埋兆聖有無offer先至交留位，唔係又要雙重破財喇！
兆聖今日六點後可上網睇結果，不過媽咪同爹爹都撳左一輪唔見有update，到等到轉左字眼有收生結果時，再撳入去又話找不到，再上baby kingdom見已有媽咪打左去學校話睇唔到，學校即時fix個問題，又要等，終於都唔知六點幾多可以撳到入去睇，結果兆聖上下午都無offer。雖然係有少少失望，但媽咪竟然有鬆一口氣嘅感覺！兆聖之前聽好多唔同人講要識人至入到去讀，而呢間收生其實只係抽籤，同面試表現無太大關係，爹爹媽咪唔識人攞學位，而Ambrose面試時有喊但都keep到有問有答，算係唔太差，當然又唔係smart，媽咪都唔抱太大希望。但邊有咁多人識哂入面嘅校長老師攞哂d學位架，點都有d真係唔識人入到架麻，收生只係大抽獎，有時都會諗會唔會咁好彩！哈哈！呢間係區內好熱門嘅學校，超多人報，重三文兩語，校舍環境好，其實媽咪覺得有學卷幼稚園黎講，呢間算係好好，如果要轉有學卷幼稚園，呢間係首選！不過新一代係全英文幼稚園，學卷學校完全做唔到咁嘅語境，校舍又大又好，有時都諗如果抽中左兆聖，咁熱門又係學卷幼稚園，唔要又好浪費，但要放棄新一代又唔太捨得！所以知道抽唔到時，其實媽咪除左有一下子失望之後，心情反而輕鬆左好多！
而家青聖有offer而兆聖無，當然就好易決定要交埋青聖嘅留位費啦！
今日係媽咪手術日，今次係做埋右眼。原本媽咪想話約十一月，但因為呢排又要忙住Ambrose幼稚園面試開放日等等，好多個星期六都唔得閒。要做手術嘅話，其實最好就到星期五做，星期六要覆診都唔使請多日假！但奈何又無時間，媽咪又話唔想太凍先黎做手術，左度右度，就埋老公放假，好辛苦先度到今日去同媽咪做手術，請假就請假啦！
不過真係唔啱時間，度完一輪搵左今日，我又病到死，但因為已經無咩時間，唔想媽咪失望，病住好想改期都要死撐住去，唯有尋日搵左奶奶幫手睇住Ambrose，我就睇醫生大覺瞓至掂！尋日睇醫生先攪笑，醫生一聽完我話狂打乞次又周身骨痛同疑似發燒之後，佢眉都皺埋問我，你究竟係咩人黎架，係邊個星球住架，點解可以唔係呢樣病就果樣病架，一d抵抗力都無，係咪工作地方定屋企有問題，個醫生真係好激動，好好笑！最後醫生話要寫日假俾我，要我好好休息，我話唔使喇，佢話你抖吓啦，你係休息唔夠先至成日病嘅，然後我唯有同醫生講我攞左兩日大假放，所以唔使寫病假俾我喇！咁樣俾醫生話同埋醫生咁堅持寫病假俾我都係第一次，哈哈！
今次同媽咪做手術，重諗住好似上次咁等好耐，之前姑娘都話一點黎可能要等到三點，點知今次真係好快，未夠一點去到，三點已經返到媽咪屋企！今次媽咪都無上次咁緊張，起碼無話一返到去就要瞓响度，唔敢做呢樣唔敢做果樣，哈哈！
三點幾返到自己屋企，老公原本話咁早去睇戲，不過因為明天一早又要同媽咪覆診，要自己搭車，我驚我病又要等咁耐好辛苦，所以都係唔去睇戲，留响屋企大覺瞓，養足精神快d好番，明天再出去！
之前學校有通告話11月19日係學校旅行，地點係挪亞方舟，原本Ambrose嘅第一次學校旅行媽咪都好重視，但見到通告，成人一位要$180，Ambrose都要收$90，一家三口去旅行，咪即係要$450，學校旅行黎講，真係好貴吓喎！重要lunch只不過係三文治，媽咪見到已經唔想去喇，又貴又無野食，地點又唔係幾啱兩歲嘅小朋友！加上又好大可能撞正一間幼稚園面試，媽咪唔多想去囉！不過爹爹話Ambrose學校旅行，又係第一次，點都要同佢去喎！就係咁，捱住咁貴嘅價錢，又真係撞埋另一間幼稚園面試，都照同Ambrose報左名去旅行喇！
真係好衰唔衰，旅行前兩晚媽咪已經有鼻敏感，旅行前一日，媽咪重响公司狂包雲吞，直到旅行當日，情況都無好轉過，都唔知係鼻敏感定真係大傷風！因為已經俾哂錢，又放棄左唔去見幼稚園，媽咪諗住小小病啫，點都要捱住去旅行！不過旅行當日學校安排真係好混亂，時而又話解散時而又話到運動場集合，都唔知想點！本身已經好辛苦嘅媽咪真係俾呢d咁混亂嘅安排攪到身心疲憊呀！
又唔明點解幼稚園旅行要一大早喎，八點三要去到學校，咁即係最晏都要八點出門口，又要處理埋Ambrose，真係早起身過平時返工！因為太早嘅關係，爹爹媽咪都無食早餐，去到方舟行左一個館之後，終於都忍唔住又攰又餓又悶，走左去餐廳度食野，都等唔到一點幾果餐三文治喇！
其實咁細嘅小朋友去旅行，媽咪真係覺得去郊外有得玩有得跑啱d囉，去埋呢d咁informative嘅展館，唔好話小朋友，大人都悶啦，小朋友悶就扭架啦，咁咪即係勞役大人囉！入到d館有電影睇，又要排哂隊又要等，其實真係好唔方便！究竟學校有無諗過家長嘅感受架？媽咪唔明白點解讀N班嘅學校旅行點解唔可以同K3較大學生嘅地點有唔同囉！去呢度真係不如去市鎮公園，唉！
食完野本身都諗住跟行程行返去d館睇野，不過經過雙頭城堡，Ambrose又好想入去，點知原來我地張票又唔包去呢度架喎！Ambrose見到有彈床當然想玩啦，咁爹爹俾左十蚊諗住俾Ambrose玩一陣囉！點知入左去，Ambrose又勁叫雅雯一齊入去玩，雅雯又唔玩，攪到Ambrose勁無癮！成張彈床好大，只得Ambrose一個人玩，媽咪見佢唔行唔郁好悶咁，問負責人可唔可以俾多個錢媽咪行入去陪佢，媽咪唔係旨在玩啦，而係方便照顧Ambrose之麻，又話唔得，都唔知有無攪錯！之後Ambrose嘈住話隻腳濕，爹爹以為佢出汗濕，同佢講唔緊要啦，玩一陣先啦，點知一摸，成對襪濕哂！個負責人先至話係呀，之前落雨，佢地都有抺乾張彈床架，不過有d位都係有少少濕喎！聽到都嬲啦！有無攪錯，濕嘅又唔早講，早講就一早就除襪啦，唔講又唔提我地，濕哂先黎話係呀，重有少少濕，成對襪都濕哂都叫少少濕，都唔知有無攪錯，只係掛住做生意，完全唔理小朋友，真係好無良心囉！俾左十蚊可以玩五分鐘，不過Ambrose前後都無玩過一分鐘，真係浪費！
玩完彈床就上方舟花園行，Ambrose嘈左好耐話要睇elephant！上到去個公園，真係一眼就睇哂d動物，就係响個方舟口行緊出黎果d囉，全部都係假嘅，人人都係响果個口同動物影相，其實真係有d無聊，要睇動物不如去海洋公園好過，起碼都有郁嘅熊貓睇先啦！影完相，真係無咩好行，又差唔多夠鐘返運動場集合食三文治！其實以為會有集體遊戲，諗住順便認識吓其他同學仔，不過都無，集合真係只係為左食野！每個家庭派個代表去取食物，因為我地係三人家庭，所以有三份三文治，三盒飲品同三個蘋果。不過要一個人攞哂又無袋又無碟，徙手攞真係有難度囉！派三文治又唔會問你食咩野，求其塞幾份俾你就算，真係唔多掂！蘋果派俾你又唔知有無洗，食又唔係唔食又唔係！唉！總之去之前媽咪已經嫌貴，去左就更加不滿囉！
Ambrose見到蘋果就梗係要食蘋果架喇，開頭唔知有洗手間可以去洗蘋果，只係攞左張濕紙巾抺乾淨俾Ambrose食咋，成個蘋果咁大個，Ambrose都唔俾人同佢咬開先食，要自己黎慢慢咬，其實佢都只係咬到皮同少少果肉，好似刨蘋果咁，真係好笑，不過又好擔心佢d牙齒，格硬攞走佢又唔肯，真係煩！不過最好笑係Ambrose一直都埋頭食個蘋果，爹爹同媽咪都無為意，但佢突然好似醒起d咩咁，抬高頭擰向後，個口就話Miss Anne呢？但媽咪見到Ambrose對眼已經係半開合狀態，佢原來已經差唔多瞓著咁濟，個心重想食蘋果同記住Miss Anne，真係服左佢呀！爹爹同媽咪唔敢輕舉莽動，响隔離傍一傍住Ambrose以防佢瞓著左碌落地，再望多佢一陣，真係合埋對眼至攞走佢個蘋果！哈哈！就係咁，Ambrose食食吓野又瞓著左喇！
老師話兩點半再回運動場集合搭旅遊巴返去，見Ambrose瞓左，又已經接近兩點喇，所以爹爹媽咪都無離開運動場再周圍行喇，只係行左出門口陰涼處俾Ambrose瞓好少少，大家都坐得舒服少少休息吓！今日嘅行程，真係好無聊！咩都無玩無去咁濟，下次再去旅行，真係要諗清楚地點係咪真係好先去，唔係又浪費錢，又浪費時間，又唔係特別開心，寧願自己去開心d同平d添呀！
Ambrose瞓左一陣，都未上車佢又已經起番身，又差左電咁！不過爹爹媽咪已經攰到死咁濟，媽咪病到無哂心機，爹爹又鼻敏感苦苦支撐，真係超辛苦呀！
今晚終於的起心肝開左pack Jumbo Washable Watercolors Set同Ambrose玩，一來諗住試吓呢隻新買嘅watercolor，二來係因為媽咪實在太懶，唔想開哂壇同Ambrose玩畫畫，所以開呢pack watercolors响檯上面畫畫就算喇！
準備左海棉同一小杯水，諗住教Ambrose每次都要點少少水去沾顏色，要轉色嘅話就要在海棉上掃幾吓掃清之前嘅顏料，但Ambrose根本咩都聽唔入耳，只係不斷响塊海棉上面掃，再唔係就係咁沾水在顏色盤上，沾濕哂又唔畫落畫紙度，最離譜係佢要將枝畫筆掉轉，要用筆頭沾顏料去畫畫，真係俾佢激死呀！最後，媽咪任佢胡鬧一番，要沾水就沾水，要用筆頭畫畫就畫，結果，Ambrose發現筆頭係畫唔到畫架，都算有少少得著啦！盒watercolors俾Ambrose整到污糟哂，佢又將沾到嘅顏料油在watercolor盒上，將整盒watercolor白色部份係咁油，唉，都唔知好定唔好喇，應該俾佢自由發揮定或是制止佢呢？最後，媽咪見顏料係washable，都無再阻止Ambrose亂油，俾佢玩完之後再用濕紙巾抺番乾淨！
玩到興起，Ambrose話要用手，望吓媽咪得唔得，其實就算媽咪話唔得，佢一陣間又會再問，再唔係就問都唔問就用手，所以媽咪見佢問，既然佢又有興趣玩，又似乎無咩大問題，所以媽咪都話“你鍾意啦”！就係咁，Ambrose就即時猛用手抓顏色盤，不過watercolors係要加水先至易沾起顏色，媽咪要幫手滴水落去，有時滴唔切，顏料乾，Ambrose都照係咁抓，真係服左佢！抓抓印印玩左一陣，Ambrose對手已經黑到死喇，佢自己都話好污糟，係咁嘈住要抺手，媽咪就即時叫爹爹同佢洗手，要快d收檔至得喇！唔係真係收唔到科！
雖然話係washable，不過由於Ambrose係咁抓顏色，一手都係至安樂，所以即使洗完手，佢對手嘅指甲邊都捆住d顏色，好難挑出黎洗！次次玩親顏料都係咁，成手捆哂邊，都唔知返到學校老師見到會諗d咩野，成日又驚Ambrose本手冊俾人吸黑豬仔！
不過雖然Ambrose未掌握點認真用呢盒watercolors，不過如果真係懶懶地唔想開顏色，呢個都係唔錯嘅選擇，頂多都係忙少少幫Ambrose滴水囉，哈哈！唔錯唔錯！
收完保田嘅offer，過左兩日上網又check到呢間都收埋Ambrose！爹爹果然對Ambrose超有信心，一見完行出黎就已經話收硬，果然又真係收左！好可惜，表現好又收左都無用，又係下午班！早知d問題唔難Ambrose又咁合作，早知辛苦d都同佢排份上午班申請表啦！唉！個天都好似唔想Ambrose轉校咁！媽咪覺得唔錯可以諗吓果d都收哂入下午班，保田唔係唔好，媽咪去完開放日都幾鍾意，不過始終個校舍真係超細，位置又麻麻，收左上午班都唔係咁美滿開心咁！梁李果日見完都已經覺得老師好nice，校舍唔係大，但都好過保田，而且又光猛又乾淨又濶落，呢間重要大把人爭住入架麻，媽咪真係覺得好可惜！如果當初樓下保易係無交留位嘅，咁媽咪一定會交呢間留位啦！但已經交左一間下午喇，又唔係真係好想返下午班，咁留一間下午學校都好夠啦，留得下午都係近屋企好d，慳多d交通時間瞓吓抖吓都幾重要架麻！
好唔捨得，真係覺得如果下午班，呢間係心水過保易架麻，奈何之前已經交左留位，又無理由間間收都去交錢架麻！所以真係好忍痛，無交呢間留位費喇！
後記：上網得知有媽咪仔女都係讀呢間，但細仔第一輪考唔入，好煩惱無學位同埋仔女可能要讀唔同學校接放學問題，後來過左交留位費deadline之後，呢個媽咪終於收到學校電話有offer，雖然無想要嘅上午班，只有下午班，佢已經好開心好感恩！唔知點解媽咪都覺得好開心，感覺係好似因為自己唔要個位放到出黎幫到其他人，心情都好d，亦都覺得有時d野真係要講緣份，唯有諗Ambrose同呢間學校有緣無份啦！
星期六先見完呢間，星期一就收到Ellen姨姨電話，話上校網已經見到收生名單，Ambrose同浠浠都收左上午班，唔見雅雯個名！估唔到同日下午重已經收埋信，要交留位費喇，真係效率好快！唔使家長心掛掛，讚！夜晚再whatsapp，原來Linus都收左入上午班喎，上次又係呢四個小朋友同一時間去見保易，結果係兩個上午兩個下午，今次大家都學精左只要上午唔諗下午，面試表現ok就三個都收左上午班！果然，只選上午班嘅策略係啱嘅！呢個結果亦都比較合理！
收到offer之後又係時候煩留唔留位，原本去完面試之後，爹爹就已經唔鍾意間學校個位置，同埋媽咪一直都介意個校舍細，不過呢間係Ambrose第一間收上午班嘅學校，如果之後果d都無，咁真係全軍覆沒，叠埋心水讀番而家呢間無學卷架喇！好似又唔多放心咁！Linus媽又講到呢間係全屯門第二好嘅幼稚園，雖然唔知係咪真係咁樣排名，不過上網又真係見過d人話呢間好，最重要係K2有英文班，如果成積好，係會被編入英文班，聽講係全英文喎，咁又真係幾吸引，有學卷嘅全英文喎！
諗左好耐，曾經都放棄，想話孤注一擲等根德園又或者月尾至有結果嘅兩間聖彼德堂，唉！諗來諗去，都係去交啦，都係五百蚊啫，買個保險安心d啦！無人知過多半年之後我地嘅諗法會唔會再變，唔留就無得選擇，呢d錢真係唔慳得！今日last day交留位，都係叫爹爹去交埋啦！
又係幼稚園面試喇！呢間見下午三點半，正正係晏覺時候，想Ambrose有表現都幾難啦！唔知係咪上星期一日踩五間，又病左成個星期，再加上今日只有媽咪一個人湊Ambrose，媽咪真係有d攰，唔想再去面試喇！個個星期唔係去交表就係去開放日再唔係就面試，攪左個幾月，真係好厭倦！而家讀緊果間，校舍又大又乾淨，又係英普幼稚園，Ambrose又已經習慣左，重咁 鍾意d 老師，其實讀番呢間真係perfect，只係無學卷，係錢嘅問題！同爹爹傾過，佢都覺得如果出年經濟上唔係太大變動，其實又唔係供唔起個仔繼續响呢間讀，所以爹爹都叫媽咪唔好再去面試喇，休息吓啦！
就係因為諗住唔去，想Ambrose休息吓，下星期精精神神返學，所以媽咪都無刻意要佢早d瞓晏覺，都係Ambrose自己話要瞓，就去瞓！一點鐘，Ambrose順利入房，顛左一陣就瞓左！兩點九，媽咪諗住Ambrose都瞓左個幾鐘，都係叫一叫佢啦，起到身就去面試啦，起唔到就齊齊再瞓耐d，哈哈！點知叫極佢都無反應，嚇鬼死人，又會瞓到咁林嘅！正當媽咪放棄嘅時候，自言自語咁問Ambrose係咪好攰唔想起身呀，Ambrose又真係答媽咪“係”，無開眼架！就係咁，媽咪決定放棄啦！
三點鐘，爹爹打黎，媽咪同爹爹講已經執好哂野換好衫，只等Ambrose起身就起行，但佢唔起身，爹爹重話佢唔起身唔好叫佢喇，唔去就唔去啦，抖吓好過啦！再一次確認唔去面試！不過電話一收線，Ambrose就坐左起身！哈哈！媽咪問Ambrose去唔去表舅父學校玩，佢話好，咁就快手快腳換衫出面口喇！又好彩落樓下一陣就截到的士，所以三點半準時到達！
去到重撞到晴晴，又見到Ellen姨姨，原來大家都係呢個鐘數面試！好快，就叫Ambrose入去喇，不過只係叫左去課室門口等！唔知點解晴晴同Ambrose同時間面試，佢地又早黎過媽咪咁多，都未叫到佢喎！响課室門口等左陣， 終於有 老師攞住份form黎叫Ambrose入去！課室入面共放左三組檯椅，同時間應該可進行三組面試。我地一坐低，個老師好似發覺檯上面嘅玩具麻麻地想換定想攞過，不過無同事幫到佢，佢又無自己去攞，就咁就開始面試！
個老師其實都幾奇怪，佢全程都好似諗緊野咁，唔係好集中，思想好游離咁，媽咪答完嘅問題，其實唔係好詳盡，但佢都唔會再仔細咁問，就咁就算，感覺都幾差！入課室前，晴晴媽咪話呢間幼稚園係最似面試，都幾考小朋友。不過媽咪見完就覺得唔係囉，似乎係最考家長就真，因為老師根本無咩考Ambrose！一入到去，Ambrose都有少少唔答人問題，只係顧住玩檯面上果座大大座嘅繞珠玩具，佢平時根本唔鍾意玩呢種玩具，無興趣架，今日佢又為左要玩呢個玩具，好罕有咁十問九唔應，唉！不過都算啦，老師都係咁問媽咪問題，其實都無時間理佢！最令媽咪覺得老師真係好游離嘅係當媽咪坐左一陣，亦都對答左幾句之後，老師竟然問媽咪小朋友係見K1呀？嘩！唔係麻？佢咁高，唔通見N咩？有無攪錯呀！所以經過呢個問題同睇到老師好唔集中咁，就已經覺得間學校麻麻咁，媽咪自己都無咩心機答囉！早知都係同Ambrose瞓吓覺算喇！
老師問媽咪嘅問題，其實都係圍繞住讀緊一間點解要轉過黎讀，媽咪完全無預備，只係好直覺話因為間學校無學卷，所以要轉囉，誰不知個老師話佢地學校都review緊，唔sure一定有喎！真係俾佢拋窒，即時唔知點兜好！唯有話而家呢間係全英普，而Ambrose遲講野，所以媽咪想佢foucs多d响母語先，至會想同佢轉校！媽咪講完都覺得講得幾差，係咪真係有人咁樣諗野架，明明大家都好追棒英普，偏偏呢個媽咪咁講野， 都唔知 老師信唔信喇！重要其實呢間雅麗斯都係英普幼稚園，只係唔係全英普啫！其 後 老師都有問平時生活嘅野，都係幾簡單，但又無啦啦問媽咪知唔知佢地幼稚園嘅教育理念同課堂模式，真係有少少驚囉！因為媽咪完全唔知咩教育理念，之前都無諗住會黎，又無諗住區內幼稚園都會問呢d野，人地出面果d都無咁問，完全無諗過要準備！不過媽咪開放日時已經問過上課模式，知道係每日都有一節時間係上英文同普通話，咁媽咪就膽粗粗話自己知道同埋清楚，因為開放日時已經問過老師喇！咁答完之後，老師竟然無追問媽咪知d咩，又跳左落第二條問題度，好奇怪！
至於Ambrose，老師都有問Ambrose返學果度老師叫咩名，其實平時Ambrose一定識，佢成日講住架啦，點知佢掛住玩唔答人，媽咪開埋聲問佢都唔答，真係好罕有！重要佢無啦啦玩繞珠玩到成串珠連埋左一齊，自己開心到指住果串珠話“毛毛蟲”？真係唔知俾佢激死定笑死呀！老師俾左d積本佢叫佢叠高，當然Ambrose無問題啦，重要老師只係响個籃度攞左幾件積木俾Ambrose叠，可能只係求其見佢ok就算，點知Ambrose叠完老師俾佢果d，佢就自己伸長隻手去個籃度攞埋其餘果d黎叠，都唔知係貪玩定為左佢之前差嘅表現攞番d分show off吓！叠完高，老師攞左籃入面粒大星星出黎問Ambrose係咩，Ambrose答到，老師再問係咩色，粒星係黃色，媽咪諗住今次實無死啦，因為平時Ambrose咩都話黃色架麻，今次重唔開口中？點知佢竟然攞左粒星再拚埋去其中一粒繞珠話“一樣”，唉！老師讚佢嘅，不過媽咪覺得如果答到係咩色會好d囉，顏色配對實在唔難架麻，識都好平常啫！再之後，老師已經無咩野問喇，只係同媽咪講Ambrose幾叻，都唔知真定假！
不過媽咪對於呢間都無咩期望喇，見老師嘅態度都好奇怪咁，唔知係咪已經收夠人都係循例見吓我地定點啦！同埋老師都有問媽咪如果上午班無考唔考慮下午班，老師講嘅時候已經好支吾，俾媽咪覺得好似已經無哂上午位！媽咪當然一口拒絕啦，無上午唔會諗下午啦，一句時間就唔到就算，反正見Ambrose表現又唔係咁好，而且老師又奇奇怪怪咁，都係無行架喇！費時又話考慮下午又俾個下午班黎，到時又煩留唔留好，索性堅決d要上午班，有就有，無就無啦！
