My First Lego DUPLO Vehicle Set 6052

真係好神奇！

 

之前媽咪有少少沉迷買Lego Duplo俾Ambrose，車都有幾架，又拆唔散，幾架車收起上黎就好易堆滿個盒，都未計如果Lego House拆散之後又係好大件！加上，之前無諗住自己會真係捨得買主題Lego，為左有多d人仔可以玩，媽咪之前搵左Auntie Fannie响美國訂左Lego Education系列入面嘅world people人仔，一共十六個，而家計埋主題Lego包埋嘅人仔，可能已經有廿幾三十個人仔，有d人仔又重複左，攪到媽咪終於都覺得要收手唔好再買！

 

沉寂左一排，見Ambrose真係成日砌Lego，開始覺得可能佢需要多少少blocks黎砌野玩，所以近排媽咪又諗起之前一直想買嘅Lego DUPLO Tubes Experiment Set，有blocks之餘，又有tubes可以砌，俾Ambrose可以玩埋碌波波，從而訓練吓佢眼力同因果關係等等！之前明明見Discount School Supply有得賣，重平Amazon少少，因為之前嘅人仔都係响呢度買，點知今次再上DSS，已經無左呢set賣喇！好失望！DSS無左，搵黎搵去就只得Amazon有，諗住算啦，DSS就算平都係少少啫，DSS唔做international order，其實都要搵人幫手寄或帶返香港，Amazon應該可以直接寄來，唔使麻煩人，咪諗住睇埋Amazon運費幾多先，點知攪左一輪，至知道Lego唔會寄出口，只內銷，唉！

 

因為一鼓衝勁好想買，媽咪重諗住搵間美國代購幫手買，不過大前提係，媽咪驚俾爹爹“哦”又買Lego！哈哈！

 

點知尋晚Ambrose又响度玩Lego，重將砌好嘅Lego送俾我地，爹爹就讚Ambrose而家砌Lego似模似樣，開始唔係亂砌，重話而家嘅Lego blocks似乎唔多夠Ambrose砌落去，要買多盒blocks俾Ambrose至得！呵呵，媽咪聽到就梗係開心啦，因為第一關無啦啦解決左！

 

但最神奇嘅係，尋晚至講完唔夠blocks要買多盒，今日媽咪去反斗城行，又响清貨區度執到好野！就係呢盒My First Lego DUPLO Vehicle Set喇！呢盒Lego啱啱個聖誕節時重同爹爹爭論買唔買好，結果無買之下又巧合地從抽獎同埋Ella姨姨得到兩盒Lego，所以更加擱置唔買。而家諗住訂Lego DUPLO Tubes Experiment Set，突然又响清貨區見到呢set，原價$479，而家特價只係$330，真係好抵！雖然呢set唔係媽咪想買嘅Tubes Experiment Set，但呢套成正價嘅七折有多，亦fulfill到媽咪爹爹想有多少少blocks可砌，又即買即有得玩唔使等，真係無咩理由唔買囉！

真係覺得世事好神奇，呢盒Lego好似整定係俾媽咪買咁。媽咪話唔買唔買都真係忍手左一排，諗住再買時又得爹爹認可。真係尋晚講完今日就見有呢盒野清貨，重要盒野擺左响一角俾其他野遮住左，係媽咪偶然發現佢，重要攞起左行前兩步就見到一個姨姨，佢又係揀梗Lego Duplo，佢見到媽咪盒Lego Duplo重問擺响邊度同幾錢，真係幾步嘅距離咋！所以，媽咪買到呢盒Lego真係好開心，哈哈！開心情度可能比Ambrose更甚，嘩哈哈！