今年，學校再搞大匯演，早幾個月前已經可以去學校買飛，可惜開賣時間係office hour，真係無理由為左買飛睇表演而去請假吧！所以收工至去買飛時，中間位置已經無哂前幾行了！為左坐前少少，唯有坐側面嘅冷巷位，希望Ambrose可以搵到爹爹媽咪啦！
今年八月起，Ambrose已經無再參加小演員班，所以都只係隨堂排舞。今年佢要表演嘅舞蹈劇叫《土人》，有日湊佢去跳舞時，媽咪問及Ambrose在課堂上有無情緒問題，老師就話唔發覺有唔同，而且老師提到Ambrose好creative，在排舞時經常會自己諗到一d動作，帶動到其他同學跟佢做，老師見動作又好符合角色，所以，有d動作係跟左Ambrose嘅創意做出黎嘅！當時，媽咪都無暇理會老師嘅分享，只著眼於究竟Ambrose情緒上係咪真係已經復原。
表演前一星期，學校已經派發表演服，Ambrose嘅表演服，係不折不扣嘅土人衫，單邊獸毛背心加圍布。收到表演服後媽咪已經收埋左，無俾Ambrose再睇吓或者著下，直至表演當日！
其實媽咪對於表演日有個隱憂，就係唔知道究竟Ambrose情緒上仲係咪可以afford到，由綵排至所有表演完結之後至可以放學搵爹爹媽咪，上年嘅經驗，起碼四、五個鐘，以近期Ambrose成日上堂都問幾時落堂嘅表現黎睇，今日真係會好難捱，唔知究竟最終佢可唔可以撐到表演！
就係呢個隱憂，令到媽咪忽略左其他野！當去到會場綵排時，媽咪同Ambrose換上土人衫，已見到Ambrose周身唔自在！原來佢唔係好鍾意見衫單邊，露左一邊膊頭出黎！仲有就係果件圍布，實際同條半截裙無咩分別，佢係咁問媽咪點解唔係褲！呢個時侯，媽咪都知道套衫出事了，仲要呢個時候，又咁啱有d女仔同學著同一套衫經過，原來男仔同女仔套衫係一樣的，响個女同學經過果一刻，媽咪真係心驚膽戰，唔知Ambrose又會唔會大受打擊！媽咪實在太失策，應該一早攞套衫出黎好好輔導吓佢！
著左套土人衫之後，Ambrose一直都唔係太自然，就算見到同班男同學，仲係好似發呆咁。最慘係入場後未係即時表演，仲要綵排同等唔知幾耐至夠鐘出場，佢嘅表情真係令爹爹媽咪擔心！
送左Ambrose去綵排後一小時，爹爹媽咪終於可以入場，見到個run down，有成2x項，而Ambrose表演的舞蹈劇排在18項，好遲呀！一路都好擔心唔知佢究竟捱唔捱到，最終佢出唔出到場，就好似第一年表演時嘅心情咁！
終於，都見到Ambrose出場了，見佢個樣精精神神，好似好開心咁，唔知响後台做過d咩呢？！Ambrose位置排在中間，所以坐側左嘅爹爹媽咪就睇得無咁正了，可惜！Ambrose一出場就已經好投入，好貫徹到土人角色，係咁做左好多好搞笑嘅動作，又伸脷又搖頭fing手fing腳等等，都唔知究竟係咪排練嘅動作之內，因為其他人都唔係咁，但又正因為佢呢d咁搞笑嘅動作，惹來全場大笑及鼓掌！
表演完後，Ambrose仲好開心，返到屋企自己响度跳騎馬舞，仲話好想快d可以又表演！哈哈！睇黎，之前擔心佢嘅情緒問題，似乎可以放番輕鬆了！
沒有留言:
張貼留言