本來張通告話係去將軍澳表演，但到表演前又出左一張final嘅通告，原來改左去馬鞍山！時間未知，但就需要十一點半回校集合綵排，一點鐘出發！其實之前問過咁早返學校搞成個幾鐘至出發係做咩，receptionist話係執吓d衫同頭髮，同埋綵排，媽咪就覺得男仔無咩好整，又唔使化妝，其實有無必要咁早去到，但爹爹話綵排喎，唔可以遲，所以表演當日，都係準時去到學校！去到學校時，其實好多女仔都返左去，坐左响度set頭化妝，Ambrose見到咁死都唔肯入去，媽咪心諗，一開始就出師不利，唔知今日Ambrose又會唔會好似上次咁唔肯上台表演呢？
見Ambrose咁抗拒，唯有同佢一齊入課室坐低，warm up吓先！見到有家長幫小女孩們化妝、set頭，媽咪就覺得有排等了，似乎都未有咁早可以綵排到，但既然Ambrose已經坐定左，媽咪又不便同佢再出去行吓再返過黎啦，所以都係等吓！一心諗住男仔無咩好搞，所以都無同Ambrose整頭髮，但老師話要gel吓頭髮，醒神d！Ambrose一聽見要整頭髮，又有少少抗拒，係咁縮開，媽咪用Iron Man黎氹佢，話Iron Man頭髮都係gel到高起左，好型架，佢至肯俾人搞個頭，仲噴埋閃粉，哈哈！set左頭嘅Ambrose，加上今日突然走出黎嘅雙眼皮，真係好靚仔（其實仲有d似女仔添）！
Set完頭，其實無咩好做，只有等，等到大概十二點半左右，真係綵排喇！由於課室無關門，媽咪終於可以睇吓Ambrose跳舞。其實都無咩特別，都係揸住粒導具大糖跳吓fing吓，但成班小朋友都响度跳，其實都幾可愛！
一點鐘，出發了！Ambrose霸左頭位，坐响司機後面，可以一路睇住司機揸車，不過就辛苦少少囉，佢坐响度睇唔到，所以索性企正响司機後面唔郁，企到出馬鞍山！哈哈！
出到去，老師同負責人傾完之後，就同家長講可以自由活動一陣，三點再集合，果時都只不過係一點幾！好啦，又唔知要等到幾點至表演得，就趁呢個時候去食野！去左大快活食左個下午茶餐，Ambrose徒手揸住隻雞脾係咁食果樣應該嚇親其他家長！算罷！小朋友應該係咁食架啦，無理由俾刀叉佢切掛？！哈哈！
食完下午茶回去集合，發現個頒獎禮三點至正式開始，而老師其實無rundown，完全唔知究竟幾時到我地上台表演，就只有等！大人當然無問題啦，成班小朋友一早出發，搞左幾個鐘，仲要响個商場度，人迫人，無野玩，又應該係晏覺時間而無得瞓，真係幾慘！Ambrose就不斷問幾時表演，眼見佢嘅雙眼皮越來越深，媽咪真係好擔心唔知佢捱唔捱到？又或是就算捱到，會唔會到時又會好扭擰耍脾氣，結果係唔肯上台呢？
無了期嘅等待，真係好辛苦，小朋友辛苦，大人更辛苦，搞左咁耐已經好悶，現埸環境已經又嘈，又要金精火眼咁睇住Ambrose，佢有無窮嘅精力，偏偏又要被困在人多嘅商場度無處宣洩，困獸鬥咁！媽咪每一分鐘都膽戰心驚，卻又無可奈何！
終於，等到大概四點半左右，可以進入圍欄內準備，有眉目可以表演了！但入左去入面之後，更迫、更嘈，而且家長唔可以再同小朋友一齊迫在台邊stand by，媽咪爹爹真係好擔心，唔知Ambrose頂唔頂得住，希望佢地可以快d上到台，快d表演就好喇！對於等左五個鐘嘅爹爹媽咪黎講，司儀响台不斷嘅說話，簡直有如幾個鐘咁漫長，呢幾分鐘簡直係一種折磨！等左五個鐘，响咁惡劣嘅環境之下，唔知Ambrose上台果一刻，會唔會發難？會唔會扭計喊唔上台？心急，真係好心急，爹爹媽咪係幾咁期昐，Ambrose可以盡快上台！
終於，終於都等到表演時間，見到Ambrose順利上台。之前Ambrose已經叫媽咪要坐第一行，對住佢睇佢跳舞，但現場根本無位可坐，爹爹媽咪只有去到坐位嘅最後排，仲要最側的一個位！見到Ambrose上台後都有望吓搵吓爹爹媽咪，但搵唔到都無咩野，繼續跳舞。雖然佢跳到甩哂bit，唔係幾跟到，都係靠睇住前排嘅姐姐跳，但見佢都好努力跟上，仲好開心展露笑容，爹爹媽咪非常欣慰，比起五個月前嘅另一次商場表演，死都唔肯上台，Ambrose又進步左喇！表演完畢，Ambrose仲未見到爹爹媽媽，爹爹就大叫Ambrose個名，好似d明星fans咁，其實都幾搞笑！Ambrose聽到之後，終於見到我地，好開心咁同我地揮手，總算俾佢知道，爹爹媽咪有一直睇住佢，無走開過！
表演完，仲要等Purple姐姐下台影大合照，又等左唔知幾耐，不過表演完心情放鬆哂，無之前咁辛苦了！因為學校仲有一組表演，要等埋表演至可以齊齊搭旅遊巴回程，最後，差不多近六點至上車回程，真係用左一日時間，表演左幾分鐘。Ambrose上左車仲堅持要睇司機揸車，但佢實在太攰，睇左一陣後，忍唔住坐番上個位度，一分鐘唔夠就瞓著左！辛苦哂了，Ambrose！
曾經，响等待嘅時侯，媽咪真係有後悔同Ambrose報名表演，仲要拉埋爹爹一齊咁辛苦，就係為左果幾分鐘表演時間！有家長話，表演無證書，咁辛苦下次都唔會再報。其實，媽咪覺得有無證書都唔緊要，當初係本住想Ambrose大膽d自信d至同佢報小演員班，唔係為左證書而學。再者，呢d表演證書又有咩用？其實真係無關痛癢。辛苦，係真係好辛苦，又花時間，但當見到Ambrose順利上台一刻，所有辛苦都化作感動，感動Ambrose嘅獨立自信又可以跨進一小步；見到Ambrose開心投入地跳舞，所有辛苦亦變得值得。每一個進步及成長未必會得到一紙真實證書，然而，响爹爹媽咪心目中，呢一張證書已經在心中了！
沒有留言:
張貼留言