一晚，Ambrose又話要畫畫，平時佢只會用長放檯上嘅crayons同水筆畫畫，呢一晚佢竟然要求要用畫班用嘅粉彩！見佢要求到，無理由唔俾佢用啫！於是，俾左盒粉彩Ambrose，佢就話要畫一幅畫送俾Miss Chan Chan！佢畫左間屋同樹，又有車車，媽咪見個背景白色好寡，於是打算開少少水彩俾佢油底色！呢個Ambrose一聽見水彩就好興奮，原本媽咪只係話開一隻色俾佢，點知佢又要黃色，又要綠色！媽咪唔想麻煩，本來打算俾一隻色Ambrose，但爹爹幫口話Ambrose間屋未油顏色，所以需要兩隻色！
好啦，俾左黃色同綠色俾Ambrose，佢將屋油左綠色，之後天空油黃色！油完黃色，佢又問媽咪攞藍色，又係爹爹幫口話都畫開喇，唔差在啦，都油哂咁濟咯！好啦，俾左藍色佢，以為佢想油邊度啦，點知佢又走去油個天空！但由於之前嘅黃色未乾，一油藍色上去，即時變左綠色，同間屋撞哂色！
Ambrose好緊張問點算，其實媽咪都無諗過會有咁嘅情況，唯有氹佢話用紙巾印乾少少，再油其他色上面。今次，媽咪再開埋紅色，好讓Ambrose再溝埋之前未乾嘅藍色，變成紫色，咁起碼個天唔會咁奇怪係綠色先啦！
呢個Ambrose跟手又油埋紅色上地上，搞到原本紅色嘅車仔又起唔到色！媽咪問佢點算好，今次佢好叻仔，好快就答媽咪，用枝黑色粉彩再畫過架車仔咪得囉！
呢幅畫，雖然唔多靚，不過媽咪覺得畫嘅過程，真係好得意，除左學到溝色，亦學到解難，哈哈！
沒有留言:
張貼留言