事前都有諗過重陽節會有好多人去BBQ，只係大家都好天真咁去諗，咁唔就腳，應該唔會太嚴重吧！點知，未入停車場已經大排長龍，沿路已見好多人落車行入去，又或者有d車已經忍唔住掉頭走！因為已經瞓左晏覺，Ambrose上車唔需要再瞓，所以行車期間佢已經不斷問點解咁耐。到架車排隊入停車場，停哂响路上郁都唔郁，佢嘅耐性幾乎到極限！於是，媽咪落車探路，原來距離停車場都唔算遠，而停車場入去風箏場亦唔係太遠，媽咪都尚算認得路，於是，決定同Ambrose落車去玩住先，爹爹就要繼續排隊泊車了！
好彩嘅係，已經有朋友早左入黎霸左爐，可以安心直接去放風箏。不過由於個個男人都正在車上等泊車，友人要霸住個爐唔行得開，於是媽咪同另一女友人帶住三個小朋友去風箏場睇人放風箏！睇左一陣，Ambrose已經狂問點解我地唔放風箏！兩個女人睇三個小朋友加架bb車，再要放埋風箏，好似有點兒狼狽，媽咪唯有話自己唔識整個風箏，都係等爹爹黎埋先玩啦！
睇呀睇，睇呀睇，兩個較大嘅小朋友無野玩，竟然走去玩執石頭，咁又難怪佢地嘅，唔係真係企响度做咩丫？！哈哈！睇左十分鐘，媽咪自己都覺得幾悶，見班男人好大可能有排都未泊到車，已經係五點幾嘅時間，再唔放風箏，天黑都唔使放！於是，硬著頭皮拆開左隻風箏，綁好，之後就同朋友一齊狼狽地放著！本來都唔預會成功，但大坳門即係大坳門，幾乎都唔使咩技巧，chok吓chok吓隻風箏就飛起左喇！不過由於買風箏時包嘅係線排而唔係線碌，線長度唔係太夠放到好高，而且收放亦無咁自如，所以隻風箏只係响天空中低飛，無咁stable，結果係會耐唔時跌番落黎再起過。其實都ok嘅，放風箏其實最好玩就係開始嘅時候，放定左响好高空好stable嘅話反而又好似無咩野好玩咁！
玩到差不多太陽開始下山，班男人至泊好車上來一齊放風箏。友人買左一叠幾十隻連住嘅風箏放，由於好多隻連住，d線好易打結，現場又好多風箏，所以放呢叠風箏要動用成班人一齊去放，過程又好笑又好玩！結果，叠風箏未能成功全部起飛，有部分更因為與附近嘅亭角纏埋一齊而要捨棄，最終，全盛時期係同時有二十幾隻起飛，哈哈！
放完風箏就去返BBQ！之前都有問及友人現場環境係點，大家估計應該有微弱嘅街燈。為安全計，大家都各自帶了小燈，以備不時之需！點知，去到至發現，原來係一盞街燈都無！天黑了，真係可以伸手不見五指！真係大件事！帶來嘅燈只係作有限範圍嘅照明，都好過無啦！
未天黑前，隔離爐嘅人已經同我地講，話我地個爐嘅上一手話曾見到爐隔離草叢有野豬行過，建議我地食物唔好擺近草叢果邊張檯。雖然已將食物擺離草叢，但由於知道有野豬，媽咪真係有點坐立不安，尤其是加上現場真的好黑好黑，黑到要見到人樣都要响兩、三尺範圍，真係一d安全感都無！
由於實在太黑，真係擔心班小朋友好易走失，好彩爹爹咁啱帶左個大帳幕去，夠哂班小朋友入去玩，再將個大帳幕放响兩張檯中間，叫埋佢地唔可以離開帳幕以後嘅範圍，仲要搵個人全情望實班小朋友，至可以安心！
大坳門係個好大風嘅地方，一路燒野食，一路都好大風，不時都聽到d樹枝嘅聲音，大家都不以為意。但媽咪心底入面，不時都好驚真係有野豬出現，所有嘅奇怪聲音，都令媽咪好緊張！燒左一段長時間都唔覺有太大問題，但突然就聽到有d樹枝被踩到”quak quak”聲，再抬頭望向草叢，就見有野豬行左出黎，响個垃圾桶後面摷野食，之後，仲見到佢身後有好幾隻小野豬，真係好嚇人呢！
野豬嘅出現，令到大家都好緊張，應該係話令到各女士們同小朋友們都好緊張，男士們似乎覺得無咩值得驚，甚至乎更認為我地唔搞佢佢都唔搞我地，分分鐘佢仲驚過我地喎！佢都係出黎搵食啫，而且係我地去左佢嘅地方騷擾左佢地就真！媽咪認為雖然係好有道理，但始終天又咁黑，成班小朋友又响度，亦唔知究竟仲有幾多隻野豬响附近，都有一定程度嘅危險，驚都好正常啫！
與野豬一齊BBQ左一陣，佢地就走左，總算可以放鬆一下心情！當我地發現開始越來越黑嘅時候，突然驚覺，原來附近嘅人已經走哂，得番我地個爐，而且兩個爐中，較接近有野豬果個開始火勢漸弱，暗淡下來！赫見野豬又出現，今次仲見到兩隻大野豬添！唯有叫朋友一直戴住頭燈望住野豬嘅動態，一路將個就熄嘅爐又透番起大火！不過媽咪已經開始按耐不住心底嘅驚怕，周圍都好大風，又黑，講真，暫時就只係望住前面果兩隻豬，其實周圍都好似有少少光點（唔知係咪野豬眼睛嘅反光）又有少少聲咁，唔知其實會唔會四圍都有野豬包圍我地，而我地其實只係太黑睇唔到！諗到呢度已經唔想再坐落去！
不斷催促各人，快d燒埋海鮮類食物就算，快d執埋d野走人！
下次都唔好預我夜晚去郊野公園BBQ！！！
沒有留言:
張貼留言