見上堂同學仔放學係畫恐龍，真係啱哂Ambrose！放學時就見 Ambrose攞住幅畫出黎，媽咪第一個反應竟然係問，呢隻係咪馬？之後Ambrose有d不悅咁話，係恐龍黎架，真係唔好意思，媽咪完全忘記左，竟然衝口而出咁講，哈哈！不過媽咪覺得個城堡畫得好靚，已經即時讚美一番，希望Ambrose唔好覺得媽咪踩佢嘅作品啦！
由於覺得個城堡真係畫得幾好，媽咪忍唔住問Ambrose係咪佢畫架？Ambrose話係，而老師聽見媽咪咁問，亦即時話係Ambrose自己畫嘅，仲講解幅圖係點，例如佢話Ambrose話隻恐龍係好嬲，所以隻眼畫左好多＂紅筋＂，不過Ambrose用左藍色黎畫，仲有噴火！個城堡有好多間房，所以畫左好多格！
今朝同Ambrose搭車去畫班，佢問媽咪點解表姐成日都要跟佢做手工，跟佢畫畫？媽咪不以為意，以為意思係點解畫班成日都同表姐一齊上（因為其他興趣班都係Ambrose自己上），媽咪就話，因為佢地一齊上畫班，大家都會一齊畫同樣嘅畫或做同樣嘅手工，唔係人地跟佢，而係大家一齊上堂，做嘅野都差唔多啫！點知今日放左學後去左食lunch，放低左本畫薄食完飯返去攞時，可能呢個時間無咩學生，老師就有多d時間同媽咪傾。咁啱，老師同媽咪講，話Ambrose畫畫嘅技術幾高（以同齡小朋友比較的話），而且佢自己有自己idea想畫咩，個腦已經有個畫面响度，唔使人幫同理；反而表姐就成日要跟Ambrose，所以都要諗吓辦法點去幫佢喎！經老師無啦啦咁講，再諗起朝早Ambrose無啦啦講話表姐跟佢，突然明白，原來Ambrose係想話表姐要跟佢做一樣嘅畫同手工，唔係話點解表姐要同佢一齊上畫班！
老師嘅評語，有d似曾相識，之前上英文班間中心有免費畫班上左兩堂，加上又有上過同一中心嘅暑期托管坊，中心老師都熟悉Ambrose，亦有向媽咪講過，Ambrose個腦已經有個scene响度，自己有idea要畫咩，叫媽咪好好栽培Ambrose畫畫！再一次有畫畫老師有同樣嘅評語，媽咪當然高興，老師嘅讚許係Ambrose嘅肯定。但，每一次嘅讚許亦為媽咪帶來煩惱，究竟，咩叫好好栽培？而家俾Ambrose畫嘅畫班，夠唔夠呢？使唔使要更好？點樣至可以幫到Ambrose提昇？定還是應該keep住而家咁就夠？等佢自由發展？
揠苗助長同悉心栽培，好可能只差一線，媽咪要不斷反思、盤算，究竟，點樣至係對Ambrose黎講係好？係夠？呢個問題，真係好深！
沒有留言:
張貼留言