第一次溜冰 @ 2y9m

一直都想同Ambrose溜冰，但原來要三歲先可以玩，所以一直都擱置左！早排有朋友仔竟然去左玩，佢都未夠三歲，所以媽咪諗，其實Ambrose都只差三個月就三歲，佢嘅大肌不嬲都唔錯，所以即使Ambrose未夠歲數都想同佢試吓玩！

 

知道圓方嘅冰場有企鵝仔可以推，重有就係佢嘅收費係斷分鐘計，$1一分鐘，萬一Ambrose真係唔得都可即時出返黎，唔使斷鐘計咁白俾麻！見本來今日plan左去踩單車又去唔成，不如去溜冰啦！

 

同埋兩個表姐一齊去，三個小朋友都好興奮，未入冰場換緊鞋，Ambrose已經勁緊張要推隻企鵝仔，但其實企鵝仔在普通地上好啜，攪到佢為左推隻企鵝一仆一碌，哈哈！

 

真正進入冰場溜冰，以為Ambrose會好興奮，但實情佢都幾緊張，初初都係媽咪响後面扶住佢一齊行，有時候，滑滑吓佢雙腳又越滑越開，攪到叫哂救命咁濟！相反，平時膽細嘅二表姐，响場外時已經著住溜冰鞋自然走動，到真正推隻企鵝入場溜冰時都好穩定，就算跌低亦自己扶住企鵝企番起身，真係好叻！

 

見Ambrose戒心細左，有時媽咪都放手俾佢試吓推，不過佢似乎未掌握到向前推嘅動作，好多時見佢推住行得好慢，可能佢一心靠企鵝借力平衡，個心只focus on平衡而唔係推前，哈哈！有好幾次又係滑到變一字馬，佢就叫哂，又話我地唔扶住佢，攪到之後佢可能怕左，成日都一定要有人响後面扶實同佢一齊推！二表姐就超勁，完全可以放手由佢自己行，唔使照顧，佢重要話好玩，就連大表姐都唔夠二表姐咁勁，佢又係叫哂救命，成日都要有人响身邊！

 

玩左半個鐘，Ambrose開始賴皮，佢話唔玩，唔好玩喎！氹佢玩多一陣，佢都真係玩多左一陣，之後就用雙手掛响隻企鵝扶手上面，又攤軟成個人唔肯企好，重話好肚餓要食野，真係唔知好嬲定好笑！佢只係食完野一個鐘頭左右，重食左超多野，咁快就叫肚餓，都唔知係咪佢見到姑姐在場外食野睇佢地玩，見到人地食野又話要食，正一為食豬！

 

因為Ambrose肚餓，媽咪要先同佢出去搵野食喇，過八達通收費，見到只係玩左36分鐘，第一次算係咁啦！出左黎再問Ambrose好唔好玩，佢都係一時答好一時答唔好，不過就狂問點解d冰咁“線”！相信Ambrose唔太enjoy原因就係企唔穩，哈哈！

 

Ambrose雖然好跳跳紮又粗魯，其實佢都係細膽一族！