面試@聖公會青山聖彼德堂兆麟苑幼稚園

九點鬆d見完聖公會青山聖彼德堂幼稚園，第二場面試係十點嘅聖公會青山聖彼德堂兆麟苑幼稚園，揸車過去話咁快就到！重諗住有成四十五分鐘時間，去大快活食個早餐先，時間啱啱好，點知大快活超多人，要等位！湊住Ambrose要搵三個位，係好有難道，結果都係放棄啦！直接行入去兆聖門口，嘩，都幾多人吓，响門口前面有個大圓休息設施，有d人都坐响度等，啱啦，我地烚左蛋俾Ambrose，索性就坐呢度俾佢食，大人唔食住都捱到，細路唔食就唔得喇！撞到Kula姨姨同天天啱啱見完，佢同媽咪講係五個小朋友group in，大人小朋友入左房後有小屏風分開坐，基本上只係隔一隔大人同小朋友，但係大家係見到嘅！小朋友有小朋友同老師亙動聽故事答問題，大人就坐埋一邊答問卷同老師會問野，全程真係超快，佢話五分鐘咋喎，只係聽到小朋友唱左首生日歌，其他都唔知咩事！聽完之後，媽咪就已經諗住叫爹爹同Ambrose入去喇，因為老師要問家長問題，都係俾口才好少少嘅爹爹入去穩陣d咁！

 

响門口一路等，見到真係好多人，不過爹爹話呢個門口有個咁大地方可以坐，好好喎，第時等放學好方便，嘩哈哈！終於都入到去，响一入門口附近登記攞番張form同名label就行入課室喇，不過Ambrose個中文名其中一個字打錯左，同老師講佢又好似好為難咁，見其他同組小朋友都行緊入去，媽咪唯有話算啦，個老師就話係啦，其實唔睇名，睇號碼喎！都唔知係咪，如果只係睇號碼，點解個名超大，個號碼超細放角落頭？實情只係老師見已經夠鐘又夠人入房面試，臨急臨忙唔知點再印番俾我地啫！揸住張錯名label行入去會合爹爹，爹爹話梗係要出聲啦，隨即同個帶隊老師講（其實都唔知係老師定義工，個樣好細個之麻），之 後呢個 老師再搵黎另一個老師問，咁老師見到個貼子同份form個名個形都差好遠，都忍唔住話唔得，字形都唔同，再整過啦！就係咁，呢個老師好好咁跑左去幫Ambrose即時手寫過張新label，算係同間學校補番少少印象分啦！

 

一行五個小朋友同大人入左去六號房，房間出面有窗口，另一個家長其實可以响窗口睇哂入面情況，只見Ambrose一坐低，爹爹就行開左去坐大人果邊，其實兩者相距幾近，只有十尺內嘅距離，又可以見到，但Ambrose一坐低就破口大喊，大聲問爹爹呢？大聲程度係媽咪响出面都聽到佢嘅喊聲，媽咪個心即時已經涼了一大截，所謂一喊即out，都唔使諗有offer啦！爹爹即時去安撫Ambrose，係就係可以令佢收聲，不過個個小朋友都無喊，又唔使家長痴住，係得Ambrose寧寧舍舍要爹爹陪住响隔離，媽咪諗其他响門口嘅家長見到都笑喇！唉！都係媽咪嘅錯，平時同Ambrose入課室都好地地無問題，上次去見保易坐Ambrose後面，佢都無野，今次爹爹陪入就觸礁，媽咪真係唔應該俾爹爹陪入，媽咪完全無諗過平時Ambrose痴慣爹爹，爹爹陪入而分開坐會令佢咁不安同大喊，真係失策！

 

有爹爹陪住，Ambrose都安定左，老師開始攞左個紙板人仔出黎，聽爹爹講，老師要小朋友同個紙板人仔講早晨，不過唔知點解無人講，連爹爹本來對Ambrose有信心，Ambrose都無講！之後都唔知問左d咩，都係爹爹之後同媽咪講，老師話開生日會，有個盒攞出黎問小朋友入面有咩，有d小朋友有答，有d無答，Ambrose係有答果個！之後好似話要小朋友唱生日歌，爹爹話無人唱，even老師lead住唱都無，細問爹爹，原來係唱中文版生日快樂，怪得知Ambrose唔唱啦，佢都無咩聽過中文版，九成九時間都係聽同唱英文生日歌！之 後 老師送禮物，要小朋友講多謝，Ambrose有講！爹爹講唔哂問左d咩，只係話Ambrose答問題表現並唔係最差果個，唔答果d全世界都唔答，人地有答果d佢都有答，而有其他小朋友係Ambrose有答果d無答，所以爹爹話呢part其實Ambrose表現係幾好喎！咁都係嘅，起碼佢去到個陌生環境要同爹爹分開已經好不安咁喊，但好快已經收聲，無lur地無狂喊，重要老師問問題都可以答到，雖然唔係全部有答，但肯答已經好好喇！爹爹話老師同佢講，喊係唔緊要喎，唔知係真定係安撫爹爹喇！

 

不過爹爹差唔多全情都照應Ambrose，佢無同家長果 邊個 老師傾計，完全唔知果邊講咩，唔知會唔會因此有影響就真！同埋，老師問完野之後，係由得小朋友free play，果度有廚房玩具，其他小朋友都行黎行去，雖然唔係話好投入去玩，都總算有行過入個corner度攪吓d玩具，但Ambrose就走左埋去爹爹度攬住爹爹大脾企响度睇其他人玩，完全一步都無行入去同人玩，真係無佢符！網上流傳呢間學校其實收生係抽籤嘅，但都要面試合格先有資格抽籤掛，睇黎，Ambrose呢間有無offer都真係要靠奇蹟喇！

 

呢間學校，爹爹同媽咪完全無參觀過，上網都知校舍算係區內之中算大，今日黎面試得以睇到真面目，真係唔錯，課室好歸一，而且都幾大，走廊好濶，完全可以當成條走廊係indoor playground，outdoor playground都幾大，而且當日唔算好有陽光，outdoor playground位置都好光猛。六號課室行前少少有個小草坪，有唔同植物，算係outdoor playground一部份，親親大自然，真係唔係間間學校有咁好嘅環境，爹爹同媽咪都好鍾意呢個校舍，呢間學校口碑又係區內數一數二，大把人恨入呢間學校讀，唔知奇蹟會唔會發生响Ambrose身上呢？