未搬家前，Ambrose有一塊超大白板鑽左上牆，佢可以隨時隨地攞起筆就畫。搬左家之後，呢塊超大白板無左，取而代之嘅係一塊小型白板，可以自由咁攞黎攞去，鍾意响邊度畫畫都得！不過，唔知係咪所用嘅白板筆唔得定係白板刷唔得，Ambrose成日畫完都刷唔得乾淨，結果佢攞住塊板成日周圍放，搞到好污糟咁，媽咪忍唔住掉左！
其實Ambrose畫畫會畫在紙上多，媽咪以為掉左塊白板，佢會唔記得，亦都無咩需要一定要在白板上畫畫，所以一直都不了了之。直至最近，Ambrose追問白板嘅下落，媽咪唯有如實同佢講，塊板太污糟，寫左上去又刷唔到，壞左掉了，哈哈！點知佢就好失落咁話好想要番塊白板！
以前，都有諗過買一個畫架，一面白板，一面黑板，又可夾畫紙上去畫水彩，一物多用！但，家中玩具越黎越多，又要長期擺放琴譜架，再擺多個畫架，真係七國咁亂，所以畫架都係放棄吧！
最近，偶然見到書局有一隻白板貼，可以隨意貼在牆上，無需打釘亦無需用雙面貼，媽咪忽然諗到貼在房門上充當白板，俾Ambrose畫公仔，亦未嘗不可！
以為張白板貼會有黏力，原來完全沒有，就咁漿在房門上，咩都唔需要用，真係好方便，又不傷房門，好好用呀！只係呢隻白板貼無磁力，唔可以貼磁石上去，不過，呢個問題不大啦！
而家Ambrose可以有白板可畫，滿足佢塗鴉嘅慾望，又唔使阻屋企地方，真係太好了！
沒有留言:
張貼留言