收到信，呢間收左Ambrose下午班，唉，點解收親都係下午班架？雖然呢間面試前己講明下午班！呢間真係無心插柳，見人報媽咪又走去報，點知老師打黎話我地已經係三百以外，都唔知係幾多百喇，所以只有下午班，媽咪為左唔好浪費已寄出嘅回郵信封，所以下午班都決定去玩吓，當熱身！點知面試時間安排在平日，重要係晏覺時間，真係唔多想去，係爹爹覺得反正報左，點都去試吓啦！咁反正媽咪點都係要返工，又係爹爹湊去面試，由得佢啦！
聽爹爹講番，Ambrose面試表現其實真係一般，最叻都係答到我個名叫ｘｘｘ，同埋分到唔同動物跟做動作，咁都收左佢下午班，真係好出奇！不過上網有媽咪話，當年小朋友面試時，又係好多家長不斷响後面提小朋友答問題，叫小朋友答老師ｘｘｘ啦，佢話呢d小朋友反而最後無收到，收左佢個女，而佢係完全無push無提個女，由得個女順其自然，真係又幾似爹爹當日面試嘅情景！爹爹又係覺得係咁叫小朋友答家長已講出黎嘅答案真係無咩意思，反正又唔係志在必得，所以爹爹都無push Ambrose答，由得佢，當攞經驗，唔知係咪真係因為咁，老師比較欣賞而收Ambrose呢？哈哈！
呢間學校網上都有講，亦都幾受歡迎，當初派表都有人龍，限派三百份上午班申請表，下午班二百，而媽咪無去排隊，只係download後寄去，保守估計呢間學校收過六百份申請表！雖則下午班少人去讀，但只收一班k1，一班收32人，咁多人報，Ambrose能夠考入呢間，即使係下午班，其實都算唔錯架喇！
不過由於又係下午班，雖然爹爹去過呢間學校感覺都唔錯，但既然已經有一間近在樓下嘅下午班，而我地又唔係咁想Ambrose返下午班，黎緊又有咁多間學校要面試，總有機會吧，所以最終都係決定唔留位喇！
沒有留言:
張貼留言