Ambrose上芭蕾舞班之十二 (2y9m)

今日上堂撞到一個已經退學嘅同學仔，原來佢學平日，之前請左假要補堂，所以今日至會撞到！大家閒談一番，先知原來佢學平日，响大會堂果邊上堂。同學仔媽咪話果邊間跳舞室大好多，同埋有三個門口可入，門上有玻璃可望到入面上堂情況！點解咁好架？！Ambrose响文協呢邊上左三個半月，因為門係密封，媽咪幾乎一眼都無睇過Ambrose上堂嘅情形，真係好可惜呀！

 

最近，媽咪正為幫唔幫Ambrose轉去第二間正式少少嘅學校學跳舞而煩惱，始終文協呢度真係好似只係玩吓咁，想Ambrose可以有多少少比賽或表演經驗，留响度又似乎未必有呢d機會，轉去d正式跳舞學校應該會好好多咁！但問心，係咪真係想Ambrose正式學舞同考試，又未必真係喎，所以都重係十五十六，唔知點好！最慘睇Ambrose嘅身形，又唔多似跳拉丁舞果d纖幼形，又唔似芭蕾舞果d咁有溫文氣質，橫睇掂睇Ambrose都似係功夫小子多d，係咪應該等多一年俾佢去學功夫，而家都係玩住先好d呢？眼見朋友個仔大Ambrose一年唔夠，已經响跳舞攞左唔少獎，個人又較以前自信左，又覺得好吸引，將來呢d獎又可落入portfolio考小學，勢利d睇，等多一年又好似好浪費時間咁，唉！