面試@劍鳴幼稚園

見完保田之後，下一場面試就係九龍區嘅劍鳴幼稚園，時間係13:10。原本諗住時間都剛好，但保田面試11:45，見完時已經近12:25，又係午飯時間，一定要去食野先，大人唔食，Ambrose都要食啦！

 

求其去左間茶餐廳坐低叫野食，點知Ambrose又無咩胃口，無咩點食，氹又唔食，餵又唔食，媽咪都諗住自己食完，如果Ambrose唔食就由佢啦，要走喇，不過當媽咪話埋單要走，Ambrose又喊住要食佢碗粉，唉！但佢喊住話要食，到餵佢時又扭扭擰擰咁，時間本身已經好緊迫，又無預Ambrose咁扭擰，真係失預算喇！由於呢餐唔食，可能又要等到好晏先有時間食，咁攪法可能Ambrose成日都無野落肚咁濟，又唔係好得喎，所以媽咪見時間真係太緊迫，唔想攪到自己咁tense，最後決定唔去劍鳴面試喇，反正上網見人話呢間係收番自己嘅N班學生先，所以其實唔係太多位，既然都唔係咁多位，時間又唔係話好鬆動，都係算啦，輕輕鬆鬆食埋餐飯至出去啦！

 

就係咁，呢間已經填好哂問卷攪掂哂回郵信封架喇，最尾都要放棄喇！今日最失策嘅係，媽咪以為今日行程好緊湊，八點幾出左門口之後唔會有時間返屋企，所以叫左嫲嫲唔使燉粥，因為都趕唔切攞出門。但點知原來見保田前係有時間返一返屋企，如果有粥嘅話，咁見完保田之後就可以上車餵粥，大人可以求其買個包食都得麻，咁就唔使坐低食咁浪費時間啦，真係失策喇！