IPNG同學仔哈佬喂gathering (4y2m)

今日約左IPNG同學仔黎樓下會所gathering，可惜爹爹要返工！由於臨近萬聖節，大家提議搞番個化妝晚會。不過媽咪一直都無買Halloween嘅造形衫俾Ambrose，家中亦無化妝品，所以都無同佢搞造形，只係同佢著番Batman衫算數，有件斗蓬佢就已經覺得好型了！

識到呢班同學仔，真係好感恩！由佢地細細個返N班，到而家已經K2，真係可以話睇住佢地大！呢班同學仔同Ambrose都可算投契，最重要嘅係，家長們對Ambrose粗魯行為並唔會有過於激烈反應，唔使媽咪一步一驚心咁貼身睇實佢，媽咪真係輕鬆不少！

班小朋友响會所一齊玩，雖然有時Ambrose都有少少粗魯，但都可接受！見佢終於可以有朋友仔一齊玩，媽咪替佢高興，如果可以又可能的話，真係應該多點約朋友一齊玩，等佢唔使咁寂寞！

玩左個幾鐘，就入左function room開餐，function room入面無野玩，勝在地方大，小朋友係咁跑黎跑去已經好開心！Ambrose等大家食完之後，係咁嘈住想出返去會所玩，但其他小朋友好似無咩反應，見佢都開始有少少忟咁，媽咪就話地方太嘈了，叫佢逐個去問吓，人地至聽到佢講野架！結果，其他小朋友聽到梗係話好啦！但當幾個小朋友出發左一半去會所時，有媽咪就叫住小朋友，話派糖，結果其他小朋友一聽見話派糖又衝返入房，Ambrose不知幾忟，好氣憤咁話玩完先食啦！見到佢咁又覺得佢好可憐，又可笑！平時食野大過天嘅佢，竟然識話玩完先食啦，哈哈哈！

好啦，幾經辛苦至叫齊人出去玩，都算佢有耐性！不過玩左一陣，大家都要走了，因為第二日仲要返工返學！當大家都在著鞋時，Ambrose就開始好唔開心，係咁話唔走得，唔可以走，玩多陣先，最後仲大喊！Ambrose真係一個喊包，成日都好易喊！雖然係咁，媽咪都好明白佢，平時自己去會所無人同佢玩，已經話想有人同佢玩，今日咁開心，咁多朋友一齊陪佢，開心過後，要講拜拜又真係好失落嘅！更何況，其實玩嘅時間唔算係好長，對於佢黎講，真係未夠喉！最後，朋友仔為左氹佢就多留左一陣，之後，Ambrose都唔係好開心，唯有俾佢自己留多一陣自己玩啦！見佢無咩心機咁，真係幾心痛！

今次gathering，見到Ambrose有乖嘅行為，真的好高興！幾個朋友仔分別整到喊，雖然佢唔係好識得好溫柔咁安慰人，但幾次見佢都笑笑口，尷尷尬尬的走去朋友度，問佢有無事，又識得執起d玩具俾朋友，意圖令佢地唔好喊，雖然技巧不足，但知道佢係想去安慰朋友，媽咪看在眼內，也很感動呢！Ambrose很有鐡漢柔情嘅感覺！平時見佢滿不在乎似的，但少少舉動，就足以知道佢其實懂關心人！

另外，搞笑事件一則！有朋友仔撞到頭，額頭起左樓，响度喊，Ambrose行埋去關心朋友仔，問佢有無事，唔好喊，見人地仲喊緊，佢竟然問朋友仔，有無覺得想嘔？！大家當堂都好驚訝又好笑，點解佢識咁講野？！媽咪都唔知點解，可能學校有小朋友撞到過而老師有問過掛，哈哈！