學校outing @ 濕地公園

唔知點解學校定義為outing而唔係旅行，重要好奇怪，九點正常返學，九點九家長集合埋至出發，十二點就回程，咁短時間！同埋一早講左只可一成人陪同，所以媽咪成日覺得呢個真係可能唔係旅行，而係真係outing！成日幻想係咪學校同濕地公園果邊聯繫左可能係有d咩免費導賞之類嘅野，所以至會咁短時間同埋限人數！

 

今日送完返學就同其他媽媽一齊食早餐，買埋麵包就上返學校集合，真係好多人，重要係响學校門口集合，無冷咩氣，又亂！老師分班帶小朋友出黎叫名等家長拖番，不過人多，真係得個亂字！等到叫Ambrose名時，媽咪已經行緊出去，但個校長就係咁拉走d小朋友去前面，到媽咪行到前面時，見到Ambrose一臉茫然被人迫埋門邊，都唔知有無攪錯！接左Ambrose，又唔係去停車場上車，重要經過商場搭lift落樓下馬路邊上車。因為人多，成班人都圍响lift門等住入，攪到d街坊一開門都嚇親有少少微言咁！學校嘅安排完全無改善，次次都係得個亂字！不過都好過上次去旅行，家長同小朋友一早集合左但企到散哂，老師都好花時間同眼力去集埋成班人至上到車！Anyway，順利上左車就算啦！

 

上左車，媽咪開始同Ambrose搽防蚊lotion防曬，媽咪自己都要搽，搽得黎都到喇！哈哈！爹爹就自行去到泊好車等我地，佢打電話黎同媽咪講，濕地公園果度萬里無雲，好曬呀！

 

落到車，果然真係好熱好曬！應學校要求，落左車之後又要分班影大合照，攪完一輪，Ambrose成個頭都濕哂！原本重驚有蚊咬所以帶左條長褲去俾Ambrose換，不過天氣實在太熱，好難想像咁熱點同佢換條長褲，所以最後都無換到，唯有希望防蚊lotion加蚊帶有效啦！

 

擾攘一輪，其實原來都係各自各行，都係自由活動，真係唔多明咩叫outing？因為太熱，我地都係行室內。Ambrose其實之前都黎過濕地公園架喇，不過可能之前好細，印象中佢都無咩反應，今次再黎，佢都幾開心，重自己帶頭行，好攪笑！

 

行行吓本來可以去睇麥兜卡通片，但Ambrose唔睇，佢行左去開面嘅位置玩砌拼圖！真係唔知原來濕地公園有呢d野玩，真係唔錯喎，Ambrose都玩左好一陣，不過太多小朋友喇，成日玩玩吓都俾小朋友搶左黎玩，又抆番哂砌好左嘅拼圖出黎，Ambrose都好無奈！玩完拼圖，Ambrose又話要去睇返之前嘅魚魚，所以諗住兜個圈返去之前個館度，但原來行行下又差唔多到貝貝屋企，所以又忍住熱行左出去睇貝貝。不過唔知係咪熱定係到左晏覺時間，貝貝無出黎，佢藏身於幾棵樹中，我地只係睇到佢個背脊一小部份，Ambrose就好似唔多望到喇！

打算行返轉頭之際，又發現貝貝屋企隔離竟然有個playroom，咁就梗係又入去玩吓啦！呢個playroom唔大，不過都幾高，入面係以樹做主題，爬上樹管到上面，有小繩網同埋旋轉滑梯，望落好好玩！不過由於太高，呢個設施有高度限制，要起碼100cm以上至玩得，又唔俾家長陪爬.，所以我地無玩！好彩隔離一邊有個細d又軟林林嘅滑梯，啱哂我地呢d小朋友！樹屋其實都有另一條滑梯，佢係响爬上樹頂口嘅右手邊，雖然有寫高度限制，不過呢條滑梯唔係好高，工作人員都俾我地同小朋友玩！係Ambrose驚囉，一見到係管形滑梯就唔肯玩，一定要大人同佢一齊，好渣！

 

玩完playroom，又係時候出番去集合回程！基本上我地係無出過室外行嘅，哈哈！今日去完濕地公園，見到Ambrose都好似幾鍾意呢度，而且似乎就算唔想行出面，入面都有d野行同玩，所以都有諗下次再黎時買埋annual pass抵d！不過今次去，媽咪有交錢俾學校買飛，爹爹自行入場又買左，所以早知原來呢度都幾好行就出張annual pass啦！