面試@根德園

14:15，根德園！已經放棄左劍鳴，但都係梗梗五分鐘前到達根德園，真係一額汗呀！已經知道根德園會問家長問題，之前一直都預定係由爹爹陪Ambrose入去，因為媽咪口才一向唔多得，面試成日都講多錯多，為免拖累Ambrose，都係想爹爹同佢入去。但經過今朝兆聖嘅經驗，爹爹媽咪都好擔心，因為根德園，真係一喊就無行架喇，如果今次又係爹爹入去而又攪到Ambrose喊，邊個擔當得起呢？之不過，要媽咪响無心理準備之下入去面試，又真係好大壓力，d問題媽咪完全未諗過點答，又唔知答咩先得體，真係好驚！爹爹媽咪直到入學校門口一刻，都未決定到由邊個同Ambrose入去好，爹爹當然想媽咪入去，但媽咪又無膽囉！不過最後，媽咪都係覺得自己入去Ambrose可能表現好少少，頂多媽咪答得唔好，唔會太扣分掛，硬著頭皮入去啦！做人父母就係咁架啦，為左個仔，好驚都要去架喇！

 

之前無去參觀過根德園，今日都無咩機會詳細睇到學校係點，不過值得一讚係門口校工超盡責，面試只可一家長陪入，爹爹抱住Ambrose一個箭步行左入去，媽咪想跟住行入去都俾個校工截停左，真係O哂咀！媽咪想俾份接見證俾爹爹，校工都唔俾咁濟，好彩爹爹擰轉頭望媽咪見到媽咪被截咋，佢自己行番埋門口度，哈哈！所以呢度保安真係唔錯！

 

上網見人話呢間幼稚園面試分男女，又真係幾好喎！同年齡嘅女仔，發展係比男仔好架麻，講野都叻好多啦，佢地面試一定係著數d，再加上如果係大b女，Ambrose呢d細b仔真係唔使爭啦！所以媽咪對於呢個安排真係覺得好好，起碼感覺上都公平少少丫！

 

入到學校，果然真係分左男女咁排隊。首先排入一間房報到，攞番份申請表，之後就輪坐椅子等入去面試。之前上網見有人話面試同邊間邊間撞左期，又問遲少少去見得唔得，媽咪今日就眼見一個原本約左一點半嘅家長，起碼兩點三打後先至黎到，但學校都好好俾佢地入黎排隊面試，重要個家長完全唔知要預備回郵信封，咩都無攞黎，老師都係好好人叫佢過對面房買番，其實封信已經有講要預備d咩去架啦，個家長咁都唔知，唔知咁樣又會唔會有分扣嘅呢？唔知係咪因為已經係下午少d人定呢間學校真係如傳聞中咁有效率，真係等唔夠幾分鐘，已經到Ambrose喇！

 

老師引領我地行去課室某處，不過又真係好得意，課室間隔有少少奇怪，好似幾間課室斜斜打通左咁，去到最入嘅角落頭，有兩個幾後生嘅靚女老師等緊我地！Ambrose坐低之後，當然佢就唔係好識主動叫老師啦，都係媽咪提佢叫老師咋，都叫好過無啦！由於之前保 田 老師送左個波波俾Ambrose，Ambrose超鍾意咁一定要揸住，媽咪排隊時已叫Ambrose俾番媽咪袋住先都唔肯，真係頭都大埋，入到去見到老師佢都重揸住，係坐低叫 左 老師之後，媽咪再同Ambrose講要袋番個波波先可以同老師玩，老師都一齊開口叫收起個波波先，Ambrose先至俾個波波媽咪袋番，唔知呢度計唔計分呢？！好彩Ambrose都算係合作，都叫做合作，一叫都無扭擰就俾媽咪，就算真係計分，都唔會扣太多分掛？！

 

面試正式開始，兩個老師分別同媽咪及Ambrose問問題，由於媽咪要答問題，所以完全唔知道究竟另一個老師要Ambrose做d咩玩d咩！呢邊箱，老師都係問番d好standard嘅問題，平時邊個湊Ambrose，平時同Ambrose玩咩多，點解選佢地學校，諸如此類咁，不過每答完一條就好快跳落下一條，基本上係流水作業咁問，老師唔會就媽咪嘅答案再細問或有follow –up，唔知係好事定壞事啦，好係可能媽咪答完就算，好易過到關，唔使再應付follow-up問題而答到口啞啞；唔好嘅係以媽咪嘅口才，可能一答就麻麻地，其實可能需要further develop個答案先會好d，唉，算罷啦，唔諗得咁多喇！

 

老師問完媽咪之後，媽咪終於可以睇吓Ambrose究竟玩緊d咩，見到檯上面其實有動物puzzle，Ambrose無咩玩puzzle經驗，媽咪一埋檯見到呢份玩具時都有d擔心，唔知佢地有無玩到呢？媽咪只係見到老師叫Ambrose玩一份圖形配對板，一份六個圖形，底板係黑線條圖案，老師俾彩色圖案俾Ambrose做配對，當然，Ambrose一d都無問題啦，呢份玩具同平時玩開嘅SpecialLuk概念都係一樣啦，重要簡單d添！玩完配對就差唔多完，見媽咪嘅果位老師突然問媽咪我地住咁遠，將來諗住點返學，媽咪真係打左個突，不過媽咪即時已經話會搭校巴，老師就話校巴好似唔會cover到咁遠，媽咪已經好即時好決斷咁同老師講會搬去校巴沿線嘅地方，咁老師就响份申請表住址果欄度寫明我地係會搬屋嘅！問完之後，老師話送個陀螺俾Ambrose，問Ambrose可唔可以唱首歌俾老師聽，呢個真係今次面試嘅戲肉，之前上網媽咪已經知道係要小朋友唱歌仔，以Ambrose性格，真係無咩可能會肯唱架喇，媽咪都搏一搏，氹佢話個陀螺好好玩，不如唱太陽伯伯啦！首歌當然都係媽咪成日同Ambrose唱嘅歌，而Ambrose又係唱得最清楚果首啦！點知老師一、二、三完想話同Ambrose一齊唱，Ambrose無唱，媽咪都幾心急，再鼓勵Ambrose試吓啦，唱完玩陀螺啦，Ambrose都係咪咪笑唔出聲，呢個時候其中一個老師都放棄話唔緊要啦，媽咪情急就話不如我地都係唱ABC song啦，媽咪再拍住手同Ambrose一齊唱，今次Ambrose終於都開金口唱歌喇，真係好驚喜！媽咪之前其實已經唔抱希望佢會肯唱架，因為以前個個星期同Ambrose上playgroup，佢都從來只係得個睇字，好少會唱歌做動作，見呢間學校前知道一定考唱歌都已經打定輸數，但點都試一試啦，唔係考都唔去考就後悔喇！雖然Ambrose都唔係主動唱歌仔，要媽咪push左幾次先唱，但媽咪已經非常滿意，超級開心喇！

唱完歌仔，攞左個陀螺，Ambrose當然開心啦！老師俾番份申請表媽咪要媽咪攞過去坐門口果位老師度就走得，聽人講，呢part都係考緊個小朋友，其實老師係expect小朋友攞過去架，所以即使老師無講，媽咪好自然咁收番個陀螺，俾份申請表請Ambrose幫手攞過去啦！當然，臨走推椅子呢個動作又唔少得啦！Ambrose攞到過去老師度時，老師正在忙緊整理申請表而無見到Ambrose，Ambrose又唔識死就咁fing份申請表上張檯度，好似好無禮貌咁，媽咪即時同Ambrose講要等老師見到佢望住佢先至可以遞俾老師，呢個 時候 老師抬頭見到Ambrose，Ambrose又順勢遞埋份申請表，大功告成！最後就係傳 聞中 老師俾糖喇，好多人都話唔好睇少最後呢part，計左分都唔知，其實真係唔知係咪，咁複雜都有？不過既然咁多人講，媽咪都唔敢怠慢，好彩Ambrose攞糖前望一望媽咪，好似要得媽咪允許先得，媽咪就叫Ambrose攞一粒再多 謝 老師啦，Ambrose照做，再加多句拜拜，perfect！成個面試連埋排隊頭尾都係半個鐘，真係好快，好有效率！

 

走嘅時侯又係另一個門口走，今次爹爹好醒，已經响後門入緊黎接媽咪同Ambrose！重有嘅係呢間學校個後門，已經企滿哂好多傳單人，一等我地出門口，好多人塞哂d傳單俾我地，勁呀！其中有幾張真係幾有用，就係保母車服務，以前重諗緊係咪人人出九龍塘讀書都要搬出去至得，原來唔係，校巴唔到，都可自己搵保母車服務，又真係另一個辦法喎！都係攞定d資料，或者會有用架！