沖繩時間比香港快一個鐘，沖繩店舖又早關門，所以要早d起身去玩至得！但今日一早起身，發現出面落緊大雨，真係好掃興！有幫Ambrose帶雨褸，但大人就無遮！好彩酒店行去單軌列車站沿路都有蓋，出左去至算！
搭單軌去DFS攞車，今次好好彩，Ambrose終於坐到司機後面，可以睇司機駕駛列車。睇左一陣，媽咪都不得不佩服日本人做野真係好一絲不苟，見個司機每去一站又要企身、開鎖、開門、再望出去等齊人上落車再關門坐低，個樣都仲好專業同埋敬業樂業。爹爹話司機係每按一個制都會point，以求確定無誤，真係安全至上！
攞左車，直駛去首理城跡，因為未食野，所以一去到就食個brunch先！我地幾乎係餐廳第一檯客咁濟！幫Ambrose點左個兒童餐，其實個餐嘅野食就麻麻，都係炸物多，但見係麵包超人好得意，Ambrose見有果汁同jelly，當然話要啦！黎到果然唔多食，都係食我地嘅拉麵！哈哈！
食完野行出去，都仲係落雨，好彩有幾間紀念品店，就地買左兩把遮，再繼續行。唔知係咪落雨，定係平日嘅關係，呢度唔係幾多人！媽咪見落雨，又要俾錢至入得場行正殿，覺得都係睇d悶野，都想話唔入去，但Ambrose知道係皇帝住嘅地方，佢話要入去睇，所以都係俾錢啦！
入正殿原來要除鞋，但又好奇怪，我地推住bb車入去又得架喎！仲以為推車仔去行呢d地方一定好唔方便，但原來入面有lift，又會有斜路，真係好好囉！睇完一輪，要出發去第二個景點了，Ambrose差d唔願走，問佢悶唔悶，仍又話好玩，真係估佢唔到！
第二站原為海中道路，不過發覺似乎真係一條路，行左都唔覺，哈哈！經過海邊，落車影吓相；再行，又見到一間外形似隻大船嘅海之駅館，大家都被吸引住，又停低入去行吓。Ambrose响呢度買左隻海龜毛公仔，個殼同個身可以分開，同之前去墾丁龜龜房嘅龜一樣可以甩殼，好可愛！Ambrose非常鍾意，平時唔多願影相嘅佢，買完隻龜龜，竟然自己行埋去隻苦瓜公仔身邊話要影相，奇！
之後，去左勝連城跡，呢度望落有d似城堡，可能係咁，Ambrose又有興趣，又話要行上去！因為落雨，地下好濕，又斜路又樓梯，樓梯又有青苔，真係好濕滑！其實呢度無咩特別，但原來上到城頂，望出去嘅風景幾靚，如果唔係落雨，其實呢度真係幾舒服。不過，今日黎呢度，一個人影都無，又落雨，真係有少少蒼涼感。行完睇完，到此一遊就走喇！上城頂時已經要好小心怕滑倒，梯級又高，都幾攰，點知落山先至金，爹爹真係一步一驚心，要扶住欄桿拖住Ambrose超級小心落樓梯，响後面睇住佢地，都幾搞笑！
本來爹爹plan左今日係戶外觀光日，但因為落雨未停過，湊住Ambrose响戶外觀光真係有d狼狽，而且，既然已經去左兩個城跡，都叫去左d景點丫，加上之前一晚發現原來國際通無咩好行，所以決定餘下行程都係入商場去了！
先去左揸車經過見到嘅Jusco，竟然去沖繩旅行都離不開Jusco，應該無奈定係慶幸尚有Jusco可以行？响Jusco發現有平時Ambrose用開嘅麵包超人止痕貼，yeah！當然要同Ambrose入貨啦！事實上今次去沖繩之前幾日，同Ambrose去bbq，竟然第二日起身發現佢著短袖衫手無中招，反而著長褲對腳就中左幾粒，要keep住貼止痕貼，仲要帶埋去沖繩用！所以止痕貼對Ambrose黎講真係常用物品呀！
行完Jusco再去Naha Main Place行街！當爹爹搵位泊車時，媽咪已經見到商場入口竟然泊左一架車造型嘅bb車，諗住Ambrose見到一定開心死！一落左車，就跑返去搵呢架車仔，好彩地，俾媽咪搵到！而且，媽咪發覺，成個商場，可能只有呢架車造型bb車，因為再無見其他人用呢架車仔，只係得一般嘅bb車咋！每次當有小朋友經過我地身邊，都會被Ambrose架車車吸引住！Ambrose當然感受到威脅啦，所以當我地去food court食野時，佢已經唔多願落車，直至我地promise佢一定唔會比人攞佢架車走，佢至肯埋檯，哈哈！
沒有留言:
張貼留言