好耐都無update到Ambrose跳舞方面嘅進展喇！其實媽咪响Ambrose兩歲半時已經偷步俾佢去左文協度學芭蕾舞，一直都相安無事。去到三歲後，見佢無抗拒跳舞，又想俾佢有多d表演同比賽機會，所以同佢轉左跳舞學校，兼上芭蕾舞同小演員班。從來都無諗過轉校有咩問題，只因為Ambrose一直以來都對上興趣班似乎無抗拒同掙扎，點知就係轉左校之後，佢次次都喊，又唔願入課室，搞到媽咪心情都好低落，成日諗，究竟自己有無做錯到呢？好彩調左上課時間同埋換左對芭蕾舞鞋之後，情況開始穩定，而且Ambrose亦不時同媽咪講，話自己好鍾意跳舞。之前嘅擔心、迷惘終於從Ambrose嘅反應得以磨滅，雨過終於天清了！
雖然轉了新學校學跳舞只有八個月，Ambrose大大話話學跳舞都有十四個月了，終於都等到考芭蕾舞試了！其實考唔考試對於Ambrose都無咩大分別，可能媽咪覺得佢係男仔，芭蕾舞係咪要長遠學落去都係未知之數，不過既然現階段點都會俾佢學嘅話，錢又俾左，當然考埋個試，點都好d嘅！對於考試，媽咪真係無咩感覺，因為Ambrose學左芭蕾舞咁耐，幾乎從未响家中表現過出黎，爹爹媽咪對於佢學左年幾跳舞，究竟學左d咩，識跳d咩，完全唔知！無所謂啦，只要Ambrose鍾意，興趣班又無需咁緊張嘅？！Ambrose咁多樣興趣班之中，跳舞係最令爹爹媽咪感覺輕鬆嘅一項，完全唔理佢，亦唔需要計較得失！
跳舞學校响考試前曾安排左一日俾家長入課室觀課同了解考試，但由於當日有個繪畫比賽要參加，所以無去到。事後問過老師，對於Ambrose嘅芭蕾舞試嘅信心係點，因為始終無見過Ambrose跳過，真係好疑惑究竟有無問題，老師一句話無問題，Ambrose可以做到，媽咪已經放心了！
四月十日，芭蕾舞考試，媽咪無請假，由爹爹負責湊Ambrose去。之前同佢打定底，話有叔叔姨姨想睇佢跳舞，佢已經話唔跳俾人睇，真係令媽咪有d擔心！爹爹話Ambrose去到跳舞學校見咁多女仔响門口裝扮，家長又好似好緊張咁，同平時上堂情景好唔同，佢似乎有d怯場，唔想入去，真係抹一把汗！好彩老師拖佢入去佢都肯，入左課室應該無咩問題！仲諗住好放心之際，老師出黎話因為考試唔可以戴任何飾物，要同Ambrose除哂身上嘅鏈，簡直攞佢命根咁濟，好彩，最後半推半就都搞掂左！
芭蕾舞考試順利完成！結果要等兩個月後至知了！
沒有留言:
張貼留言