今次係十二點機，好似唔太早咁，但其實計番兩個鐘前要同機場，又要預去Traveler’s Lounge食野同行一陣，竟然最後都要七點幾起身！今次去Traveler’s Lounge，可能係最後一次了，因為個receptionist話三歲開始要收費喇！
食食吓野嘅時候，爹爹攞左張機票出黎睇，先至發現唔知點解一齊check in，但竟然安排我地一家三口坐唔同位置！其實之前爹爹發現唔知點解媽咪同Ambrose嘅位一早俾人劃死左，但爹爹就無！爹爹登機前兩日嘗試網上劃位，但唔知點解block左唔俾劃，但諗住一齊check
in空姐會安排好坐位架麻！食完野急急又搵左airline
counter問啦，點知果度d空姐又話佢地搞唔到，因為係出面嘅空姐整喎，又話我地隔離個位block左唔俾郁，應該係有人book左果個位，真係唔明，點解會俾人book左而我地又book唔到！個空姐仲話同左閘口同事講左盡量安排番我地一齊坐，但佢唔肯保證一定可以，只係不斷話同左同事講左，簡直係想耍我地走咁！我地真係好無奈，咩都攸唔到，但又好嬲囉！
去到閘口附近，竟然有個booth係俾人响果度畫畫油顏色，Ambrose見到當然唔會放過啦，即時入左去油顏色玩貼紙！畫好嘅畫仲可以貼出黎展覽，Ambrose不知幾開心！响Ambrose畫畫嘅時候，爹爹又去左閘口交涉，返來嘅答案，仍然係唔保證可以一齊坐，爹爹話佢去交涉時，又遇著另一家庭，同我地遭遇一樣！真係唔明，點解airline可以安排得咁差！！！
等了又等，臨上機一刻，終於有個空姐走黎同我地講，佢地settle到可以俾我地一齊坐，呢d其實真係好基本好簡單嘅要求，唔知點解好似變成皇恩浩蕩咁！
飛沖繩只係兩個鐘左右時間，所以上得機食得野，時間其實都好快過！沖繩機場極之細，幾乎一入入境大堂，就係行李帶咁濟，開嘅counter又唔多效率又慢，好似幾落後咁！本來我地早落機，前面仲有一個就到我地入境，呢個時候Ambrose又話急vivi ，叫佢忍一陣都唔得，結果，去完廁所出黎，好多人已經入哂黎，搞到我地等左三、四個字先至過到關！
Book左Hotel Bizfort，响正單軌列車隔離，機場搭過去只係幾個站，好方便！Ambrose見到司機位全玻璃，不知幾恨坐司機後面，點知個位俾人坐左，佢好傷心呢！
酒店房比想像中大，起碼唔係好似東京果d一行入房就係床，個廁所仲分開左坐廁同企浴，算係咁啦！床邊仲有空間開到喼，我地帶住Ambrose都唔覺太迫！
今日行程無咩特別，只係行吓國際通，同埋target左食海鮮餐！原本爹爹打算食龍蝦刺身，但媽咪考慮到Ambrose都想食，最終，龍蝦頭煲湯，龍蝦身bbq，但出黎效果就好一般，感覺上好浪費囉！夜光貝兩味，一味係刺身，一味係小炒，原本爹爹話聽人講一般好味，但媽咪又覺得幾好食喎！Ambrose直情係咁夾小少夜光貝，好欣賞咁！仲有椒盬大蝦，本來無咩expectation，價錢算幾抵食，但整落原來呢樣最好食，哈哈！去到沖繩當然要試吓苦瓜，叫左碟苦瓜炒蛋，勁削，唔似炒，似芍多d囉！唔好食！
食完飯，又行番國際通返酒店，其實都無咩行，果度間間店舖都係賣野食，仲要間間賣差不多一樣嘅野，就好似赤柱大街嘅感覺。本來未食飯前都想話行去三越，點知去到已經就關門，原來三越關七點半，使唔使咁早？！
沒有留言:
張貼留言