今日起身，無雨，真係好開心！今日行程係去The Busena Terrace外坐鯨魚外形嘅觀光船出海睇魚。原來有白色同黑色船，黑色當然突出d，靚d，不過我地咁啱輪到坐白色，好彩Ambrose無好失望！
沖繩嘅海水真係清得好緊要，船駛開一陣，其實已經開始見到好多唔同嘅魚，真係好靚！見有魚糧買，就買左一盒俾Ambrose餵魚。一打開個盒，就係一個好似雪糕三文治嘅物體，搖下入面好似有好多粒粒物體，於是叫Ambrose搣吓至掉落海餵食，但原來d魚根本都唔食，無論我地掉個外殼落去，定係入面嘅粒粒，d魚係掂都無掂就游左去，真係令人失望！
坐完船，再行左去海中展望塔睇魚，都幾得意，只要沿樓梯行落去，就已經係海入面喇，不過展望塔入面好細，人相對較多，都幾迫吓！
原本見到The Busena
Terrace外嘅沙灘好靚，水好清，沙好幼，真係好想去玩沙，不過爹爹話已經schedule左下午至去另一沙灘玩沙，所以睇完魚後，直接出發去下一站 -琉球村！
一去到琉球村，又係搵野食時間，食食吓嘅時候，對出嘅台上竟然有表演，哈哈！日本嘅food court真係好正！食完野，入村！其實無咩好睇，有d似海洋公園集古村咁！有d屋入面其實有唔同workshop可以參加，不過要夾啱時間先有，而我地又唔多想太花時間去上workshop，加上湊住Ambrose，workshop都唔係個個啱佢，所以見無咩野做悶悶地，都係行左一圈，到此一遊就走左喇！
提早左走，出發去殘波岬海灘，Ambrose終於可以去玩沙喇！不過呢個海灘，好多細石，沙又好＂吉＂腳，感覺上無朝早响The Busena
Terrace外嘅沙灘咁靚，真係有d後悔唔玩埋先，仲要走左去悶悶地嘅琉球村先至黎到呢個沙灘，唉！見有人踩水上單車，覺得都幾得意，於是我地又走去租黎踩。但爹爹就超緊張，踩出少少都話怕怕。踩緊水上單車嘅時候，Ambrose見有人玩水上電單車，好刺激好快！佢見到又話要玩，係咁lur爹爹俾佢玩，去到counter問，原來四歲就玩得，見佢幅相show出黎係個小朋友坐前面大人坐後面攬住玩，爹爹之前又响蘇梅玩過，覺得自己都應付到，同埋見Ambrose真係咁想試，終於都同意！原本以為1500 yen親子水上電單車，點知原來小朋友一個價錢，大人一個價錢，都幾貴吓！但已經答應左Ambrose，無得話唔玩啦！
比完錢行去海邊等上車，離遠已經見教練個樣好似唔知點咁，有d黑口黑面，但照計日本人好少會咁，媽咪不以為意！安排左Ambrose上車，正當爹爹想話上車時，教練叫佢行開，都幾愕然！原來教練唔俾爹爹同Ambrose一齊，佢要自己同Ambrose一齊，媽咪諗，可能教練見Ambrose細，所以都唔放心俾架電單車俾爹爹揸。好無奈地，Ambrose就咁就跟左教練出海。好彩見教練都揸得幾慢吓，唔似平時咁飛左出去！但，問題係，我地以為教練只係响近岸處載Ambrose行吓當玩左，點知佢越駛越出，出到好遠，差d影都無埋，擔心死我地！十分鐘後，佢地終於返黎！Ambrose無瞓晏覺明顯呆呆地！問佢好唔好玩？佢話好玩，玩唔玩多一次？佢話唔好，哈哈！事後，再問多Ambrose一次，驚唔驚快？佢竟然答唔驚，但佢就話驚d水彈到面同眼喎，真係俾佢笑死！
離開殘波岬沙灘，打算出發去美國村，上左車嘅Ambrose一陣間已經瞓著左！去到美國村，諗住抱佢落車，點知佢可能發緊夢俾我地整醒左，佢喊哂口話有好多沙好＂吉＂要撥走，但事實佢根本無沙，哈哈！好唔容易抱左佢落bb車，見佢咁攰就叫佢繼續瞓吓先，諗住佢落左車都唔會真係瞓架喇，點知唔使一分鐘佢就瞓左！最神奇嘅係，當我地推向個摩天輪嘅時候，佢竟然無啦啦又醒一醒，指住話見到摩天輪，叫我地去玩，之後又係唔使一分鐘，佢又暈左，嘩哈哈！
响美國村行左個幾鐘，Ambrose全程都無再醒，到我地再抱佢上車返酒店，佢竟然都無醒，呢場晏覺，佢足足瞓左四個幾鐘，真係好誇張！第一次瞓咁耐晏覺，想必呢幾日嘅行程，佢都好攰，再加上今日玩左水上電單車嘅刺激，可能佢要多d時間去平伏番！
泊番架車返酒店，再步行出國際通行街買手信，明天要回港了，真係好唔捨得呢！
