保暖泳衣 (4y1m)

不經不覺，一期十堂嘅泳班完左！剛巧步入九月，如果繼續上泳班，就會橫跨到冬天去，爹爹媽咪商量應唔應該俾Ambrose冬天繼續學落去。朋友嘅經驗係，要等一季至再開始學番，之前所學嘅好大可能忘記哂，要從新黎過！由於係私人一對二咁學，加上見Ambrose嘅不斷進步，媽咪當然唔想白白浪費之前嘅課堂啦！室內池已經係暖水，問題不大吧！所以，媽咪決定繼續學落去，雖然未必一時三刻學得識，但當係強身健體嘅運動，兼訓練一下意志，都係一件好事吧！

及至早兩星期前，媽咪發現，原來天氣涼了，即使係暖水池，落水點都會有點凍！而家都有件保暖背心著下，冬天得十幾度時應該頂唔住吧！因此，媽咪決定快快買件保暖泳衣俾Ambrose，以防入季好易斷碼！

教練本身幾嚴格，咩都話唔使特別買，連泳鏡都可以話唔使用，見Ambrose同二表姐轉過幾次泳鏡都略有微言！其實唔係媽咪怪獸，只係因為Ambrose對泳池水似乎有點敏感，游完水之後對眼睛例必會好痕，成日捽，所以泳鏡不能少！其實前後都只不過買左兩副泳鏡俾Ambrose試，都唔係太誇張啫！買保暖泳衣前，都有諮詢過教練，其實都估到佢會點答，哈哈！佢話落水游就唔會凍，游水對身體好，唔需要特別買保暖衣！好想話，落水不停咁游就唔凍啫，但有時兩個小朋友一齊學，總會有些時候係等候時間，會靜止左架麻，點都會凍囉！本來教練可代買游泳用品會平d，見佢咁講，都唔好意思叫佢幫手買喇！

搭左個朋友向佢教練代買保暖衣，教練話呢隻短袖及膝型係最啱小朋友學游水，唔會太阻水或太浮，但又有保暖作用，即管試吓啦！

保暖泳衣尋日到手，隨時太凍都有暖衣著，放心哂！件泳衣好fit，好型呢！