<奇妙的光影>影子偶工作坊 @ 2012年5月26日

完全唔記得左記錄番去睇呢個show！

 

買飛之前見佢個show名又光影又影子，媽咪諗住都係d皮影戲，見價錢唔貴，又約埋Ellen姨姨一齊去睇！

 

點知Ambrose前兩日發燒，都唔知同唔同佢去好！到當日見Ambrose好似好精神無咩野，又退左燒瞓左覺，加上一早已經諗住打的去元朗睇，諗住都唔會太辛苦啫，所以照同Ambrose去！

 

同Ellen姨姨食埋個late tea，等埋的士，攪到原本精神唔錯嘅Ambrose都開始又鼻塞塞同呆呆地！好彩佢之前聽媽咪講話去睇show，對於Ambrose黎講睇show嘅印象係好唔錯，可能佢以為又會見到Harry哥哥，所以就算問佢攰唔攰，佢都話唔攰；就算個樣明明有少少病同呆，佢都係咁問住媽咪幾時去睇show！

 

最慘搭的士又早到，去到又要等一輪至入得場，入得場又要等一輪齊人至開始，攪到Ambrose真係麻麻地好精神！

 

原來睇呢個show係唔會全場爆滿架，佢地只畫左幾行位出黎賣飛，因為呢個原來係工作坊！除左會做影子戲，每做完一段，主持都會將剛剛做出黎果場戲由d咩野做成同埋點做，都鉅細無遺咁解釋同做一次出黎！例如，當個畫面見到個女仔係草原跑緊，你會見到d草不斷郁，個女仔真係好似跑緊咁，但原來實際上，個女仔係無郁，係靠一卷草一直响度碌所做成嘅視覺效果！諸如此類嘅野，其實有d都幾有趣同埋真係知多左d野，但係對於兩歲幾嘅小朋友黎講，講解果part固然悶亦唔會明，戲果part又唔係特別好睇，因為無咩故事同埋無咩色彩！所以Ambrose睇到中場時都叫走，但因為     Ellen姨姨同浠浠講過個show會有動物睇，所以浠浠唔想走，咁媽咪唯有氹住Ambrose先啦！

 

好辛苦等到真係有動物睇完，都未等主持再講解點做，我地已經走人喇，實在係有d悶，加上媽咪覺得Ambrose好熱，應該係再燒過，所以心急想快d走人返屋企！一出演藝廳就同Ambrose量體溫，38.5，果然真係燒返上去，好彩响大門等左一陣就有的士，飯都唔食都要返屋企安頓Ambrose先啦！