殺人鯨擱淺了 (4y1m)

Ambrose星期二搭校巴返學時嘔，嫲嫲趕去學校接走佢去睇醫生，Ambrose仲好搞笑咁打電話俾媽咪，話佢自己嘔左三次，問佢有咩唔舒服時，佢竟然話心跳喎，真係好好笑！

 

休息左兩日，見佢都無咩野，燒又發過退過喇，只係胃口一般，所以都有俾佢返學。返左兩日學，又唔覺佢有咩太大問題，應該都好番喇掛！

 

今晚要學游水，學之前同佢去食左晚飯，仲驚佢無咩胃口食得少無力游水，點知佢又好好胃口，反而食到媽咪又驚佢飽得濟！

落左水一陣，Ambrose就開始話肚痛，問佢係咪要去廁所佢又話唔使，氹左佢幾句又叫佢繼續，然後，過得一陣佢又叫肚痛，又話唔去廁所。媽咪都唔知繼唔繼續好，事關平時教練都幾嚴，望吓佢又唔覺佢有意思放Ambrose走，只係話係呀，佢真係肚痛，個肚撳落都實架！但又話游吓水就唔痛架喇！

 

於是，Ambrose又繼續游左一陣。好快，就見頭戴住殺人鯨泳帽、身穿黑藍泳衣嘅Ambrose自己爬上泳池邊扒左响度，又叫肚痛，都未黎得切行埋去，佢就已經喊得好淒涼喇！見到呢個情景，又覺得好搞笑，好似殺人鯨擱淺左，佢個嘴喊到扁左，又可憐又可笑！

 

見到Ambrose咁嘅樣，都係上唔到堂架喇，所以媽咪直接用毛巾包走佢返上樓沖涼。沖完涼嘅Ambrose，面褲都懶得著，攤左响沙發上面嘆電視，又好似無咩野咁，都唔知佢搞咩！