面試@保良局田家炳幼稚園

去完聖公會青山聖彼德堂兆麟苑幼稚園面試，之後就到11:45嘅保良局田家炳幼稚園，不過由於見完兆聖時間尚早，爹爹決定先返一返屋企抖一陣再出發去保田。唔知Ambrose係咪因為喊過，佢竟然响回程途中瞓著左，十點幾咋喎！不過都好啦，今日面試得咁密，真係要爭取時間休息，表現最好至得呀！為左等Ambrose瞓得耐少少，媽咪就陪佢响車度瞓，爹爹就上樓處理其他事務，直到十一點四五至開車過去保田，Ambrose大大話話都瞓到九個字至一個鐘左右，真係唔錯！

 

去到保田嘅時侯，浠浠同雅雯已經到左喇，大家一齊响outdoor playgroup玩，不過就好曬，媽咪好擔心剛退燒無耐嘅Ambrose會好易曬到發燒，但學校又真係太細喇，無咩其他地方係有遮蔭，而且因為太多人，都真係無咩位企！時間一到，老師已叫家長在課室門外排隊等侯，睇黎咁多人一齊，都係group interview！都好丫，有浠浠同雅雯响度，Ambrose應該可以好快warm up到！

 

課室門口終於都開左，所有考生只可由一名家長陪伴入課室，經過之前兆聖嘅慘痛經驗，都係由媽咪陪Ambrose入去好d啦！課室兩個corner位都放有軟墊，一邊放有滑梯同大搖搖魚，另一邊放有軟膠積木，兩個corner中間無軟墊嘅就放有玩具廚房，老師响人聲嘈雜嘅班房入面大聲向家長講可以同小朋友除鞋入軟墊度玩，老師會不時過來傾談，會係面試一部份。於是乎，媽咪急急同Ambrose除鞋，其實真係好混亂，課室又唔係大，同一時間全部家長除鞋入細細嘅軟墊area度，又要睇實自己小朋友唔好整親其他人，又要保護自己小朋友唔好俾人撞到！媽咪見咁多人，都不斷鼓勵Ambrose去玩搖搖魚，坐左上去都唔使玩滑梯又要行上行落同人迫丫麻，哈哈！好彩Ambrose不嬲都鍾意搖搖魚，所以佢都第一時間行左上條魚度玩！坐唔夠一分鐘，已有老師行左埋黎喇，老師問Ambrose叫咩名同埋幾歲，Ambrose都答到，係細聲少少嘅，無法啦，個課室真係好嘈，聽到少少都已經叫好啦！之 後 老師問Ambrose男仔定女仔，Ambrose好醒咁答“Boy！”，老師都話佢好醒，哈哈！之 後 老師就話同佢玩搖搖魚，其實老師係想同佢搖，不過Ambrose就唔多肯囉，老師一個身位攝埋黎想用手搖Ambrose，Ambrose已經第一時間企左起身想走人，哈哈！老師見狀就話不如去另一邊軟墊度玩啦！

 

媽咪唯有推Ambrose過去另一邊軟墊度坐低（因為人多媽咪完全唔想行開同人迫，又怕Ambrose唔捨得條魚），老師首先攞左道具香蕉、橙俾Ambrose，問Ambrose係咩黎，Ambrose答“orange”同埋“香蕉”，又中文又英文，哈哈！一路問緊嘅時候，又有其他小朋友攞住隻蘋果、柑黎騷擾Ambrose，老師都要用手隔開個小朋友，真係好亂！老師再要Ambrose俾橙媽咪，俾香蕉老師，佢都一一做到無問題！再攞左隻碟出黎問Ambrose係咩黎，Ambrose答到係碟，之 後 老師要Ambrose擺生果上碟度，雖然隻碟超細，生果又好大，Ambrose都無問題！呢part嘅問題同九龍塘啟思勁似呀！之後係砌軟膠積木，老師要Ambrose根據佢嘅指示叠高積木，嘗試左唔同嘅叠法指示，Ambrose一律都無問題，之 後 老師就叫我地繼續玩，佢就離開見其他人喇！其實真係好嘈，又多人，真係唔太有心機同Ambrose响果度玩，只係想快d走，好彩嘅係Ambrose無比個咁嘅環境分到心，所有問題都有問有答，有指示都即做，唔使叫幾次，所以呢part面試真係快得好緊要！

 

過左一輪，老師應該同哂所有小朋友面試，所以開始宣佈要家長著番鞋，圍半圈坐椅子，唉，又係同一時間要著鞋，又係一片混亂，無椅子坐低著鞋，坐地下又好似阻住人咁，半蹲咁同個仔著好鞋，都攰到死咁濟，同 時間 老師又不斷催促家庭快點過黎坐低，真係唔知想點咁！坐低之後，剛巧Wing姨姨同雅雯坐Ambrose左手邊，都好，有個朋友仔响隔離好d嘅！之不過，媽咪右手邊個小朋友就坐唔定又扭計，對腳不時踢埋黎，又嘈又叫，媽咪真係好無奈！

 

圍半圈坐低其實係group interview，首先要小朋友企起身盡量行出黎，開左首Head, shoulders, knees and toes，老師又唱又做動作，Ambrose怕羞，係都要挨住痴住媽咪，頭一round都係睇人唱同做動作多，不過都唔係好多小朋友有跟做就真，之後唱到第二round，佢自己竟然行出左兩步跟住做動作，重要攪鬼到一路做一路擰番轉頭望，好似好得戚自己好叻咁，哈哈！啱啦，後面就正正企左頭先獨立面試個老師，佢見到Ambrose擰轉頭笑呀！之 後 老師攞左個波波出黎，要小朋友一個傳一個咁傳個波，原本以為雅雯係朋友仔，應該無問題，點知雅雯唔肯傳波俾Ambrose，要老師開口叫Wing姨姨幫一幫手傳，好彩Ambrose收到個波又無咩野，好快又傳俾右手邊個小朋友，不過右手邊個小朋友一早已離開左個位周圍行，Ambrose一路望住人好想人接佢個波，個家長又勁叫個小朋友都無反應，索性自己接左，總算順利傳波啦！傳完波，老師每人派左一個一樣嘅波波俾小朋友，大家面試完畢，可以走喇！

 

時間關係，媽咪都無時間同Wing姨姨Ellen姨姨詳談就走左喇！之前對保田有好好嘅印象，只係嫌佢校舍細左d，今日面試完，扣分啦，面試咁樣安排好亂囉！媽咪覺得咁樣玩住面試幫到小朋友輕鬆d係好，不過可唔可以唔好咁多人一group咁樣入去呢？如果少d人，大家都無咁迫，又無咁嘈，感覺會好d囉，媽咪感覺自己好似入左街市咁，又迫又亂又趕咁，真係無咩好感！加上之前見個outdoor playgroup真係好曬吓，雖然話吸收陽光係好，不過又真係好猛烈，又無咩遮擋咁，好似又差左d囉！而且爹爹見完都話呢間學校位置麻麻，唔多鍾意呢度，但以Ambrose嘅表現，似乎呢間收嘅機會都幾高，真係要好好考慮係咪要交留位費喇！