我的生日@2013

今年生日，並無特別慶祝活動！本來亦不打算請假，但表姐自加拿大回港，和她夾時間出來相聚，怎夾也夾不到，又不想她老遠的走來我公司和我食午飯那麼辛苦及趕急，最後決定生日請假，與表姐聚聚。

早上起來，先送Ambrose上校巴，然後回家收拾了一回，出市中心與舅母及表姐食早餐，這一餐聊得不知時間。很快地，又夠鐘接Ambrose校巴了！和表姐回家放下手信，再去接Ambrose放學，真的很難得！一家三口和表姐齊吃午飯，之後，我就同表姐去葵芳行街shopping！很久也沒有這樣悠然逛街了，行小店很有尋寶的感覺，不錯不錯！買了些衣物，大家都心滿意足，哈哈！

告別了表姐，我就出發去銅鑼灣會合老公吃晚飯。之前說想要吃泰菜，所以book了泰簡單試試！但因為大家都吃過下午茶，飽飽的，所以沒叫太多東西，點了湯、沙律及兩、三款菜式，已經吃不下甜品了！

 

吃完晚飯，很早，本可以四圍逛逛才回家，但感覺今天已經掉下Ambrose很久了，心裡著實記掛他，所以也沒四處逛便搭車回家了。

純粹購物@廸士尼樂園 (4y2m)

早幾日收到message，持有廸士尼樂園annual pass於指定日期內入園或酒店購物可享六折優惠，真係啱哂！剛剛之前入園時就見有件Mickey Mouse浴袍幾啱Ambrose冬天學游水時上水著，可以包到實暖少少，而家果件過頭笠史廸仔毛巾衣，兩邊迫鈕太鬆入哂風，只啱夏天游水用。上次見到成$300唔捨得買，仲諗住再出去睇吓其他先，無啦啦就收到message有折，所以，媽咪決定今日收工直入廸士尼入貨！

土人 @ 22周年舞蹈劇《夢》 (4y2m)

每年，Ambrose嘅跳舞學校都會搞舞蹈劇大匯演，俾各學生有演出嘅機會，上年，Ambrose剛轉來學舞，有幸趕得切參加，果次，仲係Ambrose人生嘅第一場舞蹈表演添，所以特別緊張難忘！

 

今年，學校再搞大匯演，早幾個月前已經可以去學校買飛，可惜開賣時間係office hour，真係無理由為左買飛睇表演而去請假吧！所以收工至去買飛時，中間位置已經無哂前幾行了！為左坐前少少，唯有坐側面嘅冷巷位，希望Ambrose可以搵到爹爹媽咪啦！

 

今年八月起，Ambrose已經無再參加小演員班，所以都只係隨堂排舞。今年佢要表演嘅舞蹈劇叫《土人》，有日湊佢去跳舞時，媽咪問及Ambrose在課堂上有無情緒問題，老師就話唔發覺有唔同，而且老師提到Ambrose好creative，在排舞時經常會自己諗到一d動作，帶動到其他同學跟佢做，老師見動作又好符合角色，所以，有d動作係跟左Ambrose嘅創意做出黎嘅！當時，媽咪都無暇理會老師嘅分享，只著眼於究竟Ambrose情緒上係咪真係已經復原。 

Pattern @ School Worksheet (4y2m)

而家學校唔知係咪都會整d半頁嘅worksheet俾小朋友玩，有次見到Ambrose書包內有填色紙，問佢佢就話係老師俾嘅，再問佢點解會俾，佢就話係唔玩玩具會俾呢d紙架喎！都唔知真定假，但好肯定一定唔係功課囉！如果真係唔玩玩具可以油下顏色，都係一個唔錯嘅選擇嘅！ 

Pre Halloween 派糖 (4y2m)

屋企附近嘅商場日間有Halloween節目，不過因為下午Ambrose要瞓晏覺，瞓醒左又要學游水，所以錯過了！但，諗住既然有活動搞，應該有唔少人會著Halloween打扮黎到，所以，雖然活動完結左，游完水後，爹爹媽咪都有帶Ambrose過去商場果邊湊吓熱鬧、派吓糖！

凍到紫 (4y2m)

雖然有幫Ambrose買左件保暖泳衣，但最近的天氣，其實又唔係凍，只係落水會凍一點，所以都未出動連身保暖泳衣住，只係同佢加多件保暖背心就算。

星星老師@第十六堂(4y2m)

今堂Ambrose畫左隻貓貓！好搞笑，佢畫到隻貓伸左條脷出黎，個樣好似想食左魚缸嘅魚咁！咁都俾佢諗到！

 

Ambrose話佢畫到隻貓好惡，老師就話，都唔係好惡啫！

初試 Sudoku (4y2m)

今晚攞左盒My First Code Sudoku出黎同Ambrose試玩。

回歸＠創意畫班 (4y2m)

打從九月開始，媽咪就無為Ambrose繼續周末畫班了！原因很多，譬如係，已經有兩個畫班，似乎又無需要就同一範疇再花時間學；譬如係，所報嘅興趣班越來越多，想為Ambrose騰空多一天free day，好讓佢有點無聊時間；譬如係，之前總覺得畫畫技巧停滯了，並無突破，所以想停一下想一下；譬如係，媽咪都想星期六日有一天free day可以瞓晏少少，不用早起帶興趣班，偷懶一番，諸如此類的理由，令媽咪忽然就無去交學費，無聲無息咁停了！

以為Ambrose會唔記得或唔留意自己少上一個興趣班，誰知九月尾時，Ambrose無啦啦有一晚問起媽咪，點解咁耐都無得去Ms Chen Chen度畫畫？！Ambrose仲話好掛住Ms Chen Chen添！認真地問過Ambrose，如果再上　Ms Chen Chen的畫班，不如cut一樣其他興趣班，但經一輪討價還價，佢都唔多願意cut其他興趣班，結果，媽咪又要左度右度佢嘅時間表，諗吓係咪可以再加番呢個畫班俾佢，而又可以保有佢嘅free day呢？

IPNG同學仔哈佬喂gathering (4y2m)

今日約左IPNG同學仔黎樓下會所gathering，可惜爹爹要返工！由於臨近萬聖節，大家提議搞番個化妝晚會。不過媽咪一直都無買Halloween嘅造形衫俾Ambrose，家中亦無化妝品，所以都無同佢搞造形，只係同佢著番Batman衫算數，有件斗蓬佢就已經覺得好型了！

識到呢班同學仔，真係好感恩！由佢地細細個返N班，到而家已經K2，真係可以話睇住佢地大！呢班同學仔同Ambrose都可算投契，最重要嘅係，家長們對Ambrose粗魯行為並唔會有過於激烈反應，唔使媽咪一步一驚心咁貼身睇實佢，媽咪真係輕鬆不少！

星星老師@第十五堂(4y1m)

今堂Ambrose畫左個Superman，哈哈！爹爹話去接放學，老師都仍然係同佢講 Ambrose好有主見，自己諗好哂要畫d咩，唔使人幫佢，幾乎係每堂都會講嘅comment，媽咪反而想多聽聽畫畫技巧方面嘅comment多d，哈哈！

 

老師話Ambrose畫完個人之後，話想畫Superman斗蓬，於是老師就同佢講，斗蓬可以以線條畫成，估唔到咁講之後，Ambrose明白並自己畫左個斗蓬出黎！出去上堂其實真係幾好，媽咪絕對無美術天份，亦無創意，如果俾自己教，可能都係教佢就咁畫完油密d顏色就係斗蓬，老師教用線條畫成斗蓬，唔使油之餘亦好突出！讚！

Gigo Connect a Cube (4y1m)

買左盒Gigo Connect a Cube好耐，之前Ambrose細，發現cube都幾實下，佢要好大力至砌到，所以曾經收埋過。及後因為搬左屋，好多玩具都擺返哂入佢房，佢會耐唔時摷d開左又唔係成日玩嘅玩具出黎自己玩。唔知係咪男仔都鍾意砌野，Ambrose已經成日砌Lego，估唔到佢摷到盒Gigo Connect a Cube之後，成日都攞出黎玩！本來呢套教具係用黎教數學，不過媽咪都無理，見佢自己摷左出黎當Lego咁砌，一直都無理佢！有時佢會攞黎砌字母，好多時，佢係會攞黎砌槍槍劍劍玩一餐，呢隻cube用黎砌槍劍比Lego好，就係因為佢比較實，砌完d槍劍揸上手玩都無Lego咁易散，哈哈！

登高體驗 (4y1m)

唔知係咪老師响學校講重陽節嘅故事，Ambrose就同爹爹媽咪講話要去山上面！之前國慶節，Ambrose曾經嚷著要去睇升旗，話係老師叫架喎，無同佢去睇已經好緊張係咁嘈住哂，又差d喊埋出黎！原本尋日去左大坳門放風箏，媽咪已經當係去左登高的了，點知今朝早起身，爹爹話要去樓下嘅行山徑行山登高喎！

尋晚至同隻野豬精神上角力左一番，玩左成日已經好攰，今朝早根本起唔到身，唔好話仲要去行山，無運動開嘅媽咪真係散哂，想唔去，但敵不過爹爹嘅遊說，答應了！起左身，媽咪聽到爹爹同Ambrose以下對話： 

保暖泳衣 (4y1m)

不經不覺，一期十堂嘅泳班完左！剛巧步入九月，如果繼續上泳班，就會橫跨到冬天去，爹爹媽咪商量應唔應該俾Ambrose冬天繼續學落去。朋友嘅經驗係，要等一季至再開始學番，之前所學嘅好大可能忘記哂，要從新黎過！由於係私人一對二咁學，加上見Ambrose嘅不斷進步，媽咪當然唔想白白浪費之前嘅課堂啦！室內池已經係暖水，問題不大吧！所以，媽咪決定繼續學落去，雖然未必一時三刻學得識，但當係強身健體嘅運動，兼訓練一下意志，都係一件好事吧！

及至早兩星期前，媽咪發現，原來天氣涼了，即使係暖水池，落水點都會有點凍！而家都有件保暖背心著下，冬天得十幾度時應該頂唔住吧！因此，媽咪決定快快買件保暖泳衣俾Ambrose，以防入季好易斷碼！

大坳門放風箏+與野豬BBQ (4y1m)

一早已安排了今日同爹爹嘅朋友們去大坳門放風箏加BBQ，Ambrose知道同行中有小朋友可以一齊玩，不知幾期待！

事前都有諗過重陽節會有好多人去BBQ，只係大家都好天真咁去諗，咁唔就腳，應該唔會太嚴重吧！點知，未入停車場已經大排長龍，沿路已見好多人落車行入去，又或者有d車已經忍唔住掉頭走！因為已經瞓左晏覺，Ambrose上車唔需要再瞓，所以行車期間佢已經不斷問點解咁耐。到架車排隊入停車場，停哂响路上郁都唔郁，佢嘅耐性幾乎到極限！於是，媽咪落車探路，原來距離停車場都唔算遠，而停車場入去風箏場亦唔係太遠，媽咪都尚算認得路，於是，決定同Ambrose落車去玩住先，爹爹就要繼續排隊泊車了！

殺人鯨擱淺了 (4y1m)

Ambrose星期二搭校巴返學時嘔，嫲嫲趕去學校接走佢去睇醫生，Ambrose仲好搞笑咁打電話俾媽咪，話佢自己嘔左三次，問佢有咩唔舒服時，佢竟然話心跳喎，真係好好笑！

 

休息左兩日，見佢都無咩野，燒又發過退過喇，只係胃口一般，所以都有俾佢返學。返左兩日學，又唔覺佢有咩太大問題，應該都好番喇掛！

 

今晚要學游水，學之前同佢去食左晚飯，仲驚佢無咩胃口食得少無力游水，點知佢又好好胃口，反而食到媽咪又驚佢飽得濟！

轉讓：Bingo Bottle

Bingo Bottle係可以自己入水彩入去，小小朋友揸住印點點作畫，又或者當畫筆咁，唔使開哂壇玩水彩，唔使用畫筆點顏色周圍滴，就有源源不絕嘅顏色俾小小朋友任意畫，方便又乾淨！ 

轉讓：Washable Metallic Stamp Pad

除左Jumbo Washable Stamp Pad外，亦有呢隻Washable Metallic Stamp Pad，無Jumbo果隻咁大，official size係51/4” X 6”，小朋友手細或將就少少都可以放到入去嘅！

 

當初買呢個原因只係因為要砌夠數買，哈哈！同埋因為係Metallic色，夠特別，可以教Ambrose在黑色畫紙上做手工，所以買埋！其實呢個size雖然比Jumbo細，但其實都比一般印台大！市面上有d大印仔，好似easy grip stamper，其實都唔易搵到大印台，呢隻stamp pad就夠大喇！

轉讓：Jumbo Washable Stamp Pad

之前幫Ambrose响美國網站買左唔少Art and Craft嘅用品，執櫃時發現原來有d都仲未開黎玩。

Jumbo Washable Stamp Pad係一個超大嘅印台，official size係6”L X 7” W，小朋友手仔剛好可放哂入去。咁大個印台有咩用？之前就係特登買黎俾Ambrose印手掌腳掌，未有呢個Jumbo Washable Stamp Pad時，要玩印手印腳，媽咪要用海棉加顏料俾佢印，但顏料好快俾海棉吸乾，要不斷加顏料至玩到，而且顏色會唔均勻！有左呢個Jumbo Washable Stamp Pad，唔使煩，幾時想玩都得！呢個Stamp Pad係Washable嘅，玩到幾污糟都無問題，好易洗得乾淨！

再試Snakes and Ladders (4y1m)

今晚再同Ambrose玩Snakes and Ladders，呢個人真係唔輸得架，一開始本來佢又係帶離媽咪好遠，沾沾自喜，點知佢後來勁踩蛇，係咁跌番落去，佢竟然話停左去再玩過，又話要再玩多一局，擺到明知道自己好大機會輸啦！媽咪係咁引導佢一定要繼續玩，嬴輸都唔緊要。最慘嘅係當佢係咁踩蛇係咁落時，媽咪就係咁上樓梯係咁上，簡直係逆轉左個局面！

白板貼 (4y1m)

未搬家前，Ambrose有一塊超大白板鑽左上牆，佢可以隨時隨地攞起筆就畫。搬左家之後，呢塊超大白板無左，取而代之嘅係一塊小型白板，可以自由咁攞黎攞去，鍾意响邊度畫畫都得！不過，唔知係咪所用嘅白板筆唔得定係白板刷唔得，Ambrose成日畫完都刷唔得乾淨，結果佢攞住塊板成日周圍放，搞到好污糟咁，媽咪忍唔住掉左！

 

其實Ambrose畫畫會畫在紙上多，媽咪以為掉左塊白板，佢會唔記得，亦都無咩需要一定要在白板上畫畫，所以一直都不了了之。直至最近，Ambrose追問白板嘅下落，媽咪唯有如實同佢講，塊板太污糟，寫左上去又刷唔到，壞左掉了，哈哈！點知佢就好失落咁話好想要番塊白板！

再試Lego Mosaic (4y1m)

以為Ambrose對Lego Mosaic三分鐘熱度，砌完上次間屋，都應該以後唔再拆，掛在房內。點知，今晚佢突然話要再玩，當媽咪話底板得一塊，要拆左間屋至有得再砌過，佢又好順攤肯拆喎，真係神奇呀！

 

今次佢揀左砌恐龍，條脷係平時Lego果d旗，都幾得意！哈哈！

星星老師@第十四堂(4y1m)

今堂整黏土，其實都唔算難整，都係有個人仔嘅框架，包番d黏土上去就係！老師今日又同爹爹講，Ambrose好有自己主見，而且唔使人理佢幫佢喎！好似今日老師話個人仔點整點整，Ambrose都有講佢想點整，佢仲話想整美國隊長帽，帽上仲要有個A字喎！

Home Art Jamming @Super Heroes (4y1m)

早兩日爹爹俾左Ambrose睇左一陣復仇者聯盟，睇左一個鐘都無。。。。。

轉讓：加法練習@精英出版社

呢本都係買遲左，又無時間同Ambrose做，所以決定轉讓，內頁請看下圖，轉讓價$8，有興趣請留言。

轉讓：初學加法@精英出版社

呢本買得遲左，再加上買左又無即時同Ambrose做，有部分佢都已經識了。加上興趣班每星期有功課要做，都無時間同佢再做自己的workbook，所以決定轉讓，內頁請看下圖，轉讓價$8，有興趣請留言。

轉讓：abc練習@精英出版社

呢本workbook主要係細楷英文練習，有copy book形式嘅寫字頁、字母index coloring、matching同dot-to-dot等(內頁請看下圖)，轉讓價$8，有興趣請留言。

課外活動 (4y1m)

見到呢本課外活動，立即又覺得幾啱Ambrose。呢排佢上興趣班好似無左d安全感，有時都會話點解咁耐都未放學。雖然呢本書嘅內容唔係咁exactly講呢個情況，不過媽咪諗住可以自己發揮演繹一下，安撫吓佢最近不安嘅情緒！

木木耳朵不見了 (4y1m)

趁大眾書局秋季減價，媽咪又去搵吓有咩書啱Ambrose睇。呢本木木耳朵不見了，大概係講同朋友相處之道，唔可以霸道同欺負朋友。當Ambrose睇到木木雙耳無左嘅時候就哈哈大笑，媽咪仲以為佢會覺得木木好可憐添！似乎可能要搵D同理心嘅書俾佢至得喇！

My First Code Sudoku (4y1m)

買Pentel Oil Pastels嘅時候，見到呢盒My First Code Sudoku。

Pentel Oil Pastels (4y1m)

之前Ambrose上畫班一直用開STAEDTLER jumbo size嘅油粉彩，但用左太耐，有好多已經短哂、斷左同埋唔見左，再加上個盒舊左，盒顏色套番入去個紙盒之後，再打直放入個畫袋度，d顏色都會响側邊位跌哂出黎，搞到一袋都係顏色，次次都要執，好煩呢！盒顏色新嘅時侯都無咁嘅問題，於是媽咪就覺得可能係紙盒開始軟，所以至會咁樣跌哂出黎！

Home Art Jamming @人、蟹、車、魚 (4y1m)

Ambrose又係畫人呀、魚呀、車呀、蟹呀！今次佢畫嘅蟹無蟹箝，應該係忘記了吧！今次嘅人，好特別，心口有朵花，唔知咩意思呢？！

Home Art Jamming @一家人 (4y1m)

自從Ambrose識得打電話之後，好多時佢都會問嫲嫲攞電話打俾爹爹媽咪，事關嫲嫲仲用緊舊式電話，無touch screen，對於Ambrose黎講，一粒粒制確切地撳到係較易嘅！今日佢上左校巴無啦啦嘔，於是又要勞煩嫲嫲去學校湊佢走！

 

閒來無事响屋企無咩野做，一個下午就收到Ambrose電話兩、三次！每次一收到佢電話，把聲就要變到好卡通咁，自己都覺得好搞笑！

Home Art Jamming @Bears (4y1m)

唔知幾時畫嘅Bear Bear，不失可愛！

初試Snakes and Ladders (4y1m)

之前試過幾次同Ambrose玩飛行棋，可能又多顏色又要跳棋同炸棋，有時又話雙數至起得機咁，搞到Ambrose好似好混亂咁，仲會玩玩吓話唔玩走左去！所以，媽咪覺得Ambrose應該要試玩d再簡單少少嘅board game！早排响反斗城買左盒Snakes and Ladders　Board Game，只係擲骰向前行，特別嘅都只係見到ladder向上行，踩到蛇就行下落，應該都唔算太難吧！

星星老師@第十三堂(4y1m)

今堂Ambrose畫左一隻大紅蘿蔔同三隻小白兔，好可愛呀！Ambrose話老師講左個故事先至開始畫嘅。媽咪叫Ambrose講個故事俾媽咪聽，佢就話有一日有個農夫見到一隻好大嘅紅蘿蔔，然後佢就話咁大隻紅蘿蔔，大件事喇，要抆佢出黎至得！之後，就好大力抆紅蘿蔔，再之後，有兩隻白兔仔幫手一齊抆，再跟住，佢就話講完喎！哈哈哈！睇黎，Ambrose嘅複述能力都仲係好弱！媽咪再問，又話有個農夫發現隻紅蘿蔔嘅？咁點解唔見左農夫，得三隻白兔仔嘅？Ambrose呆左一呆，好似唔知媽咪講咩咁！媽咪再問一次，個農夫去左邊呀，做咩三隻白兔仔抆紅蘿蔔嘅？跟住，Ambrose就話，白兔咪農夫囉！