竟然俾爹爹發現星期日嘅早上時間有海賊戰隊嘅電視，仲要俾Ambrose睇！爹爹嘅理論係：平時都無睇電視，Ambrose亦唔會話要睇，咁星期日放假，又未夠鐘出門上興趣班，睇一陣都無所謂，Ambrose又咁鐘意！唉！媽咪都明白，Ambrose對電視嘅熱愛度唔高，全因自小一家都戒左睇電視，但小朋友有邊個唔鍾意又有聲又會郁嘅電視丫。戰隊呢d野，佢唔睇都已經咁沉迷，係怕佢睇得多，更上腦咋，始終Ambrose都唔係斯文架麻！
不過不得不佩服Ambrose，佢睇完套海賊戰隊電視，真係好開心，竟然即時走去畫畫，畫番海賊戰隊咁多人出黎，爹爹話佢畫啱哂色，同埋塊面個交叉都係跟住戰隊樣黎畫架喎！Ambrose畫埋佢地嘅刀，每把手柄有個大圈，而佢話因為紅同綠色果兩個人企最前，所以佢畫大隻d，其他嘅企後面，所以畫細粒d喎！
平時又唔覺佢嘅觀察力咁好，呢d佢有興趣嘅野又咁鉅細無遺！
沒有留言:
張貼留言