輕黏土水晶球(3y7m)

見Ambrose嘅N班同學仔報左一間畫室响復活節開嘅水晶球特別班，一來見個水晶球真係幾得意，二來諗住俾Ambrose同舊同學聚吓舊，一齊上吓堂，所以都幫Ambrose報左。由於其他人都報左親子班，所以呢個重任就落在爹爹身上，哈哈！

 

一早報左名又無左件事，早幾日爹爹不斷安排時間諗住同Ambrose睇＂古魯家族＂，度黎度去都無咩時間，只有今日有，所以就買左今日朝早嘅飛，爹爹同Ambrose去睇，媽咪唔睇喇！點知，兩個人度左咁耐，竟然都唔記得左要上水晶球班！仲要係今日上水晶足球，媽咪亦完全無左件事，係同學仔媽咪講話怕落大雨要出去上水晶球班，至赫然發現，原來今日係要上堂，唔記得同爹爹講！上堂係十點至十一點半，戲開始係十一點二，發現原來唔記得要上堂時，係早上八點十！媽咪狂打電話俾爹爹，無人聽，真係心急如焚！水晶球班就俾哂錢，$150，戲飛買左一張，照計要取捨都係一定要上水晶球班。但一早又已經同左Ambrose講瞓醒去睇戲，點可以唔同佢去睇呢？媽咪都未試過咁失策！

 

最終，爹爹九點三回電，知道情況後，即時要先收線準備＂碌＂出去！哈哈哈！最後，有做水晶球，但早走，再去睇戲，所以個水晶球未完全整好哂，應該多番少少其他公仔！爹爹話Ambrose唔係咁enjoy上呢堂，好似有d呆咁，叫佢先去整，踢一踢郁一郁咁，唔知係咪個心掛住套戲要開，驚趕唔切，事關佢睇親show都好緊張，一定要一早入埸，佢可能發覺瞓醒仲未去戲院，個心已經飛左去，如果唔係，正常佢平時同媽咪整輕黏土手工都好開心、興奮同投入，無可能去整水晶球咁唔enjoy！最慘係套戲，睇到中間已經話悶，Ambrose話都係鍾意＂無敵破壞王＂多d！

 

兩邊都不討好！下次媽咪真係要小心d安排至得，點可能撞哂都唔知仲唔記得都有？！