再試Snakes and Ladders (4y1m)

今晚再同Ambrose玩Snakes and Ladders，呢個人真係唔輸得架，一開始本來佢又係帶離媽咪好遠，沾沾自喜，點知佢後來勁踩蛇，係咁跌番落去，佢竟然話停左去再玩過，又話要再玩多一局，擺到明知道自己好大機會輸啦！媽咪係咁引導佢一定要繼續玩，嬴輸都唔緊要。最慘嘅係當佢係咁踩蛇係咁落時，媽咪就係咁上樓梯係咁上，簡直係逆轉左個局面！

雖然媽咪都係諗住教佢輸都唔緊要，又或者而家好似輸緊但可能唔係架麻，但媽咪見形勢突然逆轉得咁緊要，都唔多想佢輸得太多！個心都好急吓！

 

點知，世事嘅野真係估唔到，本來Ambrose由高處係咁落，落到最後去番最底果行，媽咪已經上到去差不多最高果行，佢竟然後來又追番上黎，最後仲要同媽咪同處最頂果行，大家要擲中1先至可以嬴，結果，竟然俾佢擲中嬴左！

 

本來，媽咪係驚自己嬴得太多佢輸得太慘，有一刻都諗過唔好俾自己嬴到呀，點知到同Ambrose同一行時，媽咪又覺得反正佢都追番上黎同一行，就算佢真係輸左都無所謂啦，點知，最後係佢嬴左，仲興奮到暈低咁濟，真係出人意表！

 

希望，Ambrose响今次遊戲中，明白到少少，一時嘅成敗唔代表到d咩啦！不過睇佢咁得戚個樣，都係教唔到佢輸嬴其實唔重要囉！唉！