重點面試日前夕

11月5日呢個重要日子，媽咪一直都好緊張，因為Ambrose將要一日內去六間學校面試，而呢六間學校之中有好幾間都係媽咪比較心儀嘅學校，呢一日真係不容有失！先唔諗Ambrose表現得唔得，又或者行程咁緊密我地又趕唔趕得切，純粹只係諗呢一日Ambrose能唔能夠無病無痛、正正常常咁去面試已經令人緊張！根據過往經驗，凡係d重要日子之前，如果Ambrose知道左之後就一定會病，好似上次去新加坡，出發前一日發燒流鼻水；生日正日諗住去廸士尼都可以响臨出發執緊野時發現佢發燒，林林種種，爹爹同媽咪係唔會之前同定Ambrose講d重大事情，免生枝節，迷信又好，點都好啦！

 

11月4日晚上，媽咪收工回家同Ambrose玩，媽咪發現佢個身好似暖暖地咁，即時同佢量體溫，點知一量係37.4，未至於發燒嘅37.8，但已經算幾高溫啦，因為平時佢嘅體溫都只係36.X，過37已經要alert喇！懷住緊張嘅心情，媽咪一路食飯一路擔心，唔通真係咁邪？唔通個天都想Ambrose留番响新一代，點解好似諸事不順咁？見Ambrose都叫精靈肯玩，媽咪一直都希望佢嘅體溫好快回落，媽咪至怕半夜瞓著時先高燒，咁就真係麻煩喇！朋友們建議不如都係食定退燒藥先，不過媽咪又覺得唔係真係發燒無啦啦餵藥又好似唔係幾好咁！所以媽咪只有乾等！

 

夜晚臨瞓，Ambrose一直都係keep住37.x未到發燒度數，爹爹陪Ambrose食奶就瞓，點知過左一陣就聽見爹爹大叫，原來Ambrose嘔奶，成床都濕哂！Ambrose細個都成日嘔奶，不過都係比較細規模嘅，好似今次嘔到一床都係嘅，就只有幾個月大一次發燒時試過。媽咪見到一床都係嘔吐物，頭都痛埋，一來煩要清理，二來又更擔心Ambrose今次真係病起上黎，真係次次都咁啱！

 

好辛苦先攪掂哂間房同床俾Ambrose瞓，因為第二朝都要早起身，唔想咁嘅狀態加上唔夠瞓，表現會差上加差！好彩Ambrose都快瞓著，不過媽咪就成晚無覺好瞓喇！半夜時，媽咪起身同Ambrose量體溫，一量竟然已經38.2喇！發燒喇！點好呢？整醒佢食藥佢一定又會喊，第二日可能無精神；唔食藥又驚一路燒上去，一個面試都去唔到重衰，真係兩難！爹爹又瞓到死豬咁，想問佢意見都唔得！最後，媽咪唯有自己決定，先同Ambrose貼左退熱貼先，再晏d睇吓有無好轉至決定食唔食藥啦！

 

一瞓之下，已經係第二朝，都唔使晏d睇吓點，哈哈！好彩Ambrose似乎都退到燒，係有少少攰同扭計咁囉，同平日一起身又笑又叫又跳就真係差咁d架喇，不過叫可以去到面試先！有一刻媽咪突然間睇化左，命裡有時終須有，命裡無時莫強求！明明已經好小心，明明已經安全咁去到決戰前夕，就只差少少，都可以病，如果個天係想Ambrose讀到呢幾間其中一間，點解又再要俾咁多考驗佢呢？眼見Ambrose狀態一般，媽咪反而開始有悉懷，覺得點都好啦，做父母要做嘅已經幫佢做左，之後佢條路要點行，就要靠佢自己喇，有d野真係係你嘅就係你，唔係你，你點努力都得唔到！