面試@梁李秀娛幼稚園

根德園之後，就係16:00嘅梁李秀娛幼稚園喇！本來媽咪諗住都見左咁多間學校，呢間攞申請表係排隊先後決定上午班表定下午班表，而我地無去漏夜排隊，所以攞番黎份申請表已經係下午班！下午班嘅話，之前高德根有offer都無留位，保易近在樓下又已交左留位喇，我地又prefer上午班嘅，所以諗住呢間見黎都無咩用咁，收左咪又係唔留位，今日已經去左四間幼稚園，算係功德完滿啦，唔去都唔緊要！加上Ambrose見完根德園上車回程時又已經瞓左覺，媽咪驚太辛苦佢呀，不如早d返屋企抖吓好過啦！不過爹爹話既然無咩特別，已經係今日嘅最後一間喇，Ambrose每每上車都爭取到時間休息，爹爹覺得問題不大喎！

 

不過因為根德園太有效率，見完再入返屯門都重好早，梁李又見四點咁晏，所以Ambrose又可以在車上瞓呀瞓，瞓到差唔多夠鐘至起身去面試，都瞓到個幾鐘，幾好丫！

 

媽咪未去過呢間學校，一心諗住學校在公屋內，又咁多年歷史，所以對校舍又無咩期望，諗住都係又舊又細架喇！點知去到又覺得學校雖然唔及而家讀緊果間咁大咁新，但以二十年歷史黎講，真係光鮮得唔似咁耐囉！爹爹同媽咪都對學校校舍新淨整潔度有讚無彈！哈哈！入到學校登記左之後，就可以玩住等面試，真係唔錯！Ambrose見到一個上落樓梯嘅台階，行上又行落，好開心咁，啱哂佢啦，佢平時一見到要行樓梯，扭緊要抱都一定會肯自己行，所以佢由頭到尾都好專一咁玩呢個台階，無行去玩果d檯面玩具！

 

玩左一陣之後，有老師行左過黎話可以面試喇，同老師行左入課室，唔，間課室都幾大，入面計埋我地都只有兩組人同時面試，實在幾好，唔會太嘈，環境感覺好舒服！之前呢間幼稚園要排隊攞申請表，已經好多人漏夜排隊架喇，之後又有人話呢間面試都幾難，會問十條問題，要答全對先有機會收，唔係掛，唔好話答全對啦，肯答哂都已經係萬幸啦！不過都係果句啦，呢間都係無壓力下去見嘅，無所謂啦！

 

父母可以一齊入課室，今次唔使諗邊個同Ambrose入嘅問題！一開始，老師已經話午安喇，Ambrose無反應，媽咪估計，Ambrose應該唔識應午安囉，因為好多時候都係講早晨，超少時間講午安，所以可能佢唔知點回應，媽咪幫佢一把，就叫Ambrose要叫老師喎，咁佢就識叫老師喇！講完之後，老師都好快進行面試喇！首先係問咩名啦，幾歲啦，男仔女仔啦，無問題丫，呢d差唔間間都問，無咩特別，亦都預左！Ambrose一一都答哂，唔使push！之 後 老師攞左份圖形手抓板出黎，老師攞起哂所有圖形之後要Ambrose自己入番哂入去，圖形手抓板Ambrose一歲鬆d已經玩緊啦，所以對於佢黎講係無難度，不過因為識玩左好耐反而好耐都無玩喇，媽咪一見到嘅時候就有少少擔心，但Ambrose快快手咁入d圖形，好暢順，真係好叻囉！係最後佢攞住個正方形想放入菱形度，轉極都放唔入，要媽咪開聲提佢望一望重有無其他位未入，佢先發覺到原來重有個正方形，咁就又係快快手入埋個正方形同菱形喇，表現好好！之 後 老師攞左一張bb相出黎，問Ambrose眼睛、耳仔同嘴仔响邊，Ambrose又係即問即指出位置，完全唔使push，真係好勁，哈哈！之 後 老師又攞左兩張交通工具嘅相出黎問Ambrose係咩黎，媽咪簡直好恨老師唔再攞d難d嘅出黎問，因為交通工具簡直係開正Ambrose至叻果瓣啦，而老師只係攞左巴士同輕鐡出黎問，真係無難度！問完又攞蘋果、香蕉同橙道具出黎，問Ambrose係咩黎，之前去九龍塘啟思見到蘋果都唔出聲，其實Ambrose係識，唔明點解唔答人，今日保田問過一次都無問題，好彩呢間再問都答到，叻！問完之後，老師俾塊神奇畫板俾Ambrose畫，就轉而開始問家長問題，其實都係一般日常生活問題，有無敏感，有無特別病，平時邊個湊，最奇嘅係老師問媽咪，大肌肉訓練老師會帶學生出去出面籃球場上堂有無問題喎，媽咪完全唔明呢個問題係咩問題，反問老師咁其實有咩問題點解要問出去上堂有咩問題，哈哈哈哈！老師解釋可能小朋友有病唔適合戶外活動，所以問一問喎，原來係咁！最後問完一輪，老師攞左本Twinkle Twinkle Little Star書送俾Ambrose，送嘅時候不忘問Ambrose上面幾粒係咩形，Ambrose連呢條問題都答啱埋，真係唔可以唔俾個服字佢呀！

 

一出門口，爹爹已經忍唔住同媽咪講Ambrose超掂呀，點解可以叻到咁，有問必答重係答啱哂，唔使提唔使催，答嘅時候又唔使諗，乾淨利落，真係好叻仔！爹爹話唔使諗啦，呢間收硬喎！媽咪話呢間嘅下午班都應該好多人報囉，唔係話Ambrose唔叻，媽咪都超滿意佢嘅表現，不過媽咪唔敢話其他小朋友做唔到囉，因為其實問題又真係唔太難，應該同齡小朋友都識哂架喇，只係肯唔肯答嘅問題啫！所以媽咪都叫爹爹唔好咁樂觀，始終呢間真係超hit嘅學校麻！同埋其實上次見保易時，Ambrose都一樣咁叻架，有問必答，唱歌做動作，都係因為媽咪tick左一格下午都考慮至連累到Ambrose咁叻都被收入下午班，世事嘅野真係難料架！

 

題外話，老師送果本Twinkle Little Star書正正就係媽咪較早前同Ellen姨姨一齊團購所送嘅書，而媽咪又正正選左Twinkle Little Star，媽咪一出課室門口已經同爹爹講話已經有一本一模一樣嘅書喇，見檯面其實有一本係I’m a teapot，唔知可唔可以同老師講換過一本呢？爹爹話如果有梗係可以問啦，二話不說就誤打誤撞問著個校長，校長重好好人咁即時叫人同我地換本書，真係太好喇！老師攞過另一本書俾Ambrose，順手又問Ambrose書面果d係咩黎，老師真係有所不知，Ambrose晚晚都好鍾意用teapot沖涼架，佢又點會唔知果d係teapot呢？又係二話不說咁答老師“teapot”， 全埸 老師同校長都讚叻，哈哈！媽咪當然超開心啦，Ambrose真係超好表現，媽咪真係好後悔唔早d幫Ambrose排呢間學校，排番份上午班嘅申請表，而家見得咁好都無用啦，收極都係下午班，唉！不過呢間幼稚園送嘅呢本書真係重本，哈哈，媽咪交左果三十蚊報名費真係回本喇，真係好開心呀！