我錫番你

Ambrose係一個從來都唔會做窩心舉動嘅小朋友，佢打你，你同佢講好痛，佢反而响度笑；你嬲佢，怒啤佢，佢會完全無視你，可以自己繼續走去玩；你話唔理佢走左去，佢重走得快過你！Ambrose就係一個咁樣嘅小朋友，唔會見你唔開心佢會唔開心；見你痛會呵番你，有時候媽咪諗，係咪女仔先會識氹人呵人，男仔唔會呢？

 

九月尾一次同Ellen姨姨同浠浠落樓下十蚊店行街，响俾錢時媽咪唔小心自己踢到自己隻腳，不自覺講左一句好痛呀，點知浠浠即時“烏”低身錫番媽咪，真係令媽咪意外，亦都好羨慕Ellen姨姨有個咁令人窩心嘅仔仔。果刻，媽咪同Ellen姨姨講，Ambrose從來都唔care，有時重會笑添，唔知幾時Ambrose先識錫番媽咪。

 

十月中後某一個周末，媽咪一個人湊住Ambrose一整日，真係無停手！媽咪响廚房行出黎時又踢到腳，即時痛到坐左响地下，Ambrose見狀，即時走埋黎，同媽咪講“我錫番你丫”，隨即用手掃兩下媽咪喊痛嘅地方，再“烏”低身錫左媽咪一啖，真係開心到媽咪暈低呀！之後幾日，每當媽咪叫痛，Ambrose都會同媽咪講“我錫番你”！呢個仔終於開始識關心人喇！