初試Snakes and Ladders (4y1m)

之前試過幾次同Ambrose玩飛行棋，可能又多顏色又要跳棋同炸棋，有時又話雙數至起得機咁，搞到Ambrose好似好混亂咁，仲會玩玩吓話唔玩走左去！所以，媽咪覺得Ambrose應該要試玩d再簡單少少嘅board game！早排响反斗城買左盒Snakes and Ladders　Board Game，只係擲骰向前行，特別嘅都只係見到ladder向上行，踩到蛇就行下落，應該都唔算太難吧！

於是，今晚見無咩野做，又見Ambrose呢幾個月對數字數量都有d概念，就攞左呢盒Snakes and Ladders　Board Game同佢玩！估唔到而家嘅佢玩得都算唔錯，之前同佢玩飛行棋，要佢行6，可能佢行左落同一格或者跳多左一格咁數6，今晚同佢玩，又無呢個問題，擲到幾多就行幾多！唯一有少少難度就係佢唔係好睇角落頭嘅數字，1-100唔係同一個方向去，每十格一行，每行嘅方向都會轉一轉，所以一行向左行，下一行可能係向右行，而Ambrose無睇角落頭數字咁去，有時佢會無哂方向感，一時向上直行，有時又會向後行，真係好好笑！不過，就係咁先至可以玩住同佢認吓d數宇，尤其是30以外嘅數字佢都未係好熟練，從遊戲中學習，希望有樂趣得黎佢亦學到野啦！

 

可能之前同表姐們玩得多，表姐好唔鍾意輸，次次玩親呢d有競爭成份嘅遊戲都大發脾氣！ Ambrose唔多唔少都學左，佢擲骰嘅時候奸奸地，會轉好粒骰然後就咁擺粒骰落去檯上，企圖擲到6，可以行多d快d！當然，佢咁樣唔成事，始終都有跌落檯，粒骰點都會轉嘅，而且，爹爹媽咪亦有即時提點佢唔可以咁做啦！

 

Ambrose算係好好彩，第一次玩，佢由頭帶到落尾，媽咪就大落後！佢好快已經上到去九十幾格，但因為爭三格至到終點，一定要擲到exactly 3，佢至可以行，所以等到爹爹都差不多追上黎嘅時候，佢就又開始奸奸地！明明擲左一次唔係3，無得行，佢又話果下唔算要擲多下！有無搞錯！真係好嘅唔學，衰嘅野一學就識！

 

不過，到最後，Ambrose都係第一個去到100，佢嬴左，不知幾開心！再叫佢玩多一次，死都唔玩，好肯定係佢怕輸啦！睇黎，爹爹媽咪要花雙倍心機去糾正番佢至得喇！