今日浠浠過左黎同Ambrose玩！其實尋日佢同另一d朋友仔都上左黎玩，不過浠浠扭計俾Ellen挾左返屋企，見佢今日乖，Ellen姨姨先俾佢過黎再玩過咋！尋日多人，所以都係俾佢地玩玩具就算！今日只有浠浠同Ambrose，媽咪諗起好耐都無玩過嘅撈魚玩意呀！
首先每人俾左一盤加左食用色素嘅熟水，俾左d日式豉油魚仔形狀嘅樽俾佢地，扭開樽蓋，要佢地放條魚仔入水中係咁喞黎餵飽條魚仔！呢兩個小朋友就唔係好知點做，加上對d水同魚仔好好奇，基本上佢地只係不停放d魚入兜水入面玩魚多過餵魚，哈哈！攪左一輪，都係Ellen姨姨同媽咪入水多，最多有時教佢地點喞，佢地又玩吓，算啦，當係做過吓小肌肉訓練架喇，好過無啦！但最估唔到係，原本d樽蓋咁細個，媽咪都唔expect佢地自己開同蓋好架喇，點知佢地餵完魚，又要堅持自己蓋喎！重好，俾佢地多郁手指麻！
入完魚仔，媽咪用左Ambrose細個時用嘅浴盤裝左一半水擺出廳嘅中間，倒左頭先餵飽嘅魚仔，再加上其他海洋動物就開始撈魚喇！其實兩個小朋友一見到媽咪攞盤水出黎已經勁興奮架喇，一等d動物落哂水，佢地已經standby响盤邊玩，好鬼開心！對上一次咁玩已經係上年嘅事喇，又係同浠浠一齊玩！無法啦，自己一個人玩又好似悶左少少，但人多玩一定危險，又要到夏天唔凍先玩得，所以今日真係最好時機喇！
其實d魚仔呀動物呀加埋都幾十隻架啦，兩個小朋友一陣間就撈哂上黎，之後又再倒番落去，又浸隻手入水係咁潑，玩到不亦樂乎！媽咪見d動物實在撈得太快，而且其實佢地都係志在撈野潑水，根本都唔會理撈到d咩野，所以媽咪索性倒埋Ambrose果d食物玩具落去，總之係浮得就可以喇！一倒完落去之後，兩個小朋友重high，佢地重攞埋d刀刀叉叉掉哂落去，哈哈！兩個小朋友係咁攪，佢地話煲蔬菜湯喎，真係好好笑！Ambrose呢？佢見個浴盤一邊高d尖起，佢話個浴盤係船喎，又真係幾似嘅！不過佢想推隻船，媽咪就話唔得喇！其實佢地一路玩，媽咪一路攞住超吸水布响隔離standby架喇，怕地下濕佢地行黎行去會“線”親，所以推船咁危險嘅事，就一定唔得啦！Ambrose好搞笑，佢問點解隻船出面無水，但船入面有水喎，真係唔識答佢！
玩呀玩，呢個浠浠真係好貪玩，玩到興起佢就越黎越high，之前潑水都只係盤入面攪吓攪吓fing左d水左黎，呢個浠浠玩到特登潑d水向上，同埋周圍，叫佢唔好都唔聽話，一路fing水一路勁開心，佢重fing到d水去Ambrose對眼，Ambrose又唔鍾意有水入眼或彈到塊面，佢又响度想喊想喊咁，浠浠都唔理得佢咁多，哈哈！
成程餵魚撈魚都玩左成個鐘，佢地d手皮都皺哂，因為始終都開住冷氣玩，怕佢地會攝親，都係時候收檔玩其他野！
另類收獲：就係好日都唔會特登去洗吓d食物玩具，今日咁玩完之後，當洗左，好乾淨，哈哈！
今年
上年
沒有留言:
張貼留言