交表－聖公會聖彼德堂幼稚園

聖公會聖彼德堂幼稚園，區內有三間分校，不過媽咪一直都對兆麟同青山村分校有興趣，兆麟分校更係區內非常受歡迎嘅一間幼稚園，而青山村校舍比其他大，競爭亦無兆麟分校激烈，而且兩個表姐都响呢間讀緊，各有吸引力！

 

由於呢兩間幼稚園又係安排在 十一月五日 面試，Ambrose當日行程真係緊密到不得了，兩間幼稚園都係 十一月一日 開始交表，所以如果想盡量去哂所有幼稚園面試，真係唔可以靠個天安排喇！所以媽咪一早攞定 十一月一日 放假，諗住幫Ambrose早d去排兆麟分校交表，務求早排有多d面試時間可選擇，就到本身已經好緊迫嘅行程；而另一間青山村分校，因無兆麟分校咁激烈，加上爹爹原來返夜要一號早上先放工，媽咪諗住交完兆麟分校至再過去交埋呢間！

 

十月三十一日，媽咪重病到死死吓，返左半日工都頂唔順下午早走諗住返屋企瞓吓抖吓，養足精神第二朝晨早去排隊。點知返到屋企同爹爹傾完，爹爹傾向將青山村申請表交俾同會去交表嘅風叔叔一齊交，咁樣比起媽咪交完一間再去交另一間早，都啱嘅，兩間都係區內比較心水嘅學校，真係不容有失。但同時間要分頭交兩間學校申請表，要有兩張出世紙正本，所以媽咪原本諗住瞓覺，都要起身過銀行保險箱攞埋另一張出世紙出黎至得！就係咁，媽咪又要撲出去攞出世紙，順手又睇埋醫生，返到屋企已經五點幾，無咩時間休息！另一方面，爹爹亦病埋，佢去左睇醫生攞病假，即係話 十一月一日 佢係可以幫手交表。但當媽咪話攞份表俾風叔叔時，佢又無講咩野，所以媽咪諗住爹爹一定係病得好嚴重，唔諗住幫手交表，所以一心都諗住自己去交一間，風叔叔幫手交另一間。

 

十月三十一日晚七點鬆d，有朋友whatsapp媽咪兆麟分校已有幾人排隊喇，真係唔明，點解交表都要咁早排隊，唔係派表喎而家，真係離哂譜！爹爹知道之後已經即時話過去排通宵，但媽咪反對，因為大家都病到死死吓，又點可能响街捱通宵丫，爹爹自己本來要返夜都頂唔住要病假，真係無理由相信佢可以响街排通宵，重辛苦過返工架麻！嫲嫲又提議輪流去排，接力排到第二朝，不過媽咪都反對，覺得有無搞錯，交表真係無理由要咁排法，又唔係早交一定收，係都唔怕排，最慘唔係，重有傳聞兆麟分校係抽籤收生，媽咪唔想為左早d可以面試但又只係抽籤收生而投資咁大人力落去，結果爭論完一輪後，媽咪決定等晏少少Kula姨姨經過再望一下情況係點先至決定。

 

晚上九點幾，Kula姨姨打俾媽咪話已經有十幾人在排隊，不過好多人都係只擺張椅子，上面貼有小朋友名字同埋所排嘅號碼，就咁放張椅子當排隊，所以Kula姨姨叫媽咪盡快拿兩張椅子同文具過去排隊！當然，爹爹負責揸車飛過去啦！真係估唔到媽咪都會做埋呢d野，漏夜排隊交表，重要放椅子。而家先明為人父母，真係為左個仔咩都會做！搞掂哂，今次全靠Kula姨姨，我地排十九同二十，都真係好前吓！擾攘一陣之後，媽咪都要返歸喇，走時已經排到三十幾四十人，真係唔簡單！

 

呢一晚，媽咪真係超攰，個人已經病到無咩力，但又擔心張椅子被人掉左，張名紙俾人換左，瞓好耐先瞓得著！原本諗住七點鐘過返去排隊，但爹爹比媽咪更早起，無講任何野自己出左門口，哈哈！不過佢攞漏左出世紙，媽咪七點鬆d都飛的士過去照應爹爹！去到兆麟分校門口已經有好多排左椅子嘅人都到哂，不過人龍並唔係想像中咁長，媽咪都有少少唔開心架，有d幸災樂禍嘅心態，哈哈！媽咪食埋早餐，爹爹就過去青山村排隊，分頭行事！

 

媽咪一直等，一直等，個人已經病，再加上夜瞓早起休息唔夠，真係有d頭暈，但係已經排到咁前，真係要苦苦支撐至得。原先重為左人龍唔長而唔開心，但隨住時間嘅過去，排到九點時媽咪已經見唔到龍尾喇！同時間，爹爹報告青山村排前十個之內，估計爹爹會先取得面試時間，所以大家都決定如果可以選擇，青山村最好安排在九點左右，而兆麟分校就十點鬆d左右。

 

九點正，人龍終於有所郁動，開始收表喇！到呢一刻，媽咪心跳加速，因為唔知爹爹嘅進度係咪真係快過媽咪，媽咪好驚排完一輪，兩間學校派出面試時間係一樣就慘喇！一個一個入去交表，媽咪心跳已經去到極點，真係數唔到有幾快，期間重不斷打俾爹爹問果邊情況，睇黎爹爹雖然排得比媽咪前，但收表進度好慢，所以大家應該交表時間相約，真係急死人！媽咪煩惱緊究竟先讓後面幾個媽咪交表好等爹爹出左時間先交表，定係一於跟先前約定左十點就十點，照交左先呢？真係生死時速咁，媽咪無讓人，都係直接交表先，當份表一遞上檯時，媽咪收到爹爹來電問，八點八至九點有無問題，當然無問題啦，即收線！

 

呢邊箱，只見個肥婆姨姨處理份申請表，木口木面！媽咪一邊等待，一邊聽見隔離counter個姨姨好好咁問家長，小朋友面試九點有無問題，媽咪諗，原來都會問我地有無問題，咁真係幾好！加上Kula姨姨交表先，同媽咪講可以改時間，所以媽咪一心以為肥婆姨姨處理完之前會問媽咪有無問題先至出接見證。點知，個肥婆姨姨一黎已經出左張接見證俾媽咪，叫媽咪跟個時間黎面試，媽咪一睇，九點鐘，真係撞到正一正！媽咪即時同肥婆姨姨講可唔可以另一個時間呀？點知個肥婆姨姨好似好勞氣咁話我地面試時間去順住排落去架喎，無得改！媽咪其實响等緊期間都見到其他人派嘅時間唔係九點就十一點，都諗緊係咪只有呢兩個time slot，如果九點要去青山村，咁都只可以係十一點啦！媽媽見肥婆姨姨咁衰，自己病到死咁濟都咁頻撲黎排隊，為嘅唔係諗住早交會有機會俾上午班，只係求早交有多d時間可選擇，可以避免同其他面試撞埋一齊啫，所以媽咪即時同肥婆姨姨講，唔係呀，隔離counter都有問家長九點鐘有無問題啦，你都無問我！肥婆姨姨聽到都嬲架，講左句唔知咩野，媽媽見佢肯收番張接見證，即時再講多句唔該你啦！肥婆姨姨好不情不願問媽咪咁你想幾點呀，媽咪見佢問得，即係可能唔係只有九點同十一點啦，所以媽咪問十點得唔得呀，肥婆姨姨一直唔出聲，無答媽咪得定唔得，之後就大大力悔氣咁掉呢樣整果樣，擺到明勁不滿媽咪啦，媽咪沉住氣唔敢黑面，一日都未改張接見證，一日都唔可以發脾四同黑面！肥婆姨姨大大力整野宣洩不滿，最終都幫媽咪改左去十點鐘，媽咪都不忘再講多句唔該，滿心歡喜行出去，會合Kula姨姨狂數呢個死肥婆！真係唔知咩人，Kula姨姨前過媽咪交表，都覺得呢個死肥婆黑口黑面！媽咪交完份表真係把幾火，晨早流流，媽咪咁辛苦排隊交表，一早俾人發脾氣，真係嬲呀！大佬，媽咪排二十，有兩個counter同時收表，個肥婆最多都只係收左十份表左右，咁快就已經咁燥，後面條人龍大大話話都二百人左右，真係有排佢燥喎！

 

嬲完一輪，之後去接Ambrose放學，撞到同學仔媽咪，大家講開呢間兆麟分校，原先媽咪以前就已經聽過呢間學校d老師甚至校工都勁寸，可能唔憂收唔到學生啦，半信半疑之下，今日自己就親身體驗過校工有幾惡喇！點知同學仔媽咪都即時有同感，又係話打去學校問少少野都俾人寸到飛起，有不愉快經歷！同學仔媽咪都有報呢間學校，不過佢就話間學校收都要諗吓去唔去讀，因為覺得小朋友係模仿大人，間學校d校工咁，驚自己小朋友都學到無禮貌呀！媽咪聽到都覺不無道理，雖然呢間真係好多人報好出名，如果真係收左Ambrose，唔知佢會唔會學到好囂張，當然呢d都係收左先再慢慢諗喇，take note先啦！