八月三十日，十二朝。
我一向都唔鐘意應酬，覺得好煩！Ambrose可能遺傳左我呢個特質！十二朝果日，奶奶果邊嘅親戚黎哂，我諗都連埋細路仔都有廿幾人响屋企，好嘈，d人重問我做咩唔返房休息吓，我心諗係想我休息就唔好黎啦，你哋成班人黎哂我又點好意思响房唔出黎呢？Ambrose好醒目，瞓呀瞓，攪極都唔起身，費時睬你班人，d親戚見佢瞓著左又唔敢抱佢，避過一劫！叻仔，哈哈！
2009年8月31日 星期一
甩臍帶
睇d書仔話臍帶都要出世兩週先甩，我覺得我都好好彩，小b七日就甩左！點解話好彩係因為之前我咩產前講座都無去，初生兒護理係零認知，生左第一日唔使湊小b，只係餵奶，姑娘會打點佢嘅野，第二日落得床就自己湊，不過因為我咩都唔知，唔知要同佢抺臍帶，所以都無抺，到第三日我出院小b去加謢病房，我就更加無得理，小b一住又兩晚，我諗醫院姑娘同佢沖涼都會整理佢啩？！接佢出院果日一頭煙，都無醒起要清潔，再之後果日我自己傷口拆線，個心只係記得個傷口點打理，哈哈！直到小b覆診，即係八月二十五日，小b除衫除片俾姑娘磅重，又poopoo又vivi，一片忙亂之中，臍帶終於甩左！
甩左之後以為即係收哂水，點知見佢肚臍裡面重有d黃色黏液咁，真係好驚係之前一路都無同佢護理所以攪成咁！打去健康院問又話留電話等覆，真係擔心死！點知最攪笑係第二日真係有姑娘覆電話俾我，語氣好似好熟咁，原來係Tweety，佢係我間健康院嘅姑娘，佢話做咩我唔直接問佢，我以為佢負責打針未必知，所以無諗起可以問，而家知佢原來都問得，好放心，起碼小b有d咩唔妥都可以問左佢意見先，唔使自己擔心太多！佢話d黃色黏液係正常嘅！八月廿七日，小b咁啱要返健康院，Tweety招呼我哋，簡直係VIP咁，好快攪掂，佢話小b肚臍收得靚喎！真係唔該哂Tweety！
小b覆診
八月二十五日，小b要返瑪麗覆診，我哋都有d擔心！
去到瑪麗，等左好耐都未叫名見姑娘，奶奶又講左好多次其他人遲過我哋都入左去，我都忟忟哋，咁我都無辦法架，迫住走去問個姐姐囉，後黎佢話因為入面有三個姑娘，我哋個file喺其中一個姑娘度排緊隊，果個姑娘睇緊前面果d耐左，所以我哋咪未到，其他人遲過我哋黎但入得去係因為佢哋睇個姑娘唔係我哋果個，同埋佢哋之前嘅b都快喎，即係話我哋去左Mcdonald咁，排正一條隊之前個人麻麻煩煩攪好耐都唔得囉！又會咁排法都有，點解唔係排銀行隊，真係唔efficient同唔公平呀！
小b終於入到去，姑娘又叫我除哂佢d衫同片做檢查同磅重，點知小b原來poopoo左，我同佢換片嘅時候又無啦啦vivi，攪到我一手都係，重要整到姑娘個位濕哂，幾唔好意思！
姑娘同佢check左手腳，又磅左重，由於收水關係，小b比出世時輕左30g左右，姑娘話正常，之後小b要抽血驗黃疸同鈣，因為係即時知報告，所以要响醫院度等，話要成個幾兩個鐘咁耐喎！不過最尾個報告返黎係pass，好開心！
之前做左情緒問卷，姑娘同我傾偈，知道我餵人奶有問題，佢叫我今日黎睇我餵人奶嘅姿勢啱唔啱。其實已經响選擇人奶同奶粉之間拉鋸左好幾日，都唔知繼續人奶好定奶粉好，人奶梗係好啦，不過小b同我都一定要suffer一段時間先可以適應到，一來我都唔知係咪真係捱到周圍嘅壓力，二來唔知小b可唔可以同我捱過呢段時間；奶粉係無人奶咁好，不過人人都話好多人都係飲奶粉大架啦，咪又係無咩野！見到小b飲奶粉好似舒服d，又好瞓d，都唔知邊樣先至係對佢最好！有時又覺得屋企人又唔係好support我餵人奶，老公又叫我夜晚或者小b扭緊嘅時候唔好試餵人奶，免得佢忟哂，佢成日話佢support我餵人奶，不過佢咁講我又唔覺係真，始終越俾得多奶粉佢食，成功餵人奶就越低，而且又有邊個b肚饑嘅時候唔扭呢？所以，餵人奶就係要狠心少少，同俾多d耐性，而我覺得無人認同我同支持我呢種諗法！
去瑪麗之前我都偏向放棄人奶，但係去到姑娘又教我同睇我餵，都無咩問題，佢重讚我姿勢啱哂做得好，小b又出奇合作無唔耐煩，姑娘就更加鼓勵繼續餵人奶，突然間我又覺得人奶又work喎，又覺得好有希望！不過現實係當我返左屋企，架部又無醫院擺得咁好，小b又唔知點解好忟，我又餵到痛哂累哂，心力交瘁，好無奈，我都好想俾d時間捱過呢段適應期，但係身邊嘅人又可以同我一樣咩？無人會出聲反對我餵人奶，但係一d好微細嘅說話、態度都會令我覺得根本無人想我繼續落去！小b出世都有六磅三，雖然體型唔大粒，但總算ok啦，但係d人成日都話佢細細粒，攪到好似係我陀佢陀得唔好咁，胎盤前置要開刀，又要早d出世，我都超唔想，咁嘅磅數，比上不足，比下有餘，我好唔鐘意人話佢細粒話佢輕，又話我點解唔自己生，好似我好自私同俾唔夠奶佢食，攪到小b好似好可憐咁！小b喊又或者忟可以有好多原因，我好唔鐘意人一見佢喊就話佢個樣好肚餓，咁又係唔係話緊我呢？又好似我開刀傷口會痛，餵奶又周身痛，無咩時間休息，不過我响醫院一個人一腳踢都捱到啦，我覺得自己得架喎，老公又會話唔想我咁辛苦，我覺得做人父母梗係辛苦架啦，想小b好辛苦少少都無所謂，點解唔明白我呢，係唔想我辛苦就應該支持我，有時都唔知係佢唔想我辛苦多d定係唔想小b辛苦多d！臨臨種種都令我好唔開心，究竟我應唔應該堅持落去呢？
2009年8月30日 星期日
拆線篇
之前响醫院嘅時候，聽到隔離床個病人同姑娘嘅對話：
病人：「吓，我個傷口唔使拆線架？」
姑娘：「係呀！條線自己會溶，唔使再返黎拆線架喇！」
病人：「係咪而家全部都係用溶線架？」
姑娘：「唔係架，一個個醫生嘅做法，有d都重會用拆線架！」
病人：「咁溶線個疤痕係咪會無咁覺呀？」
姑娘：「都係架！不過有d病人鐘意要拆線多d架，條疤會現d，有紀念性呀！」
病人：「咁又係呀，一生人可能都係生一次，留條疤痕做紀念都好架！」
聽完呢段對話之後真係吹漲，邊有人會想條疤咁現架，應該話邊有女人唔想靚架，佢就話係溶線唔憂啫，有無諗過其他人聽到有咩感受架？我個傷口一直貼住左膠布，又無人話我知我聯左幾多針，用左咩線？我都好想知，重要聽到溶線條疤會無咁現，攪到我好想知自己使唔使拆線！
出院果朝早醫生睇完我，佢話晏少少姑娘會幫我洗傷口，我好驚！我見傷口果塊紗布成塊都係血跡，唔知咁快傷口埋哂未，唔知會唔會好“拿”！
姑娘黎洗傷口，最痛果下係搣膠布！果塊真係強力膠布，我有時諗塊膠布都有少少support作用，起碼我覺得貼左個傷口無咁易因為我嘅郁動而拉扯得好緊要，就係佢咁強力，搣嘅時候姑娘又無就住就住，真係甘到爆！見到姑娘倒左d粉紫色嘅液體落棉花度，我諗係消毒藥水，諗住會好“拿”，但又無喎，好神奇！姑娘同我講話我要返黎拆線，唉，有無攪錯呀！我問佢傷口埋得好唔好，佢又話拆線先知喎！佢幫我book左過兩日返黎拆線！
八月二十四日，返瑪麗拆線。有時真係想像唔到個肚咁樣開一刀之後，都只係住三日兩夜就出院，跟住過多兩日就話可以拆線，個傷口真係會痴番埋架？！之前返贊育食糖尿餐，有個女人同我講佢第一胎開刀，返左屋企之後個傷口爆開左唔知，行到屋企成條血路，講到好得人驚，攪到一向都好驚開刀嘅我真係超驚！傷口爆開左會唔會跌d野出黎架！拆線果日心情都好緊張，我奶奶話唔痛，剪一下線頭就成條線“mon”出黎喎！我入到房瞓低左，姑娘唔係剪一下，係幾下，每剪一下就震一震，唔係話痛嘅，有d唔舒服同驚囉！姑娘剪完之後俾番d線我睇，都唔知點解，我都唔願睇，d線都只係好似魚絲咁，藍色嘅，原來d線唔係好粗，咁都可以聯埋傷口？姑娘同我講我聯左五針，我都覺匪夷所思，五針咁少，d線又唔粗，但條傷口都好長架喎，咁就得架嗱？！之後都係消毒，姑娘話傷口埋得ok（佢唔係話靚，我好失望！），係針孔位有d敏感，不過唔緊要喎！佢跟住攞左塊鏡照個傷口，好似人哋去髮型屋剪完頭髮俾塊鏡你照咁，好攪笑！唔睇由至可，一睇，嘩！真係好傷心呀！個傷口係一條長長嘅線，然後每針上下都有針孔，而d針孔有幾個附近嘅皮都好似損左，爛爛哋咁，好紅，好似科學怪人面上果條疤咁，好得人驚！再襯埋肚上面果d已經變到紅紅紫紫嘅肚紋，真係好大打擊！邊個話想留條疤做紀念架？痴線架？！
返左屋企有好幾日都唔敢同唔想去睇條疤，超sad，真係好核突，老公聽到我講好核突，話睇吓，我都唔係幾願啦，好嚇人咁！第日都唔知會唔會淺色d呢？著唔到三點式，自己照鏡都唔好嚇親麻！
拆線果日做左個情緒嘅問卷調查，其實响生左之後第一日做過一次！姑娘話我今次好高分，原來上次我七分，今次成十五分，越高分即係情緒唔好，所以姑娘都好似好緊張咁同我傾偈，睇我有無咩問題。雖然我唔知點解唔開心，好大原因可能關於餵人奶嘅問題，其他我都講唔出，硬係覺得情緒低落，提唔起勁，好易無啦啦喊，有d患得患失嘅感覺。
出院篇
開刀第三日就出得院，估唔到咁快！床位一定好緊張！原來開刀同順產嘅床係唔同嘅，開刀瞓果張床係電動，禁個製就可以較高低，成張一齊高又得，只係背脊位高又得，好鬼方便，換片時較到最高咪唔使“烏”低得咁緊要囉！順產嘅床係人手落床較架，幾麻煩吓！出得院等埋Ambrose血報告都成八點幾，我哋响張床度等攪手續，d嬸嬸已經係咁望住我哋，俾d說話我哋聽，成日都話14號（我個床位）出得院未走呀，呢樣果樣，攪到我哋都唔係幾好意思，不過都唔關我哋事，鬼叫d手續要做咁耐咩！
依依不捨送左Ambrose上特別護理留院，見到佢瞓暖箱，唔使著衫衫，好似好舒服咁，都安心少少！係時候要走喇！感覺怪怪哋！老公安慰話當Ambrose去度假，响醫院凍左幾日，而家瞓暖箱，又有好味嘅奶粉，有姑娘貼身服侍喎！又當俾自己放吓假，抖足精神之後湊Ambrose囉！
可能响醫院成日都聽到bb嘅喊聲，離開左醫院，响架車度，响屋企，我都成日好似聽到bb喊聲，好奇怪！呢一晚，我好累，瞓返自己張床，有d陌生，不過張被好舒服，好輕好暖，醫院果d，好重，重到唔想轉身！陀住Ambrose嘅時候只可以打側瞓，成日都好恨生左之後舒舒服服打平瞓返，到生左之後第一日，麻醉未過，一路都打平瞓，到過左麻醉之後，又驚整到傷口，個肚d豬腩肉又鬆到死，一轉身成舊肉一齊聚埋一邊，好唔舒服，所以都寧願唔轉身！响醫院平瞓左兩晚，俾我恨到嘅時候又唔係咁“盞”！唔知果“pat”肉會唔會收同幾時會收呢？真係幾驚，因為真係好鬆，如果一路都係咁都唔知點算！
Ambrose第一晚唔响身邊，真係好掛住佢，越諗又越忍唔住喊，老公話第二日早d出去探Ambrose，我都要儲足energy準備佢出院！
好彩特別護理嘅探病時間係朝九晚八，中間醫生巡房同交更時段唔探得，其實真係好好，咁長時間俾人探！我哋十二點幾出到去，點知醫生未巡完房，要等，我哋幻想緊陣間可能Ambrose可以出院！等到一點，終於入得去睇佢，一行入去就問姑娘Ambrose出得院未，佢話未，聽朝重要抽血驗，心都沉埋！一點鐘係食奶時間，姑娘俾我哋自己餵，不過我都未試過餵樽，雞手鴨腳咁，好快我就叫老公餵喇，餵左成半個鐘都未食完，姑娘都頂我哋唔住，出手餵喇，佢好快手，掃風又快，我都乘機睇吓點做，學吓先！
Ambrose出唔到院，我同老公都唔太開心，又擔心佢第二朝又抽血，佢已經左右手背同左右腳踝都抽過哂，貼哂膠布，好陰公！第二朝又抽，如果唔pass真係有排捱！唔知係咪荷爾蒙有改變呢，成日唔知點解d眼淚好容易流出黎，成日都會忍唔住喊，雖然都知唔好，但係都會無原無故忍唔住喊出黎，呢一晚，我又喊喇！
第三日，我哋諗住晏少少去探Ambrose，避開醫生巡房同交更，同埋朝早Ambrose抽血要等報告，太早去都無用！呢兩日我都好緊張d電話響，因為如果Ambrose出得院係會電話通知架！朝早十一點幾，終於有電話到，通知我Ambrose出得院，重諗住仆出去接佢，姑娘叫我三點先出去接出院，一收線，我已經跑出去同老公講，大家都好開心！
呢一晚，我又喊！Ambrose食左兩日奶粉，返到黎想餵返人奶，佢好忟，但佢又肚餓，係咁扭，老爺奶奶同太女麻都係咁話Ambrose食唔飽，又係咁要等埋我餵完奶先食飯，最尾重敲埋門問得未，我真係好嬲好down！
出世篇
Ambrose出世喇！因為胎教嘅關係，我哋一早已經幫小b改左英文名，方便叫佢！
自從响手術室同Ambrose分開左，到我出返去復甦區再到病房，我都無再見到佢，聽人講啱啱出世最好係盡快跟返媽咪同食人奶，所以好奇怪醫院點解咁耐都無俾返Ambrose我，我問姑娘，佢哋又話未有咁快，我有d擔心，陣間會唔會俾錯個bb我！
到左差唔多十一點幾十二點，Ambrose返黎喇，不過我下半身都未有返知覺，姑娘都係抱俾我喟人奶，之後就推返Ambrose去育嬰室。之後嘅果一日，差唔多兩個鐘至三個鐘左右，姑娘都抱Ambrose俾我，就連半夜時段都一樣！總之，唔係瞓覺就係俾人叫醒餵奶，再唔係就係姑娘黎check血壓體溫，我果一日真係累到死，全日都矇矇矓矓咁過。
第二朝早，見到人有早餐食自己無，真係幾sad，雖然吊緊鹽水都唔覺好肚餓，不過好似好耐無野落肚，真係好想食野，姑娘話等醫生同麻醉師睇完我先知可唔可以食野喎！同埋如無意外都要落床，諗到落床就驚痛喇！
眼見其他人都可以食野，我等左好耐都未得，到成十點醫生黎睇我，好大力禁我個肚，重話子宮收縮得幾好，嘩！禁吓就知，好神奇呀，不過真係好痛，話哂都係傷口，使唔使咁大力呀！之後姑娘話我食得野，問我要粥定粥水，我諗都無諗就話粥，佢都忍唔住笑，梗係要粥啦，重粥水？唔好喇啩？！
食完粥，姑娘幫我拆哂d喉之後就要我起身落床坐，有個嬸嬸幫我落床，不過真係好艱辛，首先係由平瞓要sit up起上半身先，床上有個吊環可以用手借力，不過真係要好用力先起到上半身，坐定左响床上再轉側落床，呢吓好難，傷口又痛，轉身都驚好痛，就住就住，雙腳落地果吓感覺d內臟全部聚番哂落黎咁，傷口當然痛啦，不過都忍到，床隔離有張椅子，一落床就坐落去，嬸嬸讚我叻，可以自己坐到！姑娘叫我第一次去厠所要叫人陪我，驚我暈低，不過姑娘話d麻醉藥過左同拆左尿喉之後好自然有急嘅感覺，叫我唔好急住行去厠所，因為好多人就係咁，好辛苦行到去厠所但係去唔到，又要好辛苦行返床等過，所以姑娘話坐耐d先，我好聽話坐左好耐，同埋搏命飲水，咁咪可以確定有vivi囉！到我真係好急要去厠所，行去厠所嘅路程唔太遠，不過對於啱啱開完刀落床嘅我黎講真係遠左d，唔行都重可以，一行真係扯扯痛！姑娘有個量杯要我去量有幾多vivi，我都唔知點解要咁煩，後來量左出黎有成600ml，嬸嬸就同個姑娘講話佢個patient（即係我！！）好叻，600ml，pass左喎，原來第一次vivi都係一個考驗！
落到床之後，原來係無人再理你！姑娘推返Ambrose俾我湊，餵奶、換片都係自己攪掂！第一次換片，條片邊度前同後都分唔到，彎住身响床邊換，傷口又痛，腰又痛，Ambrose又郁黎郁去，我都唔知點好，其他人又無話有問題咁，我都唔好意思叫姑娘幫！食人奶要食得好密，幾乎兩個鐘一次，之後Ambrose又會poopoo，又要換片，換片中途又會射vivi，啱啱先換左塊新嘅片，又整濕哂，vivi攪到我一手都係，又要行去厠所攞過d衫仔同Ambrose換，我一行開又好擔心佢會唔會跌落床，其實應該擺返佢去床仔，不過我太雞手鴨腳，唔識抱d咁軟林林嘅bb，所以都係盡量抱少d，安全d啩！朝早姑娘同Ambrose打左卡介苗，唔知係咪因為咁，Ambrose好扭計，幾乎一放低就喊，我真係好累，餵奶，換片，換衫，抱瞓跟住又好快又餵奶，換片，換衫，一個循環！成日就係咁湊佢，無停過，就連自己去厠所都唔得閒，嬸嬸派餐都無時間食，甚至乎我都唔記得自己係未洗過面刷過牙！一路到半夜，我累到忍唔住抱住Ambrose响床上坐住瞓，嬸嬸見到重鬧我好抱住佢瞓，佢怕我瞓著“線”左Ambrose落床都唔知喎！我咪話我唔抱佢會喊，個嬸嬸就話喊都唔可以抱上床，要我放返佢去床仔！我放低佢之後自己都忍唔住喊，好辛苦，好眼瞓！再夜d嘅時候，有個好人d嘅姑娘終於理吓我，佢見我無停過無瞓過，佢叫我餵完奶之後推Ambrose俾佢去育嬰室，咁我可以休息吓！攪掂哂之後推俾姑娘已經係半夜三點幾喇！我推左Ambrose俾姑娘之後先醒起自己都無刷牙沖身，又拿拿林走去厠所沖身刷牙瞓覺！瞓左一陣間又突然間凍醒，一醒就成個人震哂，連牙較都震埋，好凍好凍，好衰唔衰個救命鐘放左响床頭唔响身邊，我又起唔到身禁鐘叫人，震左一排都唔停，唯有大叫，都叫左好多聲先有人聽到，姑娘即刻幫我加被包住我，我先開始唔震！望吓個鐘，五點幾，Ambrose應該要食奶喇，不過我真係郁唔到，可能我啱啱做完手術又疲勞得濟，所以會咁啩！我心諗可能Ambrose未喊，如果佢喊得利害姑娘都會推返俾我啦，所以懷住不安嘅心情我照瞓喇！瞓到六點幾，呢個時間係bb沖涼嘅時間，bb嘅喊聲係交響樂，第一日聽覺得好得意，第二日聽又覺得好嘈！可能我好擔心Ambrose啦，覺得無理由隔咁耐都唔使食奶，忍唔住落床睇吓佢沖完涼未，快d接佢返黎至得！點知，唔睇由至可，一睇就見到所有bb排隊沖涼，個個bb俾人除左件衫仔，得塊被仔搭住，我搵左一陣就見到Ambrose，嘩，佢响育嬰室外，好似排最尾咁，我見到佢果時佢喊緊，兩隻手仔伸哂出黎，佢已經成日震吓震吓架啦，而家得張被仔，重要伸哂d手仔出黎，我見到都覺得凍啦，又過哂鐘食奶，好陰公呀！不過沖涼時間姑娘係唔俾接bb走，我唯有返床等啦！一路等一路聽到bb喊聲，心都痛埋！等到七點幾，姑娘終於俾返Ambrose我，我拿拿聲抱返佢食奶，我諗佢一定喊左好耐無人理，食奶嘅時候佢累到顧住瞓，好慘！
Ambrose瞓左，姑娘又係咁叫我聽講座，我都唔想行開，驚miss左Ambrose食奶時間，不過姑娘又係咁要我去聽，無辦法！朝早醫生黎睇過，話我可以出院，估唔到開刀都咁快趕人出院，不過我都唔想留，一個人响醫院湊仔，真係好辛苦，醫生話走得，我不知幾高興，不過佢話要再等兒科醫生睇埋Ambrose先知係咪真係走得！我第一時間打俾老公，大家都好開心，不過以我經驗，朝早話出得院都要下午先走得，更何況個兒科醫生唔知幾時黎睇Ambrose！我估要傍晚先真係走得！
去完講座返房諗住接返Ambrose，點知聽到姑娘講緊佢，話咩抽唔到血，我即刻問抽血做咩，佢話驗黃疸，我都嬲嬲哋架，我唔响度嘅時候捉左我個仔去抽血都有嘅，事前又無同我講！姑娘話抽唔到血，要俾Ambrose瞓陣暖箱平伏吓先喎，抽完先送返俾我喎！過左唔知幾耐，Ambrose返黎，我見到佢手背同腳踝都有膠布貼住，應該係抽血位，唉，真係陰公，响埋d無肉嘅位抽都有架！
三點幾，個兒科醫生先黎，不過原來佢要睇哂全部bb，姑娘提我要排隊，嘩，唔係啩，要排隊又唔早出聲！等到四點幾終於到我喇，醫生check嘅時候都好正常，不過因為之前老公同媽咪黎睇Ambrose嘅時候覺得佢成日都好震咁，問姑娘又叫我同醫生講，所以都順便問埋醫生，醫生問吓我咩情況下震呀，點震呀咁，佢又見到Ambrose真係震左d，佢就話要抽血驗血糖同鈣，我一聽到又要抽血，我話啱啱抽左一枝驗黃疸，佢話都要再抽，重要分開兩次抽，心都實埋！醫生又帶走Ambrose，好耐都唔俾返我，我聽到d姑娘講話好難抽，我諗佢哋講緊Ambrose，我响張床又忍唔住喊，又驚佢好痛，抽咁多次血，又驚佢有事，又驚佢同唔到我一齊出院要迫住食奶粉，又驚真係咁嘅話第日出院佢唔肯食返人奶，好多野驚！姑娘見到我喊又黎安慰我，我都有d唔好意思！
因為要等血嘅報告，我又唔可以走住，一路等呀等，探病時間六點鐘，老公到埋一齊等，姑娘知道我唔開心，所以一有血報告返就同我講Ambrose可以出院，我當堂開心哂！點知過左一陣之後姑娘又走黎同我講唔好意思，佢話醫生話都係要留院觀察吓！就係咁，我哋就送Ambrose上十樓特別護理再攪埋我嘅出院手續，八點幾先走得！
2009年8月29日 星期六
開刀篇
之前果晚都瞓唔著，今朝晨早就起身等喇！無得食早餐，得個睇字！
老公一早到左，我出左去同佢傾左一陣，佢又話都係陪產啦，其實都唔知佢驚唔驚，不過果一刻我都好想佢同我一齊入，所以都走去問姑娘得唔得，有心理準備唔得多，因為好似真係好遲，晏少少都做手術，無理由咁遲通知都話得嘅！姑娘嘅答案果然係話我哋遲決定，未必得，佢會同我mark低去，睇吓麻醉師同醫生點講喎！超失望！
夠鐘返房換手術袍，換左之後坐响床度都等左都幾耐，老公重叫我臨出黎打電話俾佢，但係我要執埋行季，熄埋機，唯有打俾佢話可能就得，叫佢stand by，佢話見到有人推張手術床過黎，問我會唔會係推俾我，我一路幻想我係會行過去或者坐輪椅過去，點知張床真係俾我架！八點四個字左右，上左床，醫護人員推我去手術室，出左門就見到老公企响度等緊我，我哋笑左一笑就分開左喇！我响床望住個天花，感覺俾人推過左一條幾長嘅走廊，一路推，我就越黎越驚，去到手術室，好光好光，頭頂見到好standard嘅手術燈，好多個圓形拼埋一齊嘅燈，周圍好多著哂袍帶哂帽同mask嘅人，呢個時候有姑娘走埋黎問我老公係咪想陪產，我話係，佢重問我點解咁遲先改變決定，我話老公驚，哈哈，真係唔好意思咁講佢，姑娘問咁佢今日唔驚呀，我答因為我而家重驚過佢！佢問左麻醉師同d唔知咩人，聽到佢哋話無所謂，但係都重要問埋開刀個醫生先喎！
喺呢段對話期間，其實大家都好似好忙，無停過手咁，不過我都睇唔到，只係知個麻醉師係咁拍我右手背搵血管，拍左好耐，之後就打針同插左d喉咁！都幾痛！我不嬲都唔太怕打針，唔知點解當佢係咁拍我隻右手嘅時候我已經驚到震哂！當打完針插完喉以為攪掂嘅時候，佢走左過黎我左手邊又搵過，我嘅感覺真係覺得自己實在太無助，等緊俾人劏咁，而且呢個時候我醒起麻醉果枝針係插入背脊嘅，即係話左右手果d針呀喉呀都未係最可怕嘅，不過我已經忍唔住喊左出黎，牙較都震埋！有人走埋黎問我係咪好驚，我梗係好驚啦，喊哂出黎，牙較都停唔到震，我諗呢一生人我最驚嘅就係呢一刻！有人幫我抺眼淚叫我放鬆，重話俾我知老公可以入黎陪我，不過要攪好哂麻醉嘅野先！聽到之後都有少少安心，不過都係好驚好驚！姑娘走埋黎叫我打側瞓再屈番對腳上個肚度，呢個動作就好似扮蝦米咁，幾難，因為我個肚頂住，小b投訴架，不過我知道呢個動作係俾麻醉師插麻醉嘅針喉，所以應該係人開刀都要咁嘅！不過至得人驚係當我做好呢個動作之後，個姑娘就keep住禁住我唔俾我郁，我開始又幻想等陣打背脊果陣會唔會超痛，痛到會彈開，所以有人要禁住我先？！麻醉師話我知而家會打枝麻醉針落背脊再插喉，我又諗之後插左喉平瞓番做手術咪好“銀”囉！諗起又驚過！跟住有枝針打入黎，我嘅本能反應係縮一縮，我都唔想，呢吓真係本能，我都控制唔到，個姑娘禁實我叫我唔好縮，我就放鬆番個背脊繼續俾佢打。如果唔係個姑娘禁實我，我諗我個蝦米動作已經散左，佢嘅作用原來係咁嘅！之後麻醉師話我會feel到下半身好痺，好快，我就開始覺得痺喇，呢d痺唔係平時嘅痺，係真係無哂感覺，feel唔到自己對腳！麻醉師隔左一陣就話要試吓d凍冰冰嘅野，我諗佢攞左一舊濕左嘅棉花放喺我面度，問我凍唔凍，我話凍，佢叫我認住呢個感覺係凍，之後佢將舊棉放响頸、胸、腰、腳，原來半身麻醉去到個胸都feel唔到凍，感覺好奇怪！
攪掂哂之後，我見到老公黎左，佢已經換好哂袍，我都無諗過佢都要換袍，不過都啱嘅，做手術喎，唔通重著住d便服咁攪笑咩！老公黎左同我傾偈，d人開始set好多布响我哋前面，應該係費時俾老公睇到嚇親！老公keep住同我講野，其實我都唔記得我哋講左d咩。無人同我哋講手術幾時開始，只係中間聽到有d好似吸塵機嘅聲，都無為意係咩事，突然間好似聽到有一聲好細聲嘅bb喊聲，我以為我幻聽，不過老公都聽到，我好驚訝原來手術開始左，我問老公係咪出左世喇，佢都唔sure，佢重伸左個頭去“莊”吓，跟住話係呀！話口未完，我哋就聽到小b大喊，好大聲，喊左幾吓，停左，又喊過，一次俾一次大聲，我哋笑佢“渣渣”，喊到咁大聲都有！隔左一陣，姑娘抱小b過黎俾我哋睇，問我係男定女，重話俾我知佢嘅出生時間同體重，有2865g，心裡盤算吓都有6磅3，唔係好輕！睇完小b，佢就俾人抱開左，老公都要走喇！之後我都唔太記得係點，應該係d人執好野推左我去復甦區等啩！
响復甦區等左唔知幾耐，右腳開始有番感覺先，麻醉師話要等齊左右腳可以郁番先可以番病房。等左好耐，右腳嘅感覺越黎越有，用意志去郁都郁到同feel到，但係左腳就一d感覺都無，好得人驚！麻醉師check左我幾次可唔可以郁到左右腳，最後佢話我郁到左腳嘅時候，我好驚訝，因為我一d都feel唔到我郁到，而且其實我feel唔到佢嘅存在，我真係好質疑佢哋有無睇錯！麻醉師同我講老公响出面等緊我，我望吓個鐘，佢都等左我個幾鐘，一定好心急喇！
又係推過一條長走廊，出到門口，我就見到老公，佢重等緊我，我覺得好安心！老公幫我攞埋行李轉病房，因為唔係探病時間，姑娘限老公五分鐘就要走喇！
老公走左之後，時間係好混亂咁過，身上重插緊喉吊緊唔知咩野，只係知每隔一段時間姑娘就抱小b過黎叫我哺人奶，之後又瞓吓醒吓咁，不過隻左腳一直都無感覺！我嚐試用右腳踩吓左腳响邊，隻右腳雖然有感覺，但要隻腳伸過去再踩吓搵吓左腳，都係有d困難！加上隻左腳應該無感覺，踩左都feel唔到我諗！呢種感覺好差，好似無左隻腳咁！
2009年8月28日 星期五
待產篇
八月十八日，入瑪麗醫院待產，心情輕鬆，終於無驚無險等到呢日！可以嘅話，我真係好想小b留响肚裡面耐d，長肥d！呢幾個禮拜响屋企休息，都唔覺有d咩假宮縮，好似無咩動靜咁，如果唔係胎盤前置一定要開刀，唔知小b會幾時出世呢？
差唔多十二點入到瑪麗，啱啱撞正派飯時間，我食左早餐重好飽，所以決定晏d去大家樂食返個下午茶！老公走左，我响病房都無野做，今朝又早起身，都係瞓吓覺，有目標去食下午茶，時間係快過d嘅！諗住聽日小b都出世，今晚晚飯過後應該都唔俾食野，之後坐月都會有好多野唔食得，所以好放肆咁叫左奶油多、炸雞翼同凍檸茶，真係好豐富！食到最尾，醫院打俾我，問我去左邊，麻醉師黎左想見我，咁我就仆番上去病房喇！
麻醉師同我講番麻醉嘅風險，佢話會先試半身麻醉，胎盤前置係驚手術出血難止，所以佢話in case止唔到血要輸血就會即刻做全身麻醉，我都無咩問題，佢話點就點啦，不過都係驚驚哋半身麻醉果時咁清醒會驚，不過無辦法啦！麻醉師話我會係聽朝早第一個做手術，時間大概八點半！好難想像到時候會點，小b要出世呢個事實有d唔係好真實嘅感覺！
夜晚老公收工過黎陪我，我哋又係去大家樂食晚飯，有d似最後晚餐咁，大家都心情緊張，我食左個下午茶又飽飽哋，無咩胃口，食得好少！探病時間過左，老公都要走喇，聽日佢又要咁早過黎睇我，早d返去休息吓好d！
我之前成日叫老公响我開刀果日唔使請假，反正佢唔陪產，而且唔到探病時間都無得俾佢探，我又要等麻醉藥過，佢留响醫院好似無咩用，嘥左d假咁！佢話如果佢重返工好奇怪，點可能我生緊仔佢重响公司若無其事繼續做野喎！而且佢成日都話想睇住我入手術室，我話你估拍戲有條長長嘅走廊推住我入手術室咩，現實係果條走廊只得兩張床位咁長，重唔知幾點推我過去，我重諗緊會唔會係自己行過去，哈哈！Anyway，老公點都話黎睇我，我都唔堅持，我諗咁樣佢會放心d嘅，唔係真係唔知做咩好！
姑娘問左我好幾次老公陪唔陪產，我都無問老公就答唔陪喇，姑娘有d奇怪，我都無理，到夜晚同其他人傾開偈，d人知道老公唔陪產都有問點解，我唔知老公係唔係真係唔想陪，但我知佢都驚同一定會超緊張，所以都無叫佢陪！
十一點，熄燈瞓覺，唔知點解之前一路都無緊張嘅感覺，到靜落黎瞓覺嘅時候就多野諗，根本都瞓唔著！
2009年8月14日 星期五
偷食
之前成日都話跟營養餐食野唔太飽，好多野都唔食得。但係踏入八個月開始，唔知係咪小b大左，迫住d內臟，攪到我都無咩胃口，食少少就夠，又回復番一日三餐就夠嘅狀態，好多時重唔係因為肚餓而去食，而係因為再唔食就改左一日兩餐咁，我係怕小b無得食先食咋！
進入倒數呢個禮拜，我都開始放肆，都唔再諗太多糖尿嘅野，想食就食，再唔食坐月就無得食，哈哈！呢排嘅至愛係西瓜，又甜又多汁，真係好正！連小b都食到周身郁呀！有時一個人响屋企都好想偷食，但我都控制到嘅，只係試過偷食一次紅荳雪條，嘩哈哈！！！呢幾個禮拜其實應該要清吓d胎毒，但係我又成日驚突然作動，所以都唔敢食清胎毒果d野，費時一陣食完作動要撲出瑪麗，重驚！呢幾日倒數，唔理得咁多喇！小b，你都係食埋呢幾日好野，出世之後日日都係飲果d無味嘅奶咋，所以你都要好好享受呢幾日嘅美食呀！嘻嘻！
2009年8月13日 星期四
無無聊聊
自從入完醫院响屋企放病假之後，老公都唔想我周圍去，好擔心我會無啦啦出血趕唔切入醫院，之前提議去上環或者西環果d酒店住，我都reject左，唔想嘥錢呀！趕唔切最多都係去屯門醫院啫，係無我record麻煩少少，不過話哂都係醫院啦！為左安全，而家我嘅活動範圍只限樓下間茶餐廳，食完早餐之後通常我都唔會落街，晏晝都係叫外賣！簡直係足不出戶！有時候我諗坐月嘅時候咪重悶，連早餐都唔出得去，無凍檸茶飲，唔知我頂唔頂得順！不過可能到時忙到寧願瞓吓覺都唔願落街，哈哈！
呢排真係好悶，响屋企又無野做，因為好多野老公都唔俾我攪，如果唔係我咁得閒可以逐日洗吓小b野，而家除左上網同寫blog真係唔知做咩好！以前開落facebook account，呢排都有上去望吓，玩吓game咁，就係咁沉迷左落去，不過玩得唔叻咁解！
雖然成日話好悶，其實真係有好多時間可以做好多自己野，例如做吓mask夠好啦，不過我真係無呢d扮靚心情！之前好驚爆肚紋，影大肚相之前爆左少少，不過又唔太嚴重，果時都重有心機上網訂d油自己溝黎查，不過最尾又懶吓懶吓，都唔係keep住查，d人成日話女人貪靚，可能apply唔到我度，極其量我都係三分鐘熱度。而家肚紋越爆越多，連肚臍上面都有，我諗第日著低腰都遮唔到，但唔知點解我都“的”唔起心肝攪攪佢，懶到死！Even之前响Clarins買落firming連同一d減淡色素嘅產品，有d而家已經可以用，我竟然都無動力開黎睇，莫講話試用！家吓嘅心態係咩都唔諗住，生左至算，所以我個腦係無用過嘅！唔知係咪咁，我發現我嘅無記性嚴重左，唔知生完會唔會正常番呢？
再過幾日就生得，呢d咁無聊嘅生活，我而家就話好悶，可能之後我就會開始懷念架喇！真係好矛盾呀！
2009年8月12日 星期三
2009年8月11日 星期二
Holter
今日要返瑪麗攞部holter，呢部機係要陀住24小時錄住d心跳，睇吓心跳有無問題，快左慢左亂左．．．．其實我都唔sure，哈哈！不嬲心跳都比其他人快架啦，細個嘅時候都係咁，我屋企住三樓，就連行樓梯返屋企都氣來氣喘，重試過收A-Level成績嘅時候喘到暈左，面同手都痺哂！所以細個有段時間都要長期食藥，等d心跳唔好咁快咁唔舒服！副作用係血壓會低！不過，細個好似嚴重d咁！可能覺得唔夠氣好似就黎死啦，所以越驚越喘啩？！大個左都無咩大問題，可能已經習慣左跳得快，同埋無時無刻都feel到心跳，所以都唔太困擾，而且睇過好多醫生，做過無數驗血同心電圖都無咩特別，以前份工個公司醫生幾好，寫紙俾我排政府心臟科，不過果時懶，都無排到，估唔到而家無啦啦又refer我去check，咪當了左件心事囉！
老公放半晝返黎接我出瑪麗，幾趕吓，約左兩點三，都遲左兩、三個字。等左無耐就叫我，姑娘拉埋d簾叫我坐低“嗱”高衫，佢幫我裝機。原本以為好簡單咁，點知佢足足貼左七大個圓貼响我身度，再“pak”番哂d線，七條線匯入去一個盒仔度，出番黎就變左一條粗少少嘅線，呢條線又駁住部機，部機就係負責錄心跳架喇，部機就好似公司嘅計數機嘅size咁上下，不過厚身d！嘩，去之前老公重諗住可能係一隻錶咁戴住，點知咁複雜！好彩我著左件短身tee，如果我著one-piece，咁條線咪要响裙底走番出黎，好異相喎！我果日件tee係圓領貼身架，果d大圓貼貼到上頸下少少，件tee個領都遮唔到，好核突，重要係個盒仔收响件衫裡面，件衫咁貼，我個肚又唔細，成個盒仔印哂出黎，勁肉酸囉！好心d姑娘之前講定著咩衫好啦！重有部機係唔離開得，今晚無得沖涼！同埋部機有個袋入住，必要時可以就咁斜揹，好似d手袋咁，不過個樣同d色加埋，成個的士司機或者呀伯咁，無咩必要我都只係會收番入自己手袋囉！陣間出到街咁怪相，又有條線响件衫走出黎，人哋唔知以為我駁住尿袋，真係好核突呀！夜晚瞓覺又唔知點算，轉身又唔知使唔使攞埋部機一齊轉，而家個肚又大又重轉身已經好煩，重要顧埋部機，重煩！
2009年8月10日 星期一
購物日
今日老公放假，主要陪我去贊育同私家覆診，因為時間好緊迫，我哋揸車早d出去，諗住去埋贊育附近果間bb用品店買床單床圍，Peter Rabbit，好靚架，計過都係呢間最抵！Appointment係兩點鐘，我一點鐘就去登記，成個大堂都無人，唔知以為會關門，好彩嬸嬸都俾我登記，重做埋磅重驗vivi，我問佢醫生係咪兩點先返，佢話係，咁我話我差唔多兩點再返黎等。時間啱啱好，好好彩泊到咪錶，咁就可以同老公一齊買Peter Rabbit、食埋lunch同埋入去贊育等喇！一點十再返去嘅時候，成個大堂都係人，好彩登左記先，我應該排第一啩！
兩點鬆少少，真係第一個叫我個名，點知原來係姑娘叫名問驗唔驗B型鏈球菌，其實我開刀，照計驗唔驗都得，都唔影響小b，我同姑娘講，佢又話無關係，咁我問清楚佢胎盤前置會唔會唔可以驗，有無影響，佢又係話無關係，咁唔使錢，咪驗埋囉！不過我心諗，攞得報告嘅時候我都差唔多要開刀啦，咁遲先叫人驗！出返去再等醫生叫名，叫左一輪都未到我，好驚佢哋要我見顧問醫生，呢d醫生咁大，陣間成三、四點先黎咪斃！不過好彩都係等左一陣又到我，醫生竟然俾老公入埋去，以前唔俾架喎！都係問吓有無唔舒服，又叫你出血要入院，真係鬼唔知咩！之後咪又係度肚、按肚同聽心跳，一切正常，老公就問佢係咪有張booking要俾我哋聽日去瑪麗攞機錄心跳，個醫生先去搵吓個file有無，嘩！唔問都唔知記唔記得或者知唔知要俾我架，好彩老公响度，俾著我，我唔會識問，重諗住走果時個receptionist俾番書仔我果時會順便俾埋我咋！出番黎，老公好緊張話個醫生咁大力按我個肚痛唔痛，佢第一次見，哈哈，所以都好驚訝，又難怪嘅，平時叫佢摸吓個肚都驚，都係掂吓就算，見到個醫生咁大力，重唔嚇死？！而家佢咪知我平時自己黎政府覆診係幾慘囉，私家邊會按肚架！重諗住贊育又會叫我一星期後返黎覆診咁無聊，因為果時都十七號，十八號我都入院，十九號開刀，千祈唔好叫我又撲出黎俾你按肚，好彩佢都叫我唔使返黎咋！走得嘅時候都只不過係三點，好早呀！
私家要四點九先有得睇，咁早就走得，原本諗住太趕唔去大圍買野，而家又有時間，所以都係決定去埋！大圍呢間shop，我check過d野真係比出面抵好多！我哋諗住買嘅奶樽，吉之島賣緊$138一個，我哋一路都等佢做八折先去買，但係原來吉之島bb節要八月尾，我哋都等唔到喇！又俾我搵到大圍呢間shop，無折都賣$95一個，平過七折呀！之前响吉之島買嘅洗衣液，折左都成$70一樽，呢度一樽加一包補充裝都係$60，真係好抵，忍唔住都買多包補充裝，呢排成日洗衫仔，用得快呀！掃左d奶樽、洗奶樽刷、洗衣液、尿片、乾棉同濕巾，又幫老公個朋友掃左d貨，真係大收獲呀！而家屋企充斥住好多唔同牌子嘅濕巾同乾棉，d存貨唔知用唔用到兩個月呢，到時試吓邊隻最好用先得！尿片我都買左兩隻牌子，都係forum人話好用，睇吓係咪真係掂，哈哈！
買完野又撲返去睇私家，都等左成九個字先到我哋！張醫生都好好，有耐性咁解答左我哋d問題，之後我哋就睇小b喇！我諗今次係最後一次咁睇小b喇！度完頭仔、肚仔同大脾骨，一切都正常，張醫生話隨時生都得，夠“熟”喎！不過佢話小b臍帶纏頸，纏左兩圈，老公好驚，不過我知小b有羊水就唔怕，張醫生都咁講！老公就驚我無啦啦穿水，咁咪好麻煩囉，都係架，無水纏頸梗危險啦，不過我記得上次巫醫生好斷然咁話我唔會穿水，咁咪又問吓張醫生我個胎盤係咪遮左，所以都應該唔會穿水，張醫生都話好難會，咁我都放心！不過老公就唔係喇，好驚咁，重叫我沖涼沖快d，佢驚我沖涼穿水都唔知喎！可能張醫生見佢都好緊張咁，就係咁話我胎盤昇左d，起碼開刀位置唔係要介開胎盤先，咁就唔會一介d血會周圍“必”喎！佢話好彩胎盤响底，咁同普通開刀差唔多，唔使太擔心。當我問佢咁係咪子宮底收縮同止血無子宮頂咁好（呢d知識係上次屯門醫院個醫生講我知架），所以都難止血，佢話係，不過我個胎盤响底唔係响面，咁底又收縮得好過面喎，所以都唔好擔心。聽佢咁講，雖然我唔好彩胎盤前置，係麻煩少少，但又好彩地咁耐無出血，個位又唔係差到好危險咁，希望佢講嘅野係真啦！最尾張醫生都好好人寫左八日假俾我，等我唔使返工可以抖到入院生，又唔使再睇佢續假，真係唔該哂佢！
2009年8月9日 星期日
2009年8月8日 星期六
BB展
今日老公自己一個人去左會展嘅BB展！之前forum嘅人成日話d野點平點平，我都好想去趁熱鬧，不過知道响八月攪，我一早都預自己去唔到，點知而家真係病假，邊度都無得去！
老公自己一個去，都幾悶，我諗！買野係女人天性，重要係掃平野喎，佢點會識丫！我之前諗住佢唔會去，自己都唔去得，所以都無咩做過research買咩，只係mark低左幾個counter有d興趣咁，點知老公個friend去完話值得去，佢又話去，咁唯有叫佢去我mark低左嘅counter睇吓啦！
我响屋企就等佢電話匯報，哈哈！不過佢話好多人好迫，我都無要佢一定去哂指定嘅counter，好難嘅，要周圍搵，順住行見到就算喇！不過好彩，都俾佢去到買Grobag睡袋嘅counter，因為我好想買多個睡袋俾小b替換吓，好開心！重買左乾棉同沖涼泡泡，其實都買左架喇，不過抵麻，買多少少囉！之後我上網睇吓forum嘅人講咩野抵，抄低哂，諗住叫老公target oriented去買，點知佢聽唔到電話，到佢搵我嘅時候，佢已經走左！男人就係咁架啦，無咩耐性shopping，重要咁多人！到佢返黎嘅時候，我終於都明佢唔係無耐性，而係太辛苦喇，我見佢揹住一大袋野，好重好重，咁嘅身世真係好難响果度行嘅！
一大袋野，好多都係samples同無咩用嘅leaflets！早知就唔叫佢買乾棉同沖涼泡泡啦，"呀呀咋咋"，一早去到買左攞住黎行，好煩架麻，橫掂都有，睇吓買吓其他野重好啦！
不過今次老公都算叻架喇！佢重自己買左兩條靚靚毛巾包被仔，抵讚！
2009年8月6日 星期四
對話
話說我無啦啦入左醫院又走番出黎，老公本來好開心可以安安樂樂等我生，但係一出院又愁爆，怕我一作動趕唔切喎，都無計，唯有叫我唔好返工响屋企安全d！
一响屋企，奶奶自不然就得閒黎監察我，兩個人你眼望我眼，我都係成日貢入房上網，唔係响屋企有咩好做喎！
有一日，我哋嘅對話：
奶奶：「你成日上網唔累架？唔使瞓吓架咩？」
我：「唔累呀！邊瞓到咁多！上網無咁悶！」
（果日我成十一點先起身，二點幾好早咋喎！你估我係豬咩？！）
奶奶：「你肚唔肚餓呀？」
我：「唔餓喎！」
奶奶：「點解你成日唔使食野架？」
我：「未夠鐘食呀！你係咪餓呀？你食先啦！」
奶奶：「咁我唔等你喇！你唔食多d野，bb呢個月好吸收架！」
（果日我成十一點先起身食早餐，食完都無郁過，二點幾咁早，好難肚餓喎！唔餓又點食呀？！）
奶奶：「X姨灣仔屋企啱啱執好，不如响佢屋企住吓，到時萬一作動去瑪麗都近d麻！」
（最幣你响度我都周身唔自在，更何況去人哋度住？咪玩啦！我寧願住醫院！）
我婉拒：「唔係好方便嘅，又悶！」
奶奶：「唔會呀，當租間房住之麻，你而家都日日响屋企架啦！睇吓電視咪唔悶囉！」
（咁我可唔可以當X姨透明，當佢d仔女唔响度，唔使應酬先？！係咪冷氣任開？都係果句，我寧願住醫院喇！）
我再婉拒：「同X姨又唔係好熟，佢個仔又响度，唔方便嘅！」
奶奶：「其實開頭諗住入醫院住成個月都要俾幾千蚊啦，你唔去X姨度住，不如搵間酒店住，近d麻，傑文又唔使成日咁擔心！唔係有d月租六千蚊嘅酒店咩？」
（好似都有d道理咁！）
我：「而家都係得番兩個禮拜，唔知有無得租兩個禮拜咁平喎！」
（奶奶可能以為我唔想所以响度搵藉口啦！）
奶奶：「酒店近d安全d麻，又有得上網睇電視，又有人執房！反正你响屋企都係咁上下，你又咪係餐餐叫外賣唔煮野食，住酒店都係差唔多啫！」
（係咪寸緊我呀？不過响酒店住佢咪唔可以日日黎睇住我囉，又唔錯喎！）
我：「咁我一陣上網睇吓有無近近哋又平平哋嘅酒店啦！」
我：「唔知到時傑文可唔可以陪產呢？」
奶奶：「吓！果時邊個邊個開刀都無架喎，都係响出面等咋！」
我：「唔係喎，我問過醫生，全身麻醉就唔得，半身都得架！」
奶奶：「唔好啩！傑文會好驚架喎！」
我：「吓，我都好驚喎，佢哋會有布遮住手術部份，傑文睇唔到架！有人同我講吓野分散d注意力麻！唔係到時聽到d刀聲、人聲會好多幻想架喎！」
奶奶：「哦！呢d手術好易好簡單架咋！唔使半個鐘就生左聯埋針，唔驚，普通野啫，好多人都開刀生架啦！」
（＝＿＝咁唔驚你又第一時間話傑文會驚，俾人劏果個好似係我喎！使唔使咁呀！）
2009年8月5日 星期三
36 week
今日已經係36week喇！重有兩個禮拜就同小b相見，心情都好忐忑！一方面唔捨得佢離開我個肚，以後都feel唔到佢响我個肚入面郁黎郁去，貢黎貢去；另一方面，諗起個肚唔使再咁重，瞓覺可以平瞓同轉身自如d，又真係好吸引！心情忐忑都重有好多原因，例如開刀會係全身麻醉定半身麻醉呢？手術會唔會順利呢？會唔會大出血止唔到呢？做完手術幾時可以睇到小b呢？小b唔知幾重出世呢？佢會唔會健健康康呢？做完手術落床係咪真係好痛嘅呢？幾時可以出院？奶奶會唔會搬左黎住？會唔會俾佢搶左小b？坐月又會唔會悶到爆呢？好多好多野諗，不過都唔諗得咁多，都唔到我控制咁！
今日係出院第一日，尋晚打八號風球前出左院返屋企，估唔到瞓醒就打完風，得番一號風球，老公返左工，得我一個人，佢千叮萬囑叫我唔好出街，不過我話食野都要落街架，醫生都話唔好唔郁，血管會塞喎，所以佢都俾我落樓下最近嘅茶餐廳食野，遠少少都唔得！不過其實我都行唔得遠，個肚都好聚，重邊有心情周圍去搵食？有得食就算啦！而家都有d心野野想行街架，不過真係一陣就累，一個人又驚突然作動，重有兩個禮拜就生，有咩好買？都係乖乖哋過埋呢兩個禮拜，生左之後先去shop番夠本啦，生完又要買番少少衫過渡吓架麻，嘻嘻！等我呢排得閒諗吓生左之後買d咩獎勵吓自己至得！
老公打俾我，話瑪麗幫我約左期去陀機做24小時心電圖，瑪麗搵唔到我搵佢喎！原本以為又要入院，點知原來唔使，十一號返瑪麗裝機，十二號再返去拆機就得！不過一定要十號贊育覆診嘅時候攞番張slip先得喎！SHIT！！！重諗住唔去贊育覆診，而家一定要去啦！麻鬼煩，咁咪即係下個禮拜一二三都要出去囉，做咩俾人出院喎，撲黎撲去，又辛苦又危險！小b要聽話住多兩個禮拜先好有動靜呀！
今日都係响屋企食、瞓同上網，好悠閒，希望我咁抖法，小b可以出世重磅少少啦！
2009年8月4日 星期二
瑪麗醫院 – Day 2
凌晨五點幾我急vivi醒左，病房就已經歸於平靜！六點幾，有人拍醒我要量體溫！個耳塞都真係work喎，佢係拍醒我而唔係叫醒我，哈哈！七點幾，派早餐，一大碗肉碎粥，淡到無味，衰過白粥，隻蛋重怪，有d薄荷味嘅，勉強食左一兩啖，唔食喇，一陣醫生巡完房落去大家樂食先！
醫生巡房又係問d一樣嘅問題，似乎真係入黎主要睇心臟科咁！我忍唔住問醫生見完心臟科如果無咩事係咪住到生，佢話如果無咩野唔使住到生，出得院喎，咁都有嘅？贊育個醫生又話住到生嘅？！我無再問，睇埋心臟科點講先算啦！
都成九點幾先落到去食早餐，好肚餓喇！瑪麗嘅大家樂野食都同出面有d唔同，起碼無蘿蔔糕同蕃茄肉碎通粉，超失望！不過都好過醫院餐嘅，唔好要求咁多喇！食完早餐返上去，開始氣促，心跳一時快一時正常咁，瞓又唔係坐又唔係，忍左半個鐘先同姑娘講，佢搵左部機黎，跟住有個夾夾住手指，再望吓部機，佢話我嘅血含氧量ok，就係咁又無理我，又係問我心臟科醫生黎睇我未？我話未，佢至話同我追追！睇黎佢哋真係無咩野做到，而家都係得個等字！
無咩做又氣促，都係瞓吓抖吓。今日右面個女人落得床，佢嘅bb就跟住佢喇！我瞓緊嘅時候，左右兩面嘅bb齊齊喊，好鬼熱鬧，攪到我有耳塞都無用！又唔知點捱過，又到十二點lunch喇！個飯同之前果晚差唔多一樣，又同之前個lunch差無幾咁，超悶！無法啦，為左小b都要忍吓，同埋呢度每日一百蚊包幾餐，如果餐餐唔食出去食都好貴啫，我又病假緊，出得五份四糧，真係幾重損失呀！
四點幾，突然有姑娘叫我去十九樓見心臟科醫生，終於都見得喇！去到等左一陣，問吓野再睇埋之前做左嘅心電圖，醫生話無咩野，大肚影響呼吸都唔係罕有嘅問題喎，最緊要check清楚唔係心臟有問題就得！咁佢就即時同我做埋個心臟超聲波，睇吓個心有無事喎！佢叫我瞓上床，上左去又叫我打側個人，見我慢手慢腳，又叫呀嬸幫我，人哋大肚婆黎架，係慢d架啦，個呀嬸都唔係路嘅，我個人都未轉到身，佢就幫我轉腳，大佬呀，痛架，我唔係轉唔到身，係慢d啫，同埋我都要安頓左個肚至得架，無啦啦大大力轉我對腳，痴線架！好辛苦打側之後就開始照，個醫生大大力將個scanner壓落d胸骨度，好鬼痛，都唔知係咪要咁大力先照到嘅，後尾照照吓有人走入黎同個醫生講話唔記得話佢知邊個senior搵過佢黎，之後呢個醫生就有d神不守舍喇！好想快d攪掂叫我走咁，重好大力壓落另一邊scan，嘩，大力到我抖唔到氣忍唔住同佢講我好痛，佢先識講唔好意思，真係痴左線，有咩理由要press得咁大力先睇到個心架，如果有心臟病都病發左啦！佢同我講我個心無咩野，可以做手術，佢咁講我至知原來班婦產科醫生咁緊張有無心臟科醫生黎睇我，係睇我個心頂唔頂到個手術，可能見我心跳快又氣促，加上我個case一定要開刀，所以驚我有心臟病！不過醫生話安全d都會同我book個期陀機做24小時心電圖喎，估唔到以前成日去睇心跳快都無咩醫生理我，而家諗住入院係怕我大出血，點知原來係驚我心臟病，無啦啦check埋個心，重可以做埋24小時心電圖，都唔錯喎！
Check完心臟超聲波就返去婦產科，hea左陣就到醫生巡房，醫生見我個report無咩野就話我今日可以出院，好突然！我就話贊育醫生怕我胎盤前置突然大出血叫我入院住到生，而家又出院？佢話我35週前無出過血所以都唔太擔心，我話我住屯門驚趕唔切出黎，佢又話無需要一路住咁耐等生，不過佢話佢會再同佢team醫生傾，睇吓我有無需要留响度喎！
之後有個睇落senior一d嘅醫生又係叫我出院，咁我又講番同一樣嘅說話，佢又講同一套理論，又話如果之前有出過血嘅話，出血會一次比一次多，所以會擔心d，不過我好彩未出過血，所以應該ok，言下之意即係就算出血都係第一次出，“應該”唔會大出，唔係咁驚！如果屈响醫院重唔好喎！我都無野好講，心諗，玩咩，執好哂d野黎，無啦啦又走得，佢見我面有難色，就話可以聽日先出，咁都好d，老公都搭車黎緊，唔通兩個人抽住咁多野今日出院咩，點攪喎！不過醫生又話可能聽日打風，要睇吓天氣如何，如果差嘅話就唔好出院，住多一、兩日都ok喎！
老公黎到，都知我同醫生講左我哋嘅擔心，even我都話我唔怕屈响醫院等生，醫生都prefer我返屋企抖會舒服d！老公都無再話d咩野，咁啱知道老爺未飲啤酒可以揸車出黎接我哋走，咁不如早d走，响屋企舒服d！咁我哋即刻搵番個醫生話我哋都係今晚出院，今次到佢面有難色，話不如聽日先，因為醫生巡哂房走左喎，吓，咁都有嘅！可能佢唔係senior醫生唔可以就咁俾我出院啩！不過好彩俾佢見到頭先果個醫生，都趕得切幫我攪埋，老公見到呢個醫生又乘機問多一次，個醫生又係講同一番說話，ok，無野好講！不過我始終唔明，forum上睇到其他間間政府醫院都好緊張胎盤前置cases，even無出過血或者係一期二期呢ｄminor case都要入院住等生，更何況我呢類major case？！就連私家醫生都話要入院住，屯門醫院個醫生都講到要祝我好運咁！點解瑪麗咁sure咁淡定呢？唔通佢就係太出名，所以响佢哋眼中，我呢類case唔使咁緊張？不過有得出院都好嘅，無咁悶，最多唔出去周圍走啫！
醫生寫左五日假俾我，之前贊育醫生又話會住到生，我d私家醫生嘅booking取消哂，同madam講左唔會返工，而家又出得院，但係十九號又開刀，十八號又入院等開刀，都係得番唔係好多日子，老公嗱嗱聲去“lur”私家book番個期，一來諗住再睇吓小b，二來諗住叫私家寫假俾我，佢唔想我又走返工！好彩都book得番咋！不過唔知寫到幾多日假，都唔諗得咁多，呢幾日實在太混亂喇！最衰就係瑪麗竟然幫我book番去贊育覆診，都係得番果兩個禮拜，重要返？！重要同我私家個期一樣，十號下午，贊育兩點响香港，私家四點九响葵芳，都唔知趕唔趕得切，問姑娘可唔可以唔覆診，佢話最好唔好，又叫我哋唔得就打番去改期，點改呀，得兩個禮拜淨，改都嘥氣啦！到時見步行步啦！
返到屋企瞓上自己張床，真係好舒服呀！^__^
2009年8月3日 星期一
瑪麗醫院 – Day 1
今日九點要入瑪麗醫院喇！真係好早，點解要咁早呢？奇怪！我同老公都諗住遲少少唔驚，所以遲左少少起身，慢慢食埋個早餐先出發！
一出發無耐就塞車，之前都無諗過會咁，不期然又諗如果我咁啱作動或出血嘅時候遇著塞車都唔知點算，入院住都係好d！起碼驚少一樣先！揸車都成個鐘先到，去到都九點幾十點，老公去泊車，我去登記先，磅完重驗完vivi換埋病人衫出黎，老公就打俾我話姑娘唔俾入去，吓！唔係麻，要我出去自己攞咁重嘅行季入去呀？！嬸嬸都好人，話幫我攞！不過真係估唔到咁嚴，唔係探病時間真係咩人都唔入得！不過後尾姑娘都叫返老公入黎，點左佢去樓下打番個牌板上黎！老公攪掂之後上番黎又俾人趕走，好無奈同好突然咁，我哋都要講再見喇！
去到我個床位，好彩唔係好似上次屯門醫院咁係走廊第一張床，都算係中間，咁都好d！姑娘都係循例黎幫我量吓血壓、體溫、心跳同按肚就走左喇，醫生就簡單問左我心跳快嘅野又走埋，無人再同我交代d咩！我執好自己嘅行季，無咩做，睇吓雜誌瞓吓覺，過左好耐先係十二點，開始派餐，真係糖尿餐喎，見到都麻麻哋想食！成日就幻想落樓下大家樂偷食！今晚老公開會唔會有人黎探我，成日流流長，都唔知點過！
成日就有人黎問我有無心臟科醫生黎睇我，入左黎咁耐，都無人理過，淨係問心臟科醫生，好似我入黎係專睇心臟咁嘅！我都唔記得點捱到五點幾六點，醫生終於巡房，又係問有無心跳、氣促、見紅、穿水、陣痛、有無心臟科醫生黎睇我？全部都NO！個醫生突然話唔知心臟科醫生幾時黎睇我，咁我想唔想返屋企等？我真係“R”哂頭，返屋企等？我話我住屯門，佢就即刻話咁唔好喇，叫我响度等！好奇怪！唔知心臟科醫生幾時黎睇我？叫我返屋企？咁點解又要我入院呢？唔係胎盤前置入院等生順便check埋心臟咩？不過醫生今次黎confirm左我八月十九日開刀喇，都總算有d野定到出黎！
醫生走左之後就食晚飯喇，六點鐘，好早！好多人入黎探病，我都無，唔緊要啦，住咁耐要習慣吓！到夜晚多d電視睇時間應該會快過d！呢度好怪，唔似屯門醫院咁分產前產後病房，我左右兩面嘅女人都生左，左面果個個bb就响正我隔離跟住媽咪，右面果個因為要輸血起唔到身，所以bb都俾姑娘揍！不過呢度嘅布簾幾好，長時間分隔哂每張床，都算有d私人空間！八點幾見d人去沖涼，重見到有人用風筒，又唔似自己帶黎，膽粗粗問吓，原來可以出去reception借架，安樂哂，之前重諗緊咁長頭髮洗頭有排乾，自己帶風筒唔知會唔會好disturbing，而家有得借，好方便！沖涼房係獨立一間嘅，有埋toilet，都幾好，又有張檯仔俾你擺野，屯門醫院果個係响toilet入面有兩隔浴室，好似無咁好咁！不過屯門醫院有樣好，就係一開熱水制就有熱水，唔使等，瑪麗果d洗手盤嘅熱水要開好耐先有，冷熱水又分開出，有d麻煩啦！
沖完涼好舒服，睇埋電視都差唔多夠鐘熄燈喇！今次我醒目，帶埋耳塞同眼罩黎，都係多得呀茵之前俾我嘅化妝袋有齊呢d野，咁我至有得安樂少少咁瞓！同屯門醫院一樣，半夜又收新症，又係開哂燈做檢查，我有耳塞同眼罩都叫好少少，但都有醒，原來有個女人生左幾日，無啦啦發高燒入返黎，又發冷又震哂咁，好恐怖！唔知幾時，唔知邊個又叫肚痛，隱約聽到話開左兩度，我照瞓，耳塞真係有d用！
2009年8月2日 星期日
Handover
星期五上午去完贊育知道要入院，下午就衝左返公司handover手上嘅野俾同事，因為就只係得番星期五下午返工喇！一路以黎我嘅工作都係獨立嘅，所以都無咩人知我d野咁，不過之前成日病假都預早講過一次俾幫我嘅同事知，但係通常d人都係未殺埋身都唔係幾入耳，原本有見及此都諗住整張list俾佢有野跟吓，點知而家咁突然都整唔切，要口講多一次，佢重捉埋其他同事幫手聽吓記吓！希望佢攪得妥妥當當啦，如果唔係我返黎要有排執呀！
响公司要handover，估唔到响屋企都要，哈哈！小b嘅野老公有時都有份去買，不過主要都係我去做research，d野點安排全部都响我腦入面，所以佢都好多野唔知，要我逐樣講叫佢跟住做，好攪笑咁，都唔知佢得唔得嘅！我係咁講，邊d野要用，要洗，要攞入院，擺邊度．．．．好似交代身後事咁！
瞓唔著
星期日半夜四點，急vivi醒左，再瞓又瞓唔番，重有一日會响呢個屋企，之後都要成個月先返到黎喇！唔放心係其一啦，我諗係唔捨得多d啦！同老公識左咁耐，都係第一次分開咁耐，雖然話佢會日日黎探我，點都係唔同啦！
瞓唔著起身寫吓blog啦，之後成個月都update唔到，小b出左世就更加啦！由天黑寫到天光六點幾，都係時候返房抖吓，今日諗住出去買水龍頭，因為我個厠所果個龍頭實在太難推，老公諗住我入左院就幫我換埋！返入房都係眼光光，轉黎轉去，小b同我一齊唔瞓，周身郁！可能到我平時返工要起身嘅時間啦！哈哈！小b好叻架！一到七點幾，鬧鐘都未響，佢就識踢醒我叫我返工架！不過佢梗係唔知我今日唔使返工喇＠＿＠
响床轉黎轉去，都好肚餓，平時老公放假都好早起身，今日九點幾十點都無咩動靜咁，佢一定好累，我無叫佢起身，等佢瞓多d啦，之後我唔响度，佢都唔會瞓得好架喇！我出左去小b房執小b野，好等我入左院之後，老公都識follow吓要做d咩！
十點幾，老公終於起身，好surprise見我已經起左身重執緊野！哈哈！又真係好罕有嘅！通常都係佢等我起身食早餐等到傻左架麻！小b，我哋終於等到爹爹起身，有野食喇！因為實在太餓，無哂力，我都只夠力落樓下間茶餐廳食野咋！食完野我哋就出發去旺角買水龍頭，老公都好叻，揸車一去就停左响間舖頭門口，唔使我點行，一落車就係喇！之前都買開呢個牌子，所以都無周圍再睇比較吓，就响呢間望兩望，選好左就行得喇！前後都唔知有無十分鐘，真係有d佩服自己可以咁決斷呀！嘻嘻！
之後本來又係返屋企，不過我話想去荷花買d野，咁我哋就去左愉景新城行，諗住果度大d少人d，點知原來都唔少人囉，好彩果度地方濶落，唔迫！去左荷花先發現我所有VIP coupons都無帶，無法啦，買少少野啫，貴少少囉！買左企鵝仔嘅凡士林，鴨仔（定雞仔？）奶咀鏈同埋Avent安撫奶咀，我都唔係幾想買奶咀，唔想俾慣小b食，見有朋友唔俾都ok麻，不過又驚驚哋真係扭計唔知點好，都係買定啦，用唔用係一件事，最緊要叫老公同奶奶講我哋唔prefer用，唔好吓吓要我哋俾就得！
去完荷花，有d餓，不過又唔想坐低食，好多人麻！去左奇華買左個光蘇餅同檸檬水，諗住上車食，點知果枝檸檬水（果汁先生新出架！）甜到嘔呀！同starbucks果隻真係差得遠喇！咁我哋又走左去starbucks買過枝啦，忍唔住都响starbucks坐低食埋個光蘇餅，係有d核突嘅，當人哋好優雅咁食緊藍莓cheese cake，我竟然走去食光蘇餅！！！重要食到成身餅碎，哈哈！不過大肚婆係咁架啦，斷估唔會有人夠膽走黎鬧我嘅！
經過Chickeeduck，見特價又走左入去睇，想買多個睡袋仔俾小b，點知sales話睡袋係公價無得半價喎，咁都有嘅，好彩小b都有兩個，不過有一個好細，我諗好快就唔啱架喇，所以想買多個做spare，不過無折就算，bb展先再買啦！
再經過BeBeDream，見到做sale，我哋之前睇左架high chair做緊八折呀！雖然叫左老公嘅朋友買都係八折，不過自己買開心d喎！老公即刻打俾朋友話我哋見有折想自己買番，好彩佢未落order咋！高高興興入去買，重見到有布公仔搖鈴玩具做緊折，頭先响荷花見到閒閒哋都百幾蚊一個，咁貴唔捨得買無買到，呢度差唔多樣折左都係五十蚊，好抵呀！係無頭先果個咁靚嘅，不過小b都唔會分到，至緊要function係一樣就得，有時靚唔靚都係滿足大人多d啫！個玩具重係我想買嘅黑白紅色，因之前睇過七田真嘅胎教書，佢話啱啱出世嘅bb最好俾d黑白色嘅玩具去刺激眼神經喎！咁呢個玩具都係多左紅色啫！暫時買住一個玩具先啦！我唔想買太多俾小b，唔係錢嘅問題，而係唔想俾佢慣哂有好多玩具，我見老公同自己個朋友都唔會買太多，夠玩同啱玩就得，Ellen Law重話自製咭仔俾佢bb，真係好有心機！
買完張high chair都要走人喇，好大件呀！返到屋企拆出黎睇，好開心！老公重話不如趁我重响度砌埋bb床我睇，我話唔使啦，咁早砌左又阻地方，張床仔我有份去買嘅就得啦，我重記得個樣嘅，夠架喇！
2009年8月1日 星期六
倒數
自從尋日返贊育叫我入院之後，腦裡面就不停諗重有d咩未做未買喇！今日星期六，老公要返工，等佢返黎食lunch都成兩點幾三點，下午茶喇！咁晏，都係去吉之島買d濕碎野算！
之前成日都諗住等吉之島bb節先買埋其他野，平d麻！而家都等唔到喇，重聽聞八月尾先有，到時就太遲啦！小b未有奶樽、床單床圍、沖涼泡泡、洗衫液等等，所以如果佢早出黎，分分鐘都未有床仔瞓，無衫仔著，無得沖涼涼喇，哈哈！今日target係買沖涼泡泡、洗衫液同埋奶瓶清潔液，奶樽同床單床圍就睇吓老公個朋友或者黎緊會展嘅bb展買唔買到啦！之前都鎖定買邊隻牌子嘅野，所以我哋去到都係一手攞起就走得！跟住就係去買束腹帶，因為尋日confirm會開刀，我先敢去買，費時佢同我講試順產，咁條束腹帶可能會唔同！而家confirm開刀，聽人講第一次落床會好痛，有條束腹帶包住會好d，不過私家醫院就會幫你著，政府就未必喇，因為佢哋都好似唔太prefer人用束腹帶，巡房檢查麻煩d喎！不過點都好，買定帶去啦，遲早都要用嘅！不過一條咁嘅帶要幾百蚊，大肚婆嘅錢係易賺過任何女人嘅錢呀！
開始要倒數喇 !
開始要倒數喇 !
訂閱：
文章 (Atom)