Discount School Supply Part II

好多謝表姨媽幫手買Discount School Supply，原本諗住打攪左表姨媽一次，又買左咁多心頭好，無諗過會再打攪佢多一次，點知因為之前Ambrose生日買左盒Lego House俾佢，入面有d人仔，媽咪見Ambrose好鍾意攞住d人仔玩，本來只有爹爹媽咪一個女仔加個bb，媽咪另外再買左兩盒細盒嘅補充埋爺爺嫲嫲，再買多一盒basic嘅lego補充埋Ambrose（因為之前個bb只可坐不可企，唔可以用黎代入Ambrose呢個角色），結果買買埋埋都唔少錢，而且要一盒一盒咁買先至有人仔，真係好煩！結果媽咪又响Discount School Supply見到有一set淨人仔賣，其實係俾學校教小朋友唔同人種角色／職業，但媽咪旨在要人仔啫，所以又心郁郁想再買囉！

 

及後因為開學再做八折，所以媽咪又走去麻煩表姨媽多一次喇！今次買左呢d野：

 

1)   Lego Duplo World People Set - 16 pieces

人仔本來有world people set同community people set可選擇，community people set係職業，重要20 pieces賣平world people set一蚊，不過最後媽咪都係選左world people set，因為職業果set好似好多都係police咁，而且有d係construction worker咁上下樣，為怕製服同香港唔同又要解釋一番；又見world people set有大人又有細路，又有唔同膚色嘅人仔，好似好過community people咁，起碼如果搵Ambrose嘅朋友仔代入d公仔，都有d細路人仔麻，所以貴少少都係買world people set，彈性大d咁囉！Ambrose都幾好記性，媽咪是但講左邊個人仔係邊個之後，佢隔左成個星期都重記得！果日11月5日唔知點解佢攞左Ellen姨姨出黎同佢去面試，超攪笑！

 

2)   Color Paddles Set of 3

色板，俾Ambrose自己揣摩吓咩色加咩色係咩色，因為媽咪都唔多識，哈哈！

 

3)   Easy Grip Sea Life Stampers 3" set of 14 上一批買左咁多stamp pads，不如又睇埋stampers啦！一睇之下，就見到呢套sea animals，好cute呀！呢期Ambrose好鍾意睇魚，又鍾意八爪魚同大白鯊，所以一見到呢套stampers就覺得好啱Ambrose呀！同埋之前响反斗城買過差唔多樣嘅easy grip stampers，一個要十幾蚊，相比之下，呢套stampers計埋稅圍番都只不過係幾蚊咋，超抵！唔買真係唔得呀！媽咪都未影得切相就俾Ambrose發現左呢套新野話要玩，所以有幾個玩過有少少色囉！哈哈！

 

4)   Alphabet Stamping Cubes Set of 7($8.99)

之前响廸士尼買左盒alphabet stampers，不過印仔細細粒，同Ambrose玩左幾次覺得都係大印仔好玩d！加上套印仔每個英文字母都跟住隻卡通公仔，如果想做手工咭仔想串字，好似又無咁靚，上次整爹爹張生日咭已經有經驗喇，所以都想買套大少少嘅俾Ambrose玩，呢個成個cube咁，好揸手丫！同埋廿六個英文字母如果個個都大大個印，真係唔知有無咁多地方擺喇，而家七個cubes就有齊哂廿六個字母，慳好多位呀！

 

5)   World Animals Rubber Stampers Set of 16

呢套動物stampers响特價區果度見到，一見到又係覺得好啱Ambrose，雖然動物圖案唔係公仔cute樣，比較真實，不過Ambrose由細到大都鍾意動物，亦係睇慣真實動物樣，所以無問題！重要呢套stampers特價完都照可以再八折喎，成套重要有十六個咁多，超值！表姨媽話落完order之後就已經發覺呢套野discontinued喇，好彩買到，哈哈！

 

6)   Colorations Jumbo Washable Classroom Stamp Pad

買左咁多stampers，又忍唔住買埋呢個stamp pad，因為市面上真係無咩咁大個嘅stamp pad，買開野都係買埋啦，唔使煩麻！一盒有齊哂六隻色，唔使吓吓一盒一盒stamp pad開哂出黎玩，方便d！不過呢盒要等Ambrose大左懂事d先俾佢玩喇！唔係佢一定同媽咪將印仔印完呢隻色直接印落第二隻色度，浪費左呢個stamp pad喇！

 

7)   Colorations Eye Stickers - 2000 pieces

呢卷眼仔貼子好得意！之前同Ambrose做手工都成日用到wiggle eyes，見佢有時d功課都要貼吓眼睛咁，貼wiggles eyes又令本書突起哂，咁貼貼子就唔會啦，第日再同Ambrose玩手工都有多個選擇麻，所以見到d眼仔咁得意，買！

 

8)   4 Best Value Jumbo Washable Watercolors Set of 6 Refills

呢盒watercolors係特大隔架，專俾幼兒用，容易d點枝畫筆落去，真係幾好設計，因為香港果d真係細細隔一隻色架咋！同埋呢隻只有四元色，可以俾小朋友自己溝色，四元色點都夠啦！如果唔想吓吓開哂一杯二杯顏料出黎，呢個應該都幾方便，只要少少水整濕枝畫筆點落去就可以有顏色喇！啱哂媽咪有時攰攰地又想同Ambrose畫畫用啦！不過呢套全部都係refill，無專用盒裝番，畫筆位係無連畫筆，即係就咁四色一盒，呢個價錢，無咩所謂啦，又係圍番十蚊唔使一盒，抵抵抵！