尋日落足一日雨，真係好掃興，好彩今日起身，個天又好似無咩野喇喎！
今日第一個景點係萬座毛，Ambrose聽見係睇大象飲水，都好有興趣，仲問左好多好多問題，哈哈！呢度天氣其實真係好難預，第一日黎到就覺得好熱，點知第二日落雨又涼番d，今日見無雨，應該無咁凍，又驚中午時間會熱起上黎，又唔敢著太多衫。結果，黎到萬座毛，出奇地超大風，超凍！d風係咁吹，吹到頭都甩，影相d頭髮又亂哂，雖然呢度風景唔錯，好舒服，其實可以留耐少少，但媽咪真係頂唔順，又怕Ambrose會吹親病左就麻煩，所以行左一陣影左相，都係急急上車去下一站喇！
下一站係海洋博物館，呢個相信係必去嘅地方，又唔係好多人咋喎！呢度真係好舒服，臨海嘅博物館，風景如畫，人唔多，地方又乾淨，真係好好呀！未食野嘅爹爹媽咪十分之肚餓，忍忍忍終於入左去food court食野！點解要忍？本來入口已經有間餐廳食buffet，唔太貴，加上當時好肚餓，真係好想衝入去食，但忍到入food court，就係為左可以坐响塊落地大玻璃前賞魚！海洋公園都有架，不過要食buffet至可以近距離睇魚囉，呢度只係food
court咋，而且條鯨鯊真係好巨，好震撼，好正！本來Ambrose見到其他人可以坐正玻璃隔離睇魚，又扭住要坐，但當時又無位，只可坐在隔一行嘅位度食住睇！但當有人食完離開，我地搬去貼玻璃而坐時，呢個Ambrose又周身唔自在，多番指住我地d位又話想坐，說穿了，原來佢見d咁大條嘅魚响正自己隔離游來游去，佢驚喎！嘩哈哈！
食完野，同Ambrose睇左場海洋劇場，真係好好睇，d海豚好近距離表演，而且仲會好似識笑同唱歌咁，同海洋公園嘅表演，真係幾唔同！
睇完魚，要離開了！入黎時見門口處有個遊樂場好似幾好玩咁，所以同左Ambrose去睇吓！原來係網陣，小朋友可以爬來爬去，Ambrose玩到唔捨得走呀！
下一站，菠蘿園！我地一家咁意食菠蘿，呢度又有菠蘿車揸，一定要黎啦！不過仲以為會有菠蘿摘，原來係無架！買左飛，一入場，就去左一個有少少背景嘅入口，工作人員同我地一家三口影張合照，之後就上菠蘿車！架車好得意架喎，無路軌，係有碌嘅車，但唔知點解又可以自動行架喎！由於架車去自動嘅，爹爹就俾Ambrose坐司機位揸軑盤，俾佢過吓司機癮！架車响個菠蘿園都不停地兜，睇見唔同品種嘅菠蘿，都幾得意！架車去到差不多埋站之前，有個相機又放响高處，又係影相位！之後落左車，就去到紀念品店，睇番之前影嘅兩張大合照，話平又唔平，話貴又唔貴，兩張相連photo frame合港幣百二蚊左右，比起之前去澳門威尼斯人酒店，一張相索價百四蚊，已經算平！因為買齊兩張其實抵d，加上兩張相都影得ok，所以買哂兩張相！賣相旁邊有三個大木桶，桶上各放有一碟叠得好高嘅菠蘿免費享用。個個都係食幾件就行左去，我地呢一家三口，係咁食到唔願走，差不多食哂人地食碟！其實仲好想再食，不過又覺得唔多好意思，唯有向前行！不過最後真係意猶未盡，借Ambrose過橋，面矇矇又走番轉頭再食多幾件至走，哈哈！離開左品嘗區，就係一條one way嘅路，要行哂入面嘅商店至走得！唔係有菠蘿車揸下，媽咪真係會覺得有少少荒謬，要俾錢入去俾人影相同行紀念品店！所以，對於其他人黎講，菠蘿園未必咁吸引了，當然，Ambrose就迷上了，係咁同我地講，想下次再去菠蘿園玩過，好彩佢唔係話即時要再玩多一次，哈哈！
最後一站，去左新都心行街街，見到有Sport Depot，行入去真係有好多運動用品賣，感覺上好似去左d好大間嘅outlet咁！另外，行左反斗城，仲以為同香港嘅差唔多，點知原來日本嘅反斗城有好多野睇，睇到媽咪都兩眼發光，唔想走呀！Ambrose更加係啦，佢去日本之前已經開始迷上海賊戰隊，去到日本，真係好興呢d戰隊產品，種類比香港多好多，上至玩具下至食品都有戰隊，真係處處誘惑，搞到Ambrose都係咁叫我地買野俾佢！媽咪响反斗城嘅最大收獲就係Crayola嘅Mess Free Color
Wonder產品，係Thomas同埋戰隊，香港一定無，仲要1000yen
唔貴，買到真係好開心！
沒有留言:
張貼留言