由細到大，Ambrose都唔知點解咁鍾情超人，又或者唔核突嘅都唔鍾意，如變形俠醫。咸蛋超人咁肉酸都鍾意一餐，真係唔明！最近，反斗城開始有海賊戰隊玩具，媽咪知道，Ambrose一定鍾意，好多時侯，媽咪都盡量引佢行去第二邊睇益智玩具！但爹爹就好鍾意同佢去睇男仔玩具果邊，久而久之，Ambrose完全知道玩具擺咩位，媽咪想運路行都唔得！
今日同Ambrose畫完畫後直接出左尖沙咀行街。由於Ambrose今日幅畫畫得太靚，搞到爹爹超開心！Ambrose問爹爹，可唔可以買玩具俾佢，爹爹話要睇佢係咪乖。Ambrose話，但係我已經好乖喇喎，爹爹諗落又係嘅，响心軟之下，竟然答應佢買個Iron Man公仔俾佢，激到媽咪紮紮跳！但當爹爹同Ambrose揀完Iron Man公仔之後，Ambrose突然想起海賊戰隊把槍，大膽地問爹爹可唔可以買兩樣玩具，答案當然係唔得啦！呢個Ambrose真係轉得好快，佢一知唔可以買哂兩樣，就已經話唔要Iron Man公仔，要海賊戰隊把槍，仲即時放低走左去！
呢個Ambrose得一就想二，得寸就進尺，俾佢冧到爹爹買玩具就想要買兩樣，俾佢買呢樣嘅時候又走去揀樣仲貴d嘅，真係唔知好嬲定好笑！其他野又唔見佢轉得咁快！
沒有留言:
張貼留言