今堂Ambrose畫左一隻大紅蘿蔔同三隻小白兔，好可愛呀！Ambrose話老師講左個故事先至開始畫嘅。媽咪叫Ambrose講個故事俾媽咪聽，佢就話有一日有個農夫見到一隻好大嘅紅蘿蔔，然後佢就話咁大隻紅蘿蔔，大件事喇，要抆佢出黎至得！之後，就好大力抆紅蘿蔔，再之後，有兩隻白兔仔幫手一齊抆，再跟住，佢就話講完喎！哈哈哈！睇黎，Ambrose嘅複述能力都仲係好弱！媽咪再問，又話有個農夫發現隻紅蘿蔔嘅？咁點解唔見左農夫，得三隻白兔仔嘅？Ambrose呆左一呆，好似唔知媽咪講咩咁！媽咪再問一次，個農夫去左邊呀，做咩三隻白兔仔抆紅蘿蔔嘅？跟住，Ambrose就話，白兔咪農夫囉！
呢句說話，再次提醒媽咪，一d自以為是嘅野，其實响小朋友眼中並非必然，佢地睇到嘅野，係有好多可能性；大人睇，可能已經被世俗嘅框框定格左！
畫畫如是，生活、學習亦如是！
沒有留言:
張貼留言