上星期日因為要表演，所以畫班又要改今晚補堂，上完畫班其實又要趕住去學小提琴，好彩只係上半小時，都唔太辛苦嘅。畫班係媽咪最唔想影響到嘅一項興趣班，但偏偏就成日都撞時間，所以點趕都要安排Ambrose補堂，唔可以下下延堂！
星期三補堂時間多數都係肥妹老師上，本來都無咩期望，但落堂見到幅畫時，又覺得真係有d驚喜，突然又覺得肥妹老師都教得唔錯，個人隻手用毛絨條綁在畫紙上，可以活動架！問Ambrose係咪個個都畫三個生果咁多，佢又話唔係，但之後見同學仔畫同一張畫，只係畫左一個生果，就諗起Ambrose貪吃個樣！好搞笑！哈哈！
今日爹爹負責湊Ambrose上畫班，佢話肥妹老師都讚Ambrose油顏色叻叻，同埋畫形狀好好。爹爹媽咪當然要加倍誇讚Ambrose一番，以作鼓勵啦！
今晚，媽咪突然諗起Ambrose從來都無提過呢位肥妹老師，而媽咪又唔知點稱呼呢位老師，所以媽咪問Ambrose，肥妹老師叫咩名，Ambrose話佢唔知，媽咪有d奇怪，照計老師都會介紹吓自己，又或其他同學都會叫老師，佢都唔係第一次俾肥妹老師教，無理由唔知！媽咪再問Ambrose，咁平時佢會點叫呢個老師，Ambrose好快就話，叫佢＂肥肥＂囉！真係俾佢笑死！下次媽咪一定要記住問吓老師點稱呼至得了！
沒有留言:
張貼留言