今日收到信，Ambrose收左下午班正取生，真係好愕然，媽咪以為佢當日咁好表現，如果每組得一個人可以選入上午班，咁Ambrose一定入到，但竟然收信係入左下午班，不期然又覺得原來呢個世界真係處處有黑幕，如果唔係有黑幕，點解面試得咁好都可以入唔到上午班？真係好失望！
收到信後，即時打俾其他當日有份去面試嘅朋友仔，得出黎嘅結果係，浠浠收上午班，雅雯收上午班，Linus收下午班。之但係根據面試後大家討論，浠浠响課室外已經同老師有問有答，表現幾好，但入課室 後無同 老師講早晨，同埋開頭無答老師問題，係之後先至開始warm up暢順；至於雅雯同Linus，大家都話兩個表現相約，都係答到只有自己先聽到，同埋都要push幾次先答問題，而佢兩個係同一組，相信都有少少競爭性；咁相比起Ambrose當日表現，媽咪可以話係完美，由頭到尾對老師提問有回應，即時對答唔使push，答到既清楚又大聲，真係無野可以彈，點解咁好嘅表現，竟然只收下午班，其他朋友仔無咁好，都入到上午班呢？
媽咪知道唔同課室可能老師俾分有唔同，不過事實Ambrose表現真係好好，照道理真係無得點扣分，加上事前Linus媽咪話住同一屋苑有分加，又加上Wing姨姨有同佢家姐講聲我地幾個小朋友會去面試，已經疏 通 老師俾分手鬆，媽咪見到Ambrose表現咁好，唔靠呢d傍門左道，都已經好有信心入到呢間。浠浠入到上午班，媽咪唔會感到意外，因為佢本身都talkative，笑容又可愛，即使開頭未warm up夠而未有回應 老師，之後暢順嘅表現一定可以收服失地，加上可能佢果組無咩突出表現嘅小朋友，所以佢入到上午班都唔出奇！奇就奇在雅雯同Linus表現相約，大家事後都話答得細聲到只有自己先聽到，咁雅雯入到上午班，好大可能同佢姨媽嘅人脈關係有關，兩個只能要一個，一定係雅雯啦！媽咪諗極都唔明，點解Ambrose入唔到上午，真係深深不忿！唔係因為媽咪好恨入呢間學校，而係覺得Ambrose咁好表現都入唔到，呢間學校究竟以咩黎做收生準則？
之後媽咪同各媽咪傾開，原來媽咪同Linus媽咪都係選左無上午班，下午班都會考慮，浠浠同雅雯就只選左上午班。而Linus媽咪原來事前都靠人脈幫手，回應係如果選左無上午都考慮下午的話，無人幫到佢，學校係會收左下午班！媽咪一聽到事實原來係選無上午考慮下午會自動入左去下午班，真係嬲到死咁濟，咁同媽咪一早只選下午班有咩分別呢？咩叫無上午先考慮下午呢？佢咁收法咪即係我地點都唔會入到上午囉！
第二日，媽咪上forum睇，見到原來有好多人都係選左無上午都考慮下午而真係收左入下午班，咁證明，如果學校真係咁樣收法，即使當日Ambrose表現幾好都好，只因為媽咪一時錯失選左下午班都考慮而直接讓賽，俾其他表現無咁好嘅小朋友插入左上午班，媽咪真係越諗越覺得唔抵囉！
又嬲又不忿，雖然明知呢知世界從來都無公平，不過事情發生响自己身上，又真係好難好理性！其實呢間學校從來都唔係媽咪心水學校，只係因為近屋企，媽咪諗住報左作大後備，in case將來屋企有咩問題，呢間近近地又係保記，都不失為好選擇。經過開放日一役，原本已經唔係咁心水嘅學校，再打折，真係唔多想入呢間學校讀，而家咁樣收左入下午班，就好似俾人打左一把掌咁，媽咪其實已經唔會再想Ambrose去呢度讀！
無奈，爹爹同嫲嫲都覺得呢間近，下午班又唔係就唔到時間接送返學，保記又係有質數嘅學校，現時手上又無其他offer，留左呢間，萬一將來有咩變動，都可以有多d選擇！所以媽咪點不忿，點唔甘心都好，終究都去左交留位費！
沒有留言:
張貼留言