11月5日，今日schedule要去六間幼稚園面試，第一間係8:40嘅青山聖彼德堂幼稚園。之前一晚Ambrose無啦啦發燒，無叫醒佢食藥，只係同佢貼左退熱貼，今朝起身，張退熱貼都唔知甩左去邊，好彩同佢量體溫，已經退左燒，不過始終係不明原因發燒，好驚佢今日咁頻撲捱唔住又燒番上去！所以，媽咪暗自決定早上三間區內嘅幼稚園點都要去架喇，睇Ambrose起身情況唔太差都應該應付到，而下午果三間幼稚園，如果真係太辛苦就放棄喇，都係果句啦，命裡有時終須有！
八點半左右到青聖，比起上年見N班九點時多人，估唔到八點幾時段都有咁多人黎見，證明上午班一般都適合幼兒，哈哈，十個有八個小朋友都晨早起身，早過父母返工呀！原本諗住早少少到學校warm up吓，Ambrose出發前已經不繼話要去“sir梯”，但去到之後又要去排隊報到，一報到 左就有 老師帶入課室開始面試，無機會玩喇！
面試可以父母同入，所以今日媽咪爹爹同Ambrose就一齊入去，真係唔錯！首先老師當然又係問咩名幾歲，Ambrose有答，無問題！檯上面擺有兩份玩具，一份係膠砌片，另一份係一座木嘅入圖形玩具，媽咪見到膠砌片頭都痛埋，唔係又要問顏色吓麻？定又問係咩黎？媽咪真係唔多識玩呢d玩意！好彩，老師只叫Ambrose入圖形，不過佢就睇左一陣Ambrose玩，就轉而同媽咪傾計同填一份問卷，由頭到尾都無咩點望Ambrose！老師重話今日面試都係causal talk，唔需要緊張，同上年見N班一樣，無考d咩，只係傾計，唔知會唔會其實已收夠人，面試只係做吓樣呢？Ambrose响媽咪同老師傾談期間自己不斷入圖形，重將果d積木叠起成三條高柱，叠好 後叫 老師睇佢，真係好笑！老師讚Ambrose小肌肉好好，可以叠到咁高，Ambrose聽到好似好開心咁！由於已經得到老師留意，Ambrose又無啦啦指住積木上一面圖案話係太陽伯伯，媽咪覺得佢好叻仔，自己响度show off，哈哈！之後佢重叻，指住個圓形積木話係“circle”，又係老師無問，自己講，不過當老師問佢咩色，佢就無出聲，不過算啦，見老師都唔係有心想問佢咁，應該唔緊要掛！
老師不斷問媽咪有無野問佢，其實我地都坦白同佢講上年見N班時已經問過了，亦都因為有兩個表姐响度讀，都幾清楚學校，所以無咩問題，雖然如此，媽咪都勉強搵左d野問老師，好似英普上堂比例，下午班英語加強模式同上午班嘅分別，同埋觀課嘅安排，都算係表現到媽咪對學校嘅認知同誠意丫！傾 談期間 老師再問表姐响度讀，叫咩名，爹爹同 左 老師講，點知原來老師K2時教過大表姐，完全知道大表姐同二表姐係邊個，所以佢都明白我地點解無咩問題問佢，哈哈！爹爹不停同老師講Ambrose同兩個表姐關係好好，咁真係事實，而我地上年報N班又無位落左waiting，所以K1都番黎再報。之後，爹爹當面問Ambrose表姐叫咩名，Ambrose又能夠講到表姐中文全名，好醒！唔知係咪因為咁，老師抽番之前填好嘅問卷出黎，响親屬為本校畢業生生一欄中填左大表姐個名落去，算係有5%分加啦，不過都有寫明係表姐弟關係，係咪真係有分加入去就唔知喇！其實上年見N班時老師都有寫落去，最尾咪又係收唔到去左waiting，所以媽咪見老師話寫埋落去都無咩太大感覺，因為覺得好似幫助唔大！
傾左一輪，都無咩好傾喇，Ambrose又再撩老師玩，佢伸手入圖形個孔到，引老師用手指响另一邊點佢手指仔，玩左幾下，開心到佢丫，哈哈，難得老師又同佢一齊玩，呢間學校d老師，係媽咪去左咁多間學校之中最nice嘅一間，上年面試已經係，今年見另一個老師亦同樣nice，果然名不虛傳！老師最後送左一隻上鏈龜俾Ambrose，Ambrose選左橙色，唔知爹爹係咪覺得老師無咩考過野咁，所以又問Ambrose龜上係咩圖案，Ambrose答左八爪魚，之後爹爹再問英文呢，Ambrose再答octopus，叻仔！唔知老師頂唔頂得住我地，咁show off都有，哈哈！bye完一次又再講左一陣，再bye多一次我地先至捨得行番出去！
當然出左去之後，爹爹就俾Ambrose玩左陣outdoor playground先啦！呢間見完都無話有咩太大感覺，始終唔似其他學校咁面試feel，真係傾計多，Ambrose自己表現自己果d又唔知計唔計分，所以見完之後真係完全感覺唔到有幾多把握囉！不過老師都有話Ambrose唔抗拒面試唔抗拒老師而且都幾定咁，但又有問Ambrose係咪慢熱，唔知老師點諗呢？
呢間結果會兩星期內通知，都幾耐吓！
沒有留言:
張貼留言