收到email，呢間幼稚園又係收左Ambrose為下午正取生，唉，重咩又係下午架，已經係連續第三間收下午班，個天係咪都唔想Ambrose轉學校，所以間間都只收下午，迫住佢讀番而家呢間幼稚園呢？
講番呢間先，收到email前其實諗住Ambrose都係一半一半機會，點解？因為雖然當日Ambrose答顏色係錯哂，不過成個過 程同 老師有亙動，無話當人無到，有問有答，叫搵顏色又好努力搵，重有醒左個超可愛嘅笑 容俾 老師，真係罕有！講真，媽咪對於佢嘅表現已經滿意喇，起碼佢唔係一舊飯坐响度唔理人又或者望都唔望人自己玩丫！當日面試之後，亦有同同事講起，同事都話咁細嘅小朋友，老師都問唔到d咩，亦都唔expect佢地識好多野，面試其實只係睇吓小朋友嘅反應，坐得定唔定，同老師有無亙動交流，呢d先至緊要，至於顏色答錯哂又覺得唔係咁重要，返學本來就係求知識，如果咩都識哂就唔使返學啦！聽落又真係有d道理，換著自己係老師，都希望教嘅小朋友有反應，唔會十問九唔應，唔會坐唔定要捉雞仔捉番埋位坐多過教學。當日Ambrose就完全做到同老師亙動及交流，亦可以坐定無要周圍行，最尾其實老師都有問媽咪，如果上午無位會唔會考慮下午班，當時一心諗住九龍塘學校咁難入，下午班都唔荒易入，所以答左無所謂。
估唔到，憑Ambrose當日嘅表現，真係收左入下午班！雖然有講話下午班一般都易入d，不過媽咪又覺得九龍塘啟思唔同區內學校，區內學校下午班就話易入，但九龍塘嘅學校，好多人都會誇區報名，所以申請人數一定比區內學校多，要响咁多人之中入到下午班亦唔係咁易，所以媽咪知道Ambrose收左入下午班，都有少少沾沾自喜，哈哈！
不過啟思一直都唔係媽咪杯茶，當初報呢間都係應爹爹要求，佢話同事仔女都係讀呢間幼稚園，話好好，而且之後讀到d勁學校，所以雖然媽咪一直都唔鍾意啟思，但九龍塘啟思，就當係媽咪有少少虛榮啦，都報埋一份！一心都唔諗住入讀，加上申請人數眾多，媽咪都無諗過入到，爹爹亦曾打趣話如果入到呢間，下午班都照仆出黎讀，點知真係俾佢講中！爹爹知道左之後就話一定要留位，但媽咪又覺得呢間唔係咁心水，加上又遠又係下午班，留位費要六百六，真係白俾咁，所以都討論左一陣留定唔留！最重要嘅係黎緊九龍塘啟思退出學卷計劃，上年學費都只係二萬四有學卷，黎緊果年就要三萬八無學卷，俾得呢個價錢，似乎又可以好多選擇咁！至少而家Ambrose讀緊果間唔使呢個價，又近，又係英普學校！如果只係因為九龍塘個環境好，校舍靚而選擇出到咁遠讀，好似好唔理智咁！明明屋企樓下都有一間啟思都唔去考，如果課程係相同，咁果三萬八真係超唔抵囉！
不過，始終九龍塘有佢嘅吸引力，至少果頭校風好d，家長質數亦高d，小朋友嘅學習環境亦都好重要，所以暫時我地都未決定留定唔留，反正呢度十九號至deadline交留位費，重有時間諗吓做吓research先至決定！
沒有留言:
張貼留言