唔知係咪老師响學校講重陽節嘅故事，Ambrose就同爹爹媽咪講話要去山上面！之前國慶節，Ambrose曾經嚷著要去睇升旗，話係老師叫架喎，無同佢去睇已經好緊張係咁嘈住哂，又差d喊埋出黎！原本尋日去左大坳門放風箏，媽咪已經當係去左登高的了，點知今朝早起身，爹爹話要去樓下嘅行山徑行山登高喎！
尋晚至同隻野豬精神上角力左一番，玩左成日已經好攰，今朝早根本起唔到身，唔好話仲要去行山，無運動開嘅媽咪真係散哂，想唔去，但敵不過爹爹嘅遊說，答應了！起左身，媽咪聽到爹爹同Ambrose以下對話：
爹爹：Ambrose，陣間去登高呀！
Ambrose：咩呀？
爹爹：即係上山上面呀，咁咪可以返學校同老師同學分享吓囉！
Ambrose：咩呀？！
（Ambrose對於一d自己唔想嘅野好多時都會講咩呀，扮無知！）
爹爹：重陽節去登高呀！行完山，明天可以同老師講你行左喇！
Ambrose：唔去呀！
爹爹（咁難得遊說了媽咪肯去，竟然Ambrose唔肯去，愣住了）：點解唔去呀？
Ambrose：都無危險，又無地震，唔使上山喎！
爹爹：無危險同地震都可以去登高架喎！
Ambrose：唔使架！我唔去呀！
爹爹：去啦！點解唔去呀？
Ambrose：唔使去架！不如我地去尖沙咀食雪糕啦（海港城反斗城隔離有間賣雪糕的店，次次去親都食雪糕，講親尖沙咀都係為左食雪糕）！
媽咪响隔離真係忍唔住笑，真係好好笑！唔登高去食雪糕，又真係幾押韻喎！
之不過，爹爹已經決定左，最後半迫半氹都出發去了，仲約埋表姐一齊去，無咁悶！
明明食左野就去行山，上左一條斜路之後，Ambrose就話好肚餓！＠＠
一連上左幾條好斜嘅斜路之後，媽咪同Ambrose已經略有微言，因為爹爹話好好行，但一開始嘅斜路真係好攰吓！上到行山徑，全平路，唔係山路，其實都ok，不過Ambrose好快出到一身汗，又熱又無野睇，得個行字，佢已經無咩耐性，係咁喊攰！
行山徑沿路都有不少康體設施，站站停下玩下咁，進度真係超慢！最後，時間嘅關係，其實實際唔係行左好大段路，但實在太花時間行，最終，因為姑丈要返工，而剛巧路經下山出口，所以最後行左個幾鐘頭就下山了！
好彩下山快，一去到地面等車回家，落起雨來！
回到家，Ambrose夜晚瞓唔著，叫媽咪過房，佢話下次可唔可以唔行山，好攰呀！嘩哈哈！真係笑死媽咪！媽咪話好啦，等你大個少少先至再去過啦！Ambrose就話你同爹爹講啦，媽咪話好啦，但企左响度無郁，Ambrose就話，你而家同佢講啦！於是，媽咪行左出去同爹爹講，再行番入房安撫Ambrose話講左喇，佢至安心瞓覺，哈哈哈！
沒有留言:
張貼留言