以前寫blog，只係記事、記心情，而家寫blog，大多數已集中記Ambrose嘅野，自己得閒睇番娛樂吓又好，keep吓record又好，第時有機會Ambrose自己睇番，應該幾有趣！最估唔到嘅係寫blog可以同唔同人交流，甚至識朋友！
新相識嘅朋友仔－Herman媽咪，好多謝你送左呢盒交通工具puzzles俾Ambrose，媽咪非常喜歡呀，因為全部都係車車，重係實物圖，完全係媽咪想要嘅野！
2012年6月30日 星期六
兔媽媽男孩
之前都唔敢同Ambrose講定會有 show睇，一來媽咪轉左工之後突然好忙，差d唔記得左買左飛睇show，二來因為打風嘅關係，怕講左會去睇但打風去唔成，都係唔講。結果，只係當日氹Ambrose瞓晏覺時同佢預告有show睇，等佢乖乖快d瞓，好彩Ambrose一向都鍾意睇show，呢個方法都有用！
又係預早時間去食飯，又係早左食完，早左過去會場，結果係七點九開show，七點三已經到左，等到Ambrose都係咁問點解咁耐，真係有d唔好意思喇！最慘嘅係到入左場坐定之後，又要等埋其他人入場，結果都成八點鬆d至真正開始，真係唔明點解d人唔可以早d到架咩？都已經寫明七點九開始，唔係應該早十五分鐘到場準備架咩？點解可以七點九甚至更遲先黎到？對於我地呢d咁準時嘅人黎講，真係好唔公平，要知道個show都係俾小朋友睇，佢地多數都好心急架啦！好彩有浠浠一齊去，又加上可能Ambrose細細個開始都去慣呢d場合，已經習慣係咁等，所以touchwood佢都只係個口不停問點解未得，但都好合作咁坐定定！
兔媽媽男孩係講個小男孩同家姐爭玩具，佢覺得媽媽唔錫佢，只係錫家姐，於是佢離家出走，要去搵爸爸！其實情節都幾寫實但又有 d好脫離現實，好似之後個男孩出走後，無啦啦佢變左隻兔仔，重有就係有兩隻小白兔錯認佢做媽媽，發展落去就係講身為媽媽嘅佢要負責照顧呢兩隻小白兔，响照顧其間佢遇到好多情形都同自己同家姐嘅爭執一樣，亦遇到一d兩難嘅問題，如此種種令佢開始明白到媽媽並唔係唔錫佢，體會到媽媽嘅辛勞。故事又突然間返到現實，男孩又變番男孩，重同家姐媽媽重聚，主動道歉！個故事真係幾好，不過現實同虛幻夾雜一齊，唔知Ambrose明白幾多？不過至少媽咪知佢明白小男孩同家姐爭玩具，同埋最後重聚時佢家姐買左幾枝雪條一齊分享，因為佢係咁講“雪條”，嘩哈哈！
值得一提呢個show幾特別，有真人演出！但當男孩變左兔媽媽後，就變成左幾隻毛公仔演出，而公仔就係靠真人手持操作，媽咪估公仔後有一枝柄俾工作人員揸住同埋易於控制，而工作人員全負裝束都係黑色，全程其實都唔係幾睇到佢地對手操作公仔，真係幾得意！總括黎講，都幾好睇，亦都可以俾Ambrose接觸多d唔同嘅文化節目同演出媒介，值得睇！
颱風後的家長日
前一晚掛左八號風球，大家都重諗緊呢個家長日開唔開得成，點知一覺瞓醒，咩風球都無哂，難得爹爹又請左假，可以一齊同Ambrose 去家長日喇！
本來想話早d返去學校行吓玩吓，但因天雨，室外playground唔玩得，而室內playground又攞左黎播slides show，幾乎入到學校無野可以玩！唯有叫Ambrose帶我地參觀吓個男廁啦，哈哈！
家長日其實係唔係應該expect老師會有小朋友嘅一些簡單報告？或者唔好話報告丫，係咪應該由老師主導講吓小朋友在校表現之類嘅野？但sorry，呢間學校唔係囉，上學期家長日已經無咩野講，好多時都dead air，要家長諗有咩問題問老師，以為第一個學期無咩野好講，算啦！今個學期又係咁，小朋友返學無咩大問題就話佢ok，大佬，點ok？只係話Ambrose返左學校之後全部野自己攪掂，知道哂所有程序，咁又點？上學期已經係咁啦！
今次英文老師終於有講少少喇，佢話Ambrose英文listening skills 無問題，但speaking skills(唔明點解唔係叫oral skills)就要improve，話可能佢都係relatively細少少，所以比起同學仔佢都係被動少少，要老師時常鼓勵至答到問題，主動舉手講更加少見！媽咪即時問中文老師呢個問題有無發生在中文方面，老師話無，佢話Ambrose用中文可以掉轉頭問番老師好多問題，始終係母語喎！咁好啦，講完都得個知字，但講完一輪野後，媽咪先至醒起問老師，speaking skills弱可以點幫佢，講真，呢條問題真係唔應該係家長問囉，唔係應該老師comment完後自己建議家長點好架咩？老師都只係話要等小朋友學多d生字，建立番個生字庫先，至於點建立，老師當然係無講啦！其實細問老師，其他同學仔都係答生字同yes or no，呢d野Ambrose平時都可以架，都有d唔明老師對speaking skills有咩expectation！唉，點都好啦，黎緊上k1媽咪都準備同佢報英文班架喇，又睇吓補吓習同大左會唔會好d啦！
無咩特別問題，又係勁多dead air，問左少少其他行為問題，咁就完左個家長會喇！
2012年6月29日 星期五
第二次當當網訂書
書送左來都一段時間，但一直都未得閒update！
因為Ambrose對於油顏色嘅興趣突然間非常濃厚，每次油顏色至少都幾頁，亦可以一口氣油哂成本顏色冊，之前買落嘅顏色書都好快俾佢KO哂！暫時Ambrose都要油較簡單嘅圖案，之前買左嘅Melissa and Dough嘅顏色冊重未啱玩，而家攞出黎油又好浪費，家中嘅顏色冊已經無哂存貨喇！有見及此，媽咪又走左去當當網搵書俾Ambrose！
除左顏色冊外，亦見到有迷宮書，之前有同Ambrose玩過迷宮，不過佢完全唔掂呀，都唔知發生咩事咁，所以見買開書都入左一本迷宮書，試吓淺d會唔會好少少啦！另一本係Thomas迷宮，入面都幾深，因為係Thomas媽咪至會買，要留待Ambrose大一點至玩到了！
撕紙書，其實買時都唔知係咩黎，見平就試吓買！睇番原來係一頁一個圖案，小朋友可以沿線慢慢撕個圖案出黎，都幾得意，亦好考手指靈活度！以Ambrose而家撕紙都唔係撕得好嘅情況之下，呢本書對佢黎講太難了，又係要留待大少少至玩喇！
消防車皮特，包左一架木消防車，本書打開有馬路場景，小朋友可以攞架車在書上面碌來碌去，都幾得意，之前响7-11扭蛋扭嘅木車仔都要成$15一架細細架，呢本書連車只係$18(人民幣)，咁抵，就試一本玩吓囉！(重有其他車款選擇)
微笑數學遊戲，一pack三本，一口氣買左兩歲同三歲，有排做喇！
今次訂書，同年初時訂已經唔同左，之前可以選擇普通郵遞，運費平d，但時間耐d！今次訂書已經無左普通郵遞，只有快遞，運費是貨價一半，諗落都有d唔抵，不過當當書又真係幾平吓，呢堆書貨價連運費共$244，除開每本都係$19左右，咁嘅價錢唔係超平，不過都叫抵，而且上網買又慳左出去搵嘅時間，算係咁啦！
Home Craft Time @ Make a Buggy完成品(2y10m)
Ambrose講左好幾日“架車車乾左喇喎”，但媽咪都重未開始同佢油顏色，因為媽咪一方面又想畫架車靚靚，另一方面又覺得畫得靚都無用，Ambrose油嘅時候一定會跟唔到，猶豫左好幾日之後，終於都係攞出黎俾佢自由發揮啦！
架車都分左兩日至油好，第一日就係油車身同車輪，第二日要將唔太見得光嘅地方好似車底同車輪背面都油好佢，再要等乾！好彩Ambrose似乎都明白“等乾”嘅道理，無話心急要砌要玩！
呢架車，係Ambrose自己油，媽咪無教佢要畫窗同門，由他吧！咁樣都幾特別丫！油嘅時侯，因為Ambrose油完一隻色又油另一隻色，佢自己都發現咁樣油會變色，不斷自言自語話變左色，哈哈，都係另一種得著丫！
2012年6月26日 星期二
2012年6月25日 星期一
Jigos 機械人
早幾日開左盒Jigos出黎同Ambrose一齊砌，開左盒至知果d砌片原來都好鬼大塊！媽咪對於呢d玩意都無咩天份，又見盒內有圖例，所以叫左Ambrose揀要砌邊個，佢揀左機械人！
不過圖例只係圖例，其實都無教人點砌，所以媽咪都係對住圖係咁諗應該點砌至得！有俾Ambrose自由發揮，不過d砌片好實，佢都唔係幾砌到！
砌完一輪終於都砌左個機械人出黎，真係好大隻！好可惜，佢係企唔到架！睇圖應該係可以企架，唔知點解實際係唔得！
玩後感，呢隻Jigos其實都唔係幾好玩，一來佢好實，二來砌完出黎其實都唔靚，兼且所有手腳都郁唔到，三來媽咪真係唔識玩呢d要有創意嘅玩具，而Ambrose對於機械人企唔到亦頗在意，可能加上自己砌唔到無咩成就感，睇得出佢對呢隻Jigos無咩興趣，都係Lego啱玩d！
2012年6月24日 星期日
DWE親子Pizza樂(2y10m)
買左套教材咁耐，都係第一次參加佢嘅playgroup！今次同Ambrose報左呢個Pizza班，其實唔係佢平時果d唱遊式嘅playgroup，媽咪揀呢個班只係貪佢可以一齊整pizza，自己屋企無得整，要出去一齊玩，真係唔多地方有，媽咪又懶得搵，所以一見DWE有得報，雖然貴左少少，由佢啦，都係一次半次啫！
一早知道係响觀塘整，不過媽咪真係好stupid，地址只係寫住創紀之城，重以為係D唔知咩野商場仔，完全唔知道創紀之城即係APM！跟個地址行到去，真係好surprised個pizza班竟然响咁熱鬧嘅APM度上，亦好難想像可以係點樣一間舖頭！因為無舖頭名，爹爹媽咪上到去有關地址附近時，真係一頭冒水，見到一間Pizza Express重講笑話唔係去呢度整pizza麻？點知真係喎！即時覺得DWE即係DWE，真係唔會俾cheap野你嘅！
入到去已經見到英語哥哥Alan坐响度登記，好奇怪，佢完全都無check無問我地幾多人（因為媽咪只係報左一大人一小朋友），見有地方坐，爹爹又攞住個超大機械人，環境其實又好open可以睇住小朋友整pizza，爹爹都決定留低一齊睇，只係唔敢埋檯坐，費時俾人話無交錢又坐埋黎！
長檯上面已經放好左一set廚師帽同圍裙，媽咪幫Ambrose戴上時重以為佢會唔鍾意，唔知係咪知道戴住廚師帽同圍裙係大人，同埋會整野食，所以佢唔單止唔抗拒，重好鍾意！不過圍裙應該唔係小朋友size，著上好長，差不多到地，Ambrose話好似公主，好彩佢又無話要除。因為條圍裙長，坐上baby seat後都成日頂上個下巴同個口度，都有d麻煩，難得Ambrose無投訴，媽咪由佢喇！
未黎之前以為要搓粉團至整到pizza，不過原來已經整好左，怪唔知得個半鐘都攪得掂，不過咁都好嘅，唔使咁狼狽！Pizza Express有導師講解點做，DWE嘅Alan就負責不斷講解 ，同埋攪吓氣氛，其實佢兩個都係講英文，不過Alan就正宗d！雖然唔使搓粉團，但小朋友都要幫手用手指撳鬆同拍鬆個pizza dough，都幾得意！不過Ambrose鬼死咁大力，成日撳穿個dough，媽咪要幫佢補！
撳完pizza dough，之後要shake tomato source，口訣係shake，shake and turn，不過原來要shake勻，其實都幾難，細力又shake唔到，大力又驚shake到一身都係，只有Ambrose有圍裙，媽咪無架麻！最終都係要俾導師埋尾shake靚佢，哈哈！
之後就係最好玩嘅放食材上pizza度，鍾意落幾多，點擺，完全係自由創作，啱哂Ambrose，簡直就好似平時屋企做手工咁，哈哈！其實食材都唔多，得幾款，就連小朋友最鍾意嘅菠蘿都無，唔知係咪因為佢係Pizza Express而唔係Pizza Hut呢？反而有black oliver同埋pepperoni，攪到導師問小朋友有咩toppings時，個個都答pineapple，但個個都答唔中佢果d食材！呢個環節Ambrose好enjoy啦，佢係咁攞係咁攞，眼見其他小朋友個pizza得好少野，Ambrose好似慌死蝕底咁係咁舖d食材上去，好靚！Ambrose個pizza可能係全場最多材料嘅一個喇，哈哈！
舖好之後，職員就攞去焗，呢個時間Alan就開始派填色紙、crayons同worksheet俾小朋友做，之後職員就派飲品同小食俾大家，又幾好喎！就連爹爹無俾錢都有得食有得飲，真係估唔到！
做完食完飲完，pizza已經焗好左同包好左喇！呢個時候就係由Alan哥哥頒發Junior Pizzaiolo Certificate俾各小朋友同影相時間，最衰媽咪見都整完pizza，唔想件圍裙頂住Ambrose食野，所以同佢除左，忽然間叫到佢個名出去頒獎時又唔記得同佢著返，所以張相就無咁perfect，唉！
呢個pizza班雖然時間唔係好耐，感覺都幾充實，內容安排得都幾好，Ambrose中段時間仲同媽咪講，要媽咪下次再同佢黎玩，可想而知佢係幾咁鍾意！不過其實媽咪之前報完個pizza班都有少少後悔，因為Ambrose其實唔食pizza，唔知佢自己整完又食唔食呢？對於今次pizza班，媽咪同爹爹都好滿意，爹爹話Pizza Express平時一個pizza都二百幾，而家我地去玩完一輪，又飲又食，只係俾左三百幾，仲有個pizza攞走，好超值！而且果度環境真係唔錯，最衰嘅係我地唔知道，完全無準備相機，只有兩部手機影相，質數就麻麻喇！
返到屋企由Ambrose親自幫個pizza剪綵派俾人食，表姐最捧場，食左兩件，Ambrose自己食左一啖之後就俾左媽咪，都話佢唔食架啦，哈哈！
是夜，媽咪無意中上左Pizza Express個網睇到原來佢地有個kids pizza making party，小朋友可以响果度開生日會同整pizza，睇吓個價錢，原來都要$198 + 10% per kid，都幾貴吓，大人唔使錢，不過order野食又另計，咁睇落DWE收我地都唔算好貴啦，起碼我地都有野食有野飲吓，自己一定包唔到場架喇，有人包左我地去報，俾多少少都值啦！
希望下次會再有d類似活動可以去玩啦！
Ambrose上新畫班之十六(2y10m)
今日一早媽咪要去一間小學嘅簡介會，所以送Ambrose返畫班嘅重任，就交左俾爹爹！不過個簡介會响畫班完之前完結左，所以媽咪都趕過去一齊接放學！今日呢個手工，媽咪以為係雞仔，問Ambrose都話係雞雞，但當媽咪興高彩烈咁叫Ambrose同雞雞影相嘅時候，老師話，呢隻其實係鸚鵡喎，嘩哈哈！
2012年6月23日 星期六
端午節沙灘樂(2y10m)
今日爹爹要返工，所以都無咩節目同Ambrose玩，一心都係諗住夜晚同Ambrose去機場接爹爹收工，龍舟賽咁多人嘅地方，得媽媽一個人真係搞唔掂，所以都係睇電視好過喇！
無野好做，姑姐提議去沙灘，都不失一個好提議，咁啱早兩日爹爹至買左個憤怒鳥水箱連水槍俾Ambrose，今日去沙灘就啱哂啦，哈哈！不過好可惜，枝槍玩左唔夠五分鐘就唔得，唔知係壞左，定係入左沙塞左，Ambrose好失望囉！
其實有時都唔明點解d小朋友咁鍾意玩沙，見Ambrose都只係將d沙“不”來“不”去，咁都玩得咁耐！今日Ambrose又俾左另一個驚喜媽咪，佢將d沙“不”左入個桶仔度，滿哂後，都唔知佢响邊度執左條細細條但長條型嘅野出黎，佢將呢條長條插入呢桶沙嘅中間，之後就唱起Happy Birthday歌！雖然唔係真係有人生日，媽咪見Ambrose咁有想像力同創造力，真係好開心！
Lego 龍舟(2y10m)
之前媽咪砌左隻龍舟俾Ambrose，不過佢一直只係擺埋一邊，無咩點玩點理，但又唔會拆左佢喎！
今朝起身，Ambrose自己玩Lego，媽咪刷完牙洗完面出去，竟然見佢攞左隻龍舟出黎，自己重跟住砌多一隻龍舟，媽咪真係好意外呀！一來今日係端午節，Ambrose竟然咁應節終於去理吓隻龍舟，二來媽咪估唔到佢會自己跟住砌並成功自己砌到一隻龍舟出黎！
見有咁多人仔，媽咪同Ambrose再砌多一隻龍舟，電視未直播龍舟賽，我地响屋企黎左個Lego龍舟賽先，哈哈！
Mindz Pom Pom Mania
今日同Ambrose 又入左機場接爹爹收工！行經Exploration Store，又入左去睇吓！媽咪幾鍾意佢地嘅實驗套裝，不過好多都係for大嘅小朋友，Ambrose有排都未玩得！今日見到有少少手工套裝，好多都係for 6+，而實際又真係未啱Ambrose做！唯獨見到呢盒Pom Pom Mania，雖然都係寫住for 6+，不過媽咪覺得呢個都可以guide住Ambrose做到！呢盒野可以做到三個小手工，有埋個咁靚嘅膠盒，都只係$18咋！超抵！
2012年6月22日 星期五
Talk Point
俾錢買Cube Activity Board同動物人仔sticks時見到呢個好似甲蟲樣嘅圓形盒，唔知咩黎，細細個，都幾得意！Sales介紹佢原來係一個錄音及播放器，不過所錄嘅時間都幾短，只係十秒左右，但$49，買黎同Ambrose玩吓都好丫！黎緊返新工可能都要好早起身，再唔可以叫Ambrose起身返學至出門口喇，雖然明知Ambrose都未必記掛媽咪，不過都可以用黎錄定音俾其他人播俾Ambrose聽叫佢起身！呢個Talk Point，操作簡單，只係盒底有個開關制，啪上係錄音啪落係播放，撳住中間顏色制就可以，Ambrose都可以錄音俾媽咪聽，哈哈！
Lakeshore Craft Sticks
見到呢兩包die cut sticks，諗起可以同Ambrose一齊design佢鍾意嘅動物同人仔，真係幾好！sales重教整完呢d公仔人仔，可以同小朋友一齊用黎講故事用，小朋友超鍾意，只係本地家長少玩呢d野，外國好興喎！等媽咪又試吓先！
Gigo Cube Activity Board
好耐之前就已經買左盒Gigo Connect a Cube俾Ambrose玩，諗住攞黎學數又好，砌野玩又好，又或者認顏色又好，一盒細細盒，有多種用途，只係幾十蚊，所以買左佢返黎！不過因為粒粒好實，砌同拆都要好大力， Ambrose都未係好玩到，唯有收埋佢先！
最近無意中發現原來Gigo有塊Cube Activity Board，呢塊1-100嘅Board正好係配合Connect a Cube 2cm黎用嘅，等Ambrose大d可以教佢數數，媽咪見呢個係要將cube插入個孔度，其實亦可以訓練埋手眼協調，就算唔係for數數，呢塊board配合埋cube咁玩，都可以當係peg game，添加一塊board又可多點玩法同得著，只係$29，值得買！
買嘅時候，sales仲同媽咪講一邊係1-100數數，另一邊其實係教乘數，真係一物多用，值得投資呀！
Tag Solar System Adventure Pack
早排至同Ambrose一齊睇電視直播神舟九號升空，對於佢黎講，太空係咩都未知，亦未明。但係有一日當爹爹揸車途經一個好大嘅波波，Ambrose突然間大叫“嘩！有個星球呀！”真係又好笑又令我地好驚訝，點解佢會識得講星球，我地從來都無教過佢，亦唔會有教材有提及過，極其量都只係有一本故事書有提過Saturn，Mars同Rocket Ship等字眼，但媽咪只係朗讀英文，從來都無講過中文，所以Ambrose大叫星球，真係好surprised！
因為咁嘅原因，加上有日行過反斗城見到呢套Tag Solar System Adventure Pack，爹爹話不如買黎俾Ambrose睇吓學吓啦，見爹爹咁講，媽咪當然攞正牌買野啦！亦多得blog友winstep報料荃灣有呢pack野特價，反斗城賣緊$109.9，荃灣特價左只係$84，見今日有時間，趁未開始返工送完Ambrose返學就直接出左荃灣行街shopping！可惜係特價Tag Book唔多，有嘅都係女仔書！
2012年6月20日 星期三
Alien Fishing Game
見blog友買到Leapfrog特別版Toy Story Tag Set，所以尋日心郁郁再去深水埗碰吓運氣，點知好失望，賣哂！Tag Book都只係得一個款，只有star war！問左老闆應該唔再返貨，佢地都攞唔到平貨喇，就算之後再有，都會加價！荀野真係搶手，好彩點都買左一set試玩吓先！
買唔到Toy Story Tag Set，但買左盒Alien Fishing Game，呢個game就好似以前細個玩果隻釣魚玩具，個盤一路轉，小朋友一路釣d魚上黎，所不同嘅係，呢個係夾，要夾三眼仔上黎！Ambrose見到爭住要玩，不過其實都幾難玩，因為個夾係梗左，唔會打開，係有少少鬆動位，要對準三眼仔之後等佢升上黎再用少少陰力撳落少少至可以夾實三眼仔！Ambrose都算精，佢都費時揸個夾柄，佢揸到超前去夾，好好笑！
唔可以話好好玩，ok咁啦！$78有少少貴，不過有咁多隻三眼仔，就算唔夾都可以排隊隊，算係多個玩法啦！話佢難玩，都係，但技巧好似傳統嘅磁石釣魚難d咁，起碼三眼仔個夾係直身硬嘅，垂釣（夾）唔會周圍擺動，只要在三眼仔上方等待，用少少陰力就夾到，反而傳統釣魚魚杆係用繩連著，垂釣時會擺動，要對準釣魚手要定，對小朋友黎講，好似難過夾三眼仔囉！
後記：盒Alien Fishing Game响千色店見到賣$99.9，深水埗真係平好多囉！
2012年6月19日 星期二
Slap-on Sticker Maker – Beach Party
啱啱至同Ambrose整完Slap-on Sticker，覺得都幾好玩！雖然盒面寫住for 6+，但媽咪覺得即使Ambrose未夠三歲都啱玩喎，好大原因係有個模响度，其實佢只係負責填顏料，粗暴d同埋唔小心d都無咩大所謂，唔係好影響製作過程咁！相反，之前買左盒要用黑色顏料圍邊再填顏料，經過今次經驗之後，媽咪都係覺得呢個形式暫時未係好啱Ambrose而家玩，一定俾佢整“禍”左囉！
今日難得同老公拍拖，行左去Page One，竟然見到有盒Slap-on Sticker Maker，呢盒主題係Beach Party，同啱啱做完果個海洋動物都好配合丫！見咁好玩，呢盒重可以整埋相片入去，都幾特別，所以媽咪買埋呢盒喇！
Lego Shave a Sheep
星期一湊Ambrose返學時經過商場一間文具店，竟然見到櫥窗有好多Lego！雖然全部都係細size嘅Lego，但因為有d媽咪好少見有得賣，所以都睇左好耐！原來Lego除左有Education系列之外，重有Games系列，幾好玩咁！
今日再行經呢間文具店，媽咪終於忍唔住買左呢盒Shave a Sheep，雖然而家應該未識玩住，不過相信都唔使等太耐就可以玩架喇！
訂閱：
文章 (Atom)